ກຽມຮັບມືອຸທົກກະໄພ ແຕ່ນີ້ຮອດເດືອນສິງຫາ ຈະມີຝົນຕົກໜັກໃນທຸກພາກ

463

ອຸຕຸແຈ້ງເຕືອນລ່ວງໜ້າໃຫ້ເຝົ້າລະວັງອຸທົກກະໄພທີ່ອາດເກີດຂຶ້ນເນື່ອງຈາກໄລຍະທ້າຍເດືອນ ມິຖຸນາ ຫາ ສິງຫາ 2019ຈະມີຝົນຕົກຕິດຕໍ່ກັນຫຼາຍວັນ ເຊິ່ງຈະເຮັດໃຫ້ເກີດມີດິນເຈື່ອນ ແລະນໍ້າຖ້ວມຊຸຢູ່ບາງທ້ອງຖິ່ນແຂວງ ພາກເໜືອ ແລະ ພາກກາງພ້ອມນີ້ສະພາບຝົນຕົກສະສົມຈະເຮັດໃຫ້ມີນໍ້າຖ້ວມອັ່ງ ແລະ ຖ້ວມຍື່ງໃນເຂດພາກກາງ ແລະພາກໃຕ້.

ດັ່ງນັ້ນ, ຈຶ່ງຂໍແຈ້ງເຕືອນເຖິງພໍ່ແມ່ປະຊາຊົນ ແລະອຳນາດການປົກຄອງທຸກພາກສ່ວນຄວນມີສະຕິ ລະມັດລະວັງຕໍ່ສະພາບດິນເຈື່ອນ, ນໍ້າຖ້ວມຊຸ ແລະ ນໍ້າຖ້ວມຍື່ງ ທີ່ອາດຈະເກີດໄດ້ໃນໄລຍະເດືອນມິຖຸນາ ຫາ ຕົ້ນເດືອນ ສິງຫາ 2019 ນີ້, ສະເພາະຜູ້ທີ່ຈະເດີນທາງຂໍໃຫ້ກວດສອບສະພາບອາກາດທຸກຄັ້ງກ່ອນອອກເດີນທາງ.

ກົມອຸຕຸນິຍົມແລະ ອຸທົກກະສາດ ໄດ້ຄາດຄະເນສະພາບອາກາດໃນໄລຍະອາທິດທຳອິດຂອງເດືອນ ມິຖຸນາ 2019 ວ່າຈະມີຝົນຕົກໃນລະດັບຄ່ອຍຫາ ປານກາງ ເປັນບໍລິເວນກວ້າງ ແລະ ຕົກໜັກຢູ່ບາງທ້ອງຖິ່ນແຂວງ ພາກເໜືອ ລົງ ຫາພາກກາງ,ຈາກນັ້ນ, ອາທິດທີ 2 ຂອງເດືອນ ມິຖຸນາ ອາກາດຮ້ອນຫາຮ້ອນເອົ້າ ແລະ ມີຝົນຫຼຸດລົງເຊິ່ງສ່ວນໃຫຍ່ຈະຕົກໃນລະດັບຄ່ອຍຫາປານກາງຢູ່ບາງທ້ອງຖິ່ນໃນແຕ່ລະພາກ ຈົນມາຮອດອາທິດທີ 3ຫາ ທ້າຍເດືອນ ມິຖຸນາ 2019 ຈະມີຝົນຕົກເພີ່ມຂຶ້ນ ເຊິ່ງຈະຕົກໃນລະດັບຄ່ອຍເປັນສ່ວນຫຼາຍແລະ ຕົກປານກາງ ຫາ ຕົກໜັກຢູ່ບາງທ້ອງຖິ່ນແຂວງພາກເໜືອ ແລະ ພາກກາງ.

ຄາດຄະເນສະພາບອຸນຫະພູມໃນເດືອນ ມິຖຸນາ 2019 ຈະຮ້ອນສູງກວ່າເກນປົກກະຕິ, ສ່ວນສະພາບຝົນ ຈະມີຝົນຫຼຸດເກນປົກກະຕິເປັນສ່ວນຫຼາຍ ແຕ່ກໍ່ມີບາງແຂວງທີ່ຈະມີຝົນລິນເກນປົກກະຕິເລັກນ້ອຍເຊັ່ນ: ແຂວງ ຜົ້ງສາລີ, ນະຄອນຫຼວງວຽງຈັນ, ສາລະວັນ ແລະ ເຊກອງ.

