ພາກກາງ-ເໜືອ ກຽມຮັບມືພາຍຸເຂດຮ້ອນໂພດູ ເຂົ້າລາວ 29 ສິງຫາ ນີ້

409

ກ້າວສູ່ລະດູຝົນປະຊາຊົນໂດຍສະເພາະເຂດພື້ນທີ່ຕໍ່າ ຫຼື ເຂດພື້ນທີ່ທີ່ເຄີຍໄດ້ຮັບຜົນກະທົບນໍ້າອັ່ງ,ນ້ຳຖ້ວມຂັງ ຕ້ອງທຳໃຈ ແລະ ກຽມພ້ອມຮັບມືກັບສະພາບອາກາດ ລວມເຖິງລະດັບນໍ້າທີ່ຈະເພີ່ມຂຶ້ນຢູ່ແລ້ວ
ນອກຈາກນັ້ນຍັງມີພາຍຸຫຼາຍໆຫົວ ທີ່ພັດຜ່ານເຂົ້າມາເປັນໄລຍະໆ ອັນຈະເຮັດໃຫ້ມີຝົນຕົກ, ລົມພັດແຮງເປັນບາງໂອກາດຢູ່ບາງທ້ອງຖິ່ນເຊິ່ງມີຄວາມສ່ຽງຕໍ່ການເກີດເຫດຕົ້ນໄມ້, ເສົາໄຟຫັກ, ນ້ຳໄຫຼຊຸດິນເຈື່ອນອັນຈະກະທົບເຖິງຊີວິດ ແລະຊັບສິນໄດ້.

ມື້ນີ້ກົມອຸຕຸນິຍົມ ແລະ ອຸທົກກະສາດ ອອກແຈ້ງການເຕືອນໄພສະບັບຫຼ້າສຸດວ່າຈະມີ ພາຍຸໝຸນເຂດຮ້ອນ ໂພດູ (PODUL) ຫົວທີ 12 ປະຈຳປີ 2019 ໃນເວລາ 7:00 ໂມງຂອງວັນທີ 28
ສິງຫາ 2019 ມີຈຸດສູນກາງຢູ່ເສັ້ນຂະໜານທີ 17,3 ອົງສາເໜືອ ແລະ ເສັ້ນແວງທີ 117,4 ອົງສາຕາເວັນອອກ ພວມເຄື່ອນທີ່ໄປທາງທິດຕາເວັນຕົກ ດ້ວຍຄວາມໄວ 40 ກິໂລແມັດຕໍ່ຊົ່ວໂມງ.

ໂດຍຄາດວ່າພາຍຸຫົວນີ້ຈະເຄື່ອນທີ່ຜ່ານພາກກາງ ຫາ ພາກເໜືອຂອງປະເທດລາວ ໃນໄລຍະວັນທີ 29 ຫາ 31 ສິງຫາ 2019 ເຊິ່ງຈະເຮັດໃຫ້ມີຝົນຕົກຟ້າຮ້ອງຟ້າເຫຼື້ອມ ແລະ ລົມພັດແຮງຢູ່ແຂວງພາກເໜືອ ຫາ ພາກກາງ ແລະ ພາກໃຕ້ ໃນໄລຍະວັນທີ 29 ສິງຫາ ຫາ 1 ກັນຍາ 2019 ນີ້.

ດັ່ງນັ້ນ, ຈຶ່ງແຈ້ງເຕືອນເຖິງອຳນາດການປົກຄອງ ແລະ ປະຊາຊົນບັນດາເຜົ່າທີ່ອາໄສຢູ່ບັນດາແຂວງເປັນຕົ້ນຫົວພັນ, ຊຽງຂວາງ, ອຸດົມໄຊ, ຫຼວງພະບາງ, ໄຊຍະບູລີ, ນະຄອນຫຼວງວຽງຈັນ, ໄຊສົມບູນ, ວຽງຈັນ, ບໍລິຄຳໄຊ, ຄຳມ່ວນ, ສະຫວັນນະເຂດ, ສາລະວັນ, ຈຳປາສັກ, ເຊກອງ ແລະ ອັດຕະປືໃຫ້ມີສະຕິລະມັດລະວັງຕໍ່ສະພາບຝົນຕົກຟ້າຮ້ອງ ຟ້າເຫຼື້ອມ ແລະ ລົມພັດແຮງ ທີ່ອາດຈະເຮັດໃຫ້ຕົ້ນໄມ້ຫັກ, ເສົາໄຟຟ້າຫັກລົ້ມ, ດິນເຈື່ອນ, ນ້ຳຖ້ວມຊຸ ແລະ ນ້ຳຖ້ວມອັ່ງ, ພ້ອມໃຫ້ເກັບມ້ຽນວັດຖຸສິ່ງຂອງ ແລະ ສັດລ້ຽງໄປໄວ້ບ່ອນທີ່ປອດໄພດ້ວຍ.