ອຸຕຸເຕືອນ ລະວັງພາຍຸລະດູຮ້ອນແຕ່ນີ້ຮອດ 9 ເມສາ ຢູ່ບາງທ້ອງຖິ່ນໃນແຕ່ລະພາກ

749

ກົມອຸຕຸນິຍົມ ແລະ ອຸທົກກະສາດ ເຕືອນໄລຍະວັນທີ 6 ຫາ 9 ເມສາ 2020 ອາກາດຮ້ອນ ຫາ ຮ້ອນເອົ້າ ຊຶ່ງຈະເຮັດໃຫ້ເກີດມີພາຍຸລະດູຮ້ອນ ໃນລັກສະນະຝົນຕົກຟ້າຮ້ອງຟ້າເຫຼື້ອມ, ຟ້າຜ່າ, ໝາກເຫັບຕົກ ແລະ ລົມພັດແຮງ ຢູ່ຕາມບາງທ້ອງຖິ່ນໃນແຕ່ລະພາກ ໃນໄລຍະທ້າຍຕອນບ່າຍ ຫາ ກາງຄືນ.
ກົມອຸຕຸນິຍົມ ແລະ ອຸທົກກະສາດ ອອກບົດລານງານສະພາບອາກາດ ເລກທີ 0415/ກອຕທ, ນະຄອນຫຼວງວຽງຈັນ, ວັນທີ 6 ເມສາ 2020 ຄາດຄະເນສະພາບອາກາດ ໃນໄລຍະວັນທີ 6 ຫາ 12 ເມສາ 2020: ໃນໄລຍະວັນທີ 6 ຫາ 9 ເມສານີ້ ຄວາມກົດດັນອາກາດຕໍ່າຂອງອາກາດຮ້ອນຍັງຈະປົກຄຸມຢູ່ພາກເໜືອດ້ານຕາເວັນຕົກ, ສ່ວນແຂວງພາກເໜືອດ້ານຕາເວັນອອກ ລົງຫາພາກກາງ ແລະ ພາກໃຕ້ຂອງປະເທດລາວ ຄວາມກົດດັນອາກາດສູງຂອງອາກາດເຢັນທີ່ປະເທດຈີນຈະແຜ່ລົງມາປົກຄຸມດ້ວຍກຳລັງອ່ອນ, ພ້ອມດຽວກັນກະແສລົມຕາເວັນອອກ-ຕາເວັນອອສ່ຽງໃຕ້ພັດປົກຄຸມເປັນສ່ວນໃຫຍ່ ຊຶ່ງຈະເຮັດໃຫ້ອາກາດຮ້ອນຫາຮ້ອນເອົ້າ ແລະ ຈະມີໝອກແຫ້ງປົກຫຸ້ມຢູ່ທົ່ວໄປໃນຕອນກາງເວັນ. ພ້ອມຈະມີຝົນຕົກຟ້າຮ້ອງຟ້າເຫຼື້ອມໃນລະດັບຄ່ອຍຫາປານກາງ, ຟ້າຜ່າ ແລະ ໝາກເຫັບຕົກ ແລະ ມີລົມພັດແຮງຢູ່ບາງທ້ອງຖິ່ນແຂວງພາກເໜືອດ້ານຕາເວັນອອກ ລົງຫາພາກກາງ ແລະ ພາກໃຕ້. ຈາກນັ້ນວັນທີ 10 ຫາ 12 ເມສາ 2020 ຄວາມກົດດັນອາກາດຕໍ່າຂອງອາກາດຮ້ອນເອົ້າຈະມີກຳລັງປານກາງປົກຄຸມຢູ່ທົ່ວທຸກພາກຂອງປະເທດລາວ ຊຶ່ງຈະເຮັດໃຫ້ອາກາດຮ້ອນຫາຮ້ອນເອົ້າພ້ອມມີໝອກແຫ້ງປົກຫຸ້ມໃນຕອນກາງເວັ້ນ ຍັງຈະມີຝົນຕົກຟ້າເຫຼື້ອມໃນລະດັບຄ່ອຍຫາປານກາງພ້ອມມີລົມພັດແຮງຢູ່ບາງທ້ອງຖິ່ນໃນແຕ່ລະພາກ. ຄາດຄະເນສະພາບອາກາດ ໃນແຕ່ລະພາກດັ່ງນີ້: