ອາກາດໜາວມາແລ້ວ! ຮັກສາສຸຂະພາບແດ່ເດີ

157

ອາທິດນີ້ສະພາບອາກາດຈະເລີ່ມເຢັນລົງ ເນື່ອງຈາກມວນອາກາດເຢັນຈາກປະເທດຈີນ ຈະແຜ່ລົງມາປົກຄຸມຢູ່ເຂດພາກເໜືອ ແລະ ພາກກາງຂອງປະເທດລາວ ດ້ວຍກຳລັງປານກາງ.

ກົມອຸຕຸນິຍົມ ແລະ ອຸທົກກະສາດ, ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ອອກບົດລາຍງານສະພາບອາກາດ ເລກທີ 1128/ກອຕທ ລົງວັນທີ 18 ຕຸລາ 2021 ຄາດຄະເນສະພາບອາກາດໃນໄລຍະວັນທີ 18 ຫາ 24 ຕຸລາ 2021 ວ່າ: ໄລຍະວັນທີ 18 ຫາ 20 ຕຸລານີ້ ຄວາມກົດດັນສູງຂອງອາກາດເຢັນຈະປົກຄຸມຢູ່ແຂວງພາກເໜືອດ້ານຕາເວັນອອກຂອງປະເທດລາວ, ສົມທົບກັບກະແສລົມຕາເວັນອອກພັດປົກຄຸມ ເຊິ່ງຈະເຮັດໃຫ້ອາກາດເຢັນພ້ອມໝອກບາງປົກຫຸ້ມໃນຕອນເຊົ້າຢູ່ແຂວງພາກເໜືອ ແລະ ຈະມີຝົນຕົກໃນລະດັບຄ່ອຍ ຫາ ປານກາງຢູ່ບາງທ້ອງຖິ່ນແຂວງພາກໃຕ້.

May be an image of 4 people, people standing, people sitting, fire and outdoors

ໄລຍະວັນທີ 21 ຫາ 24 ຕຸລາ 2021 ມວນອາກາດເຢັນຈາກປະເທດຈີນຈະແຜ່ລົງມາປົກຄຸມຢູ່ເຂດພາກເໜືອ ແລະ ພາກກາງຂອງປະເທດລາວ ດ້ວຍກຳລັງປານກາງ, ສ່ວນພາກໃຕ້ ປົກຄຸມດ້ວຍບໍລິເວນຄວາມກົດດັນອາກາດຕໍ່າທີ່ມີກຳລັງແຮງ ເຊິ່ງຈະເຮັດໃຫ້ມີຝົນຕົກໃນລະດັບຄ່ອຍ ຫາ ປານກາງ ແລະ ຕົກໜັກ ພ້ອມມີລົມພັດແຮງຢູ່ແຂວງພາກກາງ ແລະ ພາກໃຕ້, ສ່ວນພາກເໜືອ ອາກາດເຢັນ ແລະ ມີຝົນຕົກໃນລະດັບຄ່ອຍຢູ່ບາງທ້ອງຖິ່ນ.

ອາກາດມີການປ່ຽນແປງແບບນີ້ແມ່ນຈະເຮັດໃຫ້ຮ່າງກາຍປັບບໍ່ທັນ ແລະ ເຈັບໄຂ້ໄດ້ປ່ວຍງ່າຍ ໂດຍສະເພາະຜູ້ທີ່ມີພູມຕ້ານທານຕ່ຳ ເປັນຕົ້ນຜູ້ເຖົ້າ ແລະ ເດັກນ້ອຍ, ດັ່ງນັ້ນຢ່າລືມກຽມເສື້ອຜ້າກັນໜາວໄວ້ກິນອຸ່ນນຸ່ງອຸ່ນ ເພື່ອຮັກສາສຸຂະພາບຂອງທ່ານ ແລະ ຄົນທີ່ຮັກ.