ເຊົ້ານີ້ ຊຳເໜືອ, ໄຊສົມບູນ ແລະ ປາກຊ່ອງ ໜາວແຮງ ອຸນຫະພູມຫຼຸດລົງຈຸ 3 ອົງສາ

791

ຖືວ່າປີນີ້ອາກາດໜາວເຢັນຫຼາຍ ອຸນຫະພູມຫຼຸດລົງຕ່ຳໃນຫຼາຍເຂດ ເຊົ້າວັນທີ 6 ທັນວາ 2019 ເຫັນວ່າ 3 ແຂວງ ອຸນຫະພູມຫຼຸດຕ່ຳລົງຈຸ 3 ອົງສາ ຄື: ຊຳເໜືອ, ໄຊສົມບູນ ແລະ ປາກຊ່ອງ.

ຈາກກົມອຸຕຸນິຍົມ ແລະ ອຸທົກກະສາດ ລາຍງານສະພາບອາກາດໂດຍທົ່ວໄປລວມເວລາ 7:00 ໂມງຂອງວັນທີ 06/12/2019 ວ່າ: ມວນອາກາດເຢັນທີ່ປະເທດຈີນໄດ້ເພີ້ມກໍາລັງແຮງຂື້ນແຜ່ລົງມາປົກຄຸມຢູ່ທົ່ວທຸກພາກຂອງປະເທດລາວ, ສົມທົບກັບກະແສລົມຕາເວັນອອກສ່ຽງເໜືອທີ່ມີກຳລັງແຮງພັດປົກຄຸມເປັນສ່ວນໃຫຍ່, ຊຶ່ງຈະເຮັດໃຫ້ອຸນຫະພູມອາກາດສືບຕໍ່ຫຼຸດລົງ 1 ຫາ 2 ອົງສາຢູ່ໃນແຕ່ລະພາກ ແລະ ອາກາດໜາວເຢັນຫຼາຍຈົນເຖີງຂັ້ນນໍ້າກ້າມຢູ່ບາງທ້ອງຖີ່ນແຂວງພາກເໜືອດ້ານຕາເວັນອອກ, ແຂວງໄຊສົມບຸນ ແລະ ເຂດພູພຽງບໍລະເວນ ພ້ອມມີໝອກໜາປົກຫຸ້ມໃນຕອນເຊົ້້າ. ສ່ວນພາກກາງ ຫາ ພາກໃຕ້, ອາກາດເຢັນ ຫາ ໜາວເຢັນ ພ້ອມມີໝອກບາງປົກຫຸ້ມໃນຕອນເຊົ້າ ແລະ ມີລົມພັດແຮງເປັນບາງໂອກາດ

ດັ່ງນັ້ນ, ຈື່ງແຈ້ງເຕືອນເຖີງອໍານາດການປົກຄອງ ແລະ ປະຊາຊົນບັນດາເຜົ່າ ທີ່ອາໄສຢູ່ບັນດາເຂດແຂວງດັ່ງກ່າວ ໃຫ້ມີສະຕິລະມັດລະວັງຕໍ່ສະພາບອາກາດໜາວເຢັນ ແລະ ມີລົມພັດແຮງ, ໃຫ້ຮັກສາສຸຂະພາບ ນຸ່ງຫົ່ມໃຫ້ຮ່າງກາຍອົບອຸ່ນຢູ່ສະເໝີ , ພ້ອມນີ້ຂໍໃຫ້ຕິດຕາມຂ່າວພະຍາກອນອາກາດ ຈາກກົມອຸຕຸນິຍົມ ແລະ ອຸທົກກະສາດ ຢ່າງຕໍ່ເນື່ອງ.