ສຳລັບພະຍາກອນອາກາດໃນເດືອນ ກໍລະກົດ 2019 ກົມອຸຕຸນິຍົມ ແລະ ອຸທົກກະສາດ ໄດ້ຄາດຄະເນວ່າ ຮ່ອງຄວາມດັນອາກາດຕໍ່າ ຈະສືບຕໍ່ເຄື່ອນທີ່ພັດຜ່ານພາກເໜືອ ແລະ ພາກກາງຂອງປະເທດລາວ ສົມທົບກັບມໍລະສຸມຕາເວັນຕົກສ່ຽງໃຕ້ຈະພັດປົກຄຸມດ້ວຍກຳລັງອ່ອນ ເຊິ່ງຈະເຮຫດໃຫ້ມີຝົນຕົກໃນລະດັບຄ່ອຍເປັນບໍລິເວນກວ້າງໃນແຕ່ລະພາກ ແລະ ຕົກປາກາງ ຫາ ໜັກ ຢູ່ບາງທ້ອງຖິ່ນ.

ໄລຍະກາງ ຫາ ທ້າຍເດືອນ ກໍລະກົດ 2019 ຮ່ອງຝົນຈະສືບຕໍ່ພັດຜ່ານ ປ່ອງເຂົ້າໃສ່ພາຍຸໜູນເຂດຮ້ອນທີ່ຈະກໍ່ຕົວຢູ່ເຂດທະເລຈີນຕອນໃຕ້ ແລະ ຈະເຮັດໃຫ້ມໍລະສຸມຕາເວັນຕົກສ່ຽງໃຕ້ມີກຳລັງແຮງຂຶ້ນພັດປົກຄຸມຢູ່ທົ່ວທຸກພາກຂອງປະເທດລາວ, ເຊິ່ງຈະເຮັດໃຫ້ມີຝົນຕົກໃນລະດັບຄ່ອຍເປັນບໍລິເວນກວ້າງ ແລະ ຕົກປານກາງ ຫາ ໜັກ ຢູ່ບາງທ້ອງຖິ່ນແຂວງພາກເໜືອ ແລະ ພາກກາງ.

ສະເພາະເດືອນ ສິງຫາ 2019 ສະພາບອາກາດໃນໄລຍະຕົ້ນ ຫາ ກາງເດືອນ ສິງຫາ 2019 ຮ່ອງຄວາມກົດດັນອາກາດຕໍ່າຈະສືບຕໍ່ເຄື່ອນທີ່ພັດຜ່ານ ເຂດພາກເໜືອ ແລະ ພາກກາງ ຂອງປະເທດລາວ ປ່ອງເຂົ້າໃສ່ພາຍຸໜູນເຂດຮ້ອນທີ່ຈະກໍ່ຕົວຢູ່ເຂດທະເລຈີນໃຕ້ ພ້ອມດຽວກັນ ກະແສລົມມໍລະສຸມຕາເວັນຕົກສ່ຽງຈະພັດປົກຄຸມດ້ວຍກຳລັງແຮງ ເຊິ່ງຈະເຮັດໃຫ້ມີຝົນຕົກໃນລະດັບຄ່ອຍ ຫາ ປານກາງ ໃນແຕ່ລະພາກ ແລະ ຕົກໜັກຢູ່ບາງທ້ອງຖິ່ນແຂວງ ພາກເໜືອ ລົງຫາ ພາກກາງ. ຈາກນັ້ນ, ໄລຍະທ້າຍເດືອນສິງຫາ ສະພາບລົມມໍລະສຸມຈະພັດປົກຄຸມດ້ວຍກຳລັງອ່ອນ ຈະເຮັດໃຫ້ມີຝົນຕົກຫຼຸດລົງໃນແຕ່ລະພາກ ເຊິ່ງຈະຕົກໃນລະດັບຄ່ອຍເປັນສ່ວນຫຼາຍ.