ແຈ້ງເຕືອນ ລະວັງພາຍຸລະດູຮ້ອນເຂົ້າລາວມື້ອື່ນນີ້

613

ພະຍາກອນອາກາດສຳຄັນ ທຸກຄົນຢ່າເບິ່ງຂ້າມ ແລະ ຕ້ອງໃຫ້ການຕິດຕາມການແຈ້ງເຕືອນຈາກພາກສ່ວນກ່ຽວຂ້ອງຢ່າງໃກ້ສິດ ເພື່ອຫຼີກລ່ຽງຜົນເຫຍຫາຍທີ່ອາດເກີດຂຶ້ນ, ສຳລັບເທື່ອນີ້ກົມອຸຕຸນິຍົມແຈ້ງ 10 ແຂວງໃຫ້ລະວັງພາຍຸລະດູຮ້ອນ ເຊິ່ງຈະເກີດສະພາບຝົນຕົກ ຟ້າຮ້ອງ ຟ້າເຫຼື້ອມ, ໝາກເຫັບຕົກ, ຟ້າຜ່າ ແລະ ລົມພັດແຮງນັບແຕ່ວັນທີ 25-27 ເມສາ 2019 ນີ້.

ກົມອຸຕຸນິຍົມ ແລະ ອຸທົກກະສາດ ແຈ້ງເຕືອນໄພພາຍຸລະດູຮ້ອນ ໃນໄລຍະວັນທີ 25 ຫາ 27 ເມສາ 2019 ເນື່ອງຈາກວ່າມວນອາກາດຮ້ອນເອົ້າໄດ້ປົກຄຸມຢູ່ທົ່ວທຸກພາກຂອງປະເທດລາວດ້ວຍກຳລັງແຮງ ພ້ອມດຽວກັນນັ້ນກະແສລົມຕາເວັນຕົກ ແລະ ລົມຕາເວັນອອກສ່ຽງໃຕ້ພັດປົກຄຸມເຂດພາກເໜືອ ຫາ ພາກກາງ ເຊິ່ງຈະເຮັດໃຫ້ມີພາຍຸລະດູຮ້ອນເກີດຂຶ້ນໃນລັກສະນະຝົນຕົກ ຟ້າຮ້ອງ ຟ້າເຫຼື້ອມ, ໝາກເຫັບຕົກ, ຟ້າຜ່າ ແລະ ລົມພັດແຮງຢູ່ບາງທ້ອງຖິ່ນແຂວງພາກເໜືອ ແລະ ພາກກາງ ໃນໄລຍະວັນທີ 25 ຫາ 27 ເມສາ 2019 ນີ້.

ດັ່ງນັ້ນ, ຈຶ່ງແຈ້ງເຖິງອໍານາດການປົກຄອງ ແລະ ປະຊາຊົນບັນດາເຜົ່າທີ່ອາໄສຢູ່ແຂວງຫົວພັນ, ຊຽງຂວາງ, ຫຼວງພະບາງ, ໄຊຍະບູລີ, ນະຄອນຫຼວງວຽງຈັນ, ໄຊສົມບູນ, ແຂວງວຽງຈັນ, ບໍລິຄຳໄຊ, ຄຳມ່ວນ ແລະ ສະຫວັນນະເຂດ ໃຫ້ມີສະຕິລະມັດລະວັງຕໍ່ສະພາບຝົນຕົກ ຟ້າຮ້ອງ ຟ້າເຫຼື້ອມ, ໝາກເຫັບຕົກ, ຟ້າຜ່າ ແລະ ລົມພັດແຮງທີ່ອາດຈະເຮັດໃຫ້ຕົ້ນໄມ້ຫັກ, ເສົາໄຟຟ້າຫັກລົ້ມ, ຫຼັງຄາເຮືອນເປ່ເພ ພ້ອມນີ້ກໍ່ໃຫ້ຫຼີກເວັ້ນການໄປຢູ່ກ້ອງຕົ້ນໄມ້ໃຫຍ່ ຫຼື ກາງເດີ່ນທີ່ກວ້າງເພາະມີຄວາມສ່ຽງໃຫ້ເກີດຟ້າຜ່າ ແລະ ໃຫ້ຕິດຕາມຂ່າວພະຍາກອນອາກາດຈາກກົມອຸຕຸນິຍົມ ແລະ ອຸທົກກະສາດ ໃນໄລຍະ 1 ຫາ 3 ວັນຕໍ່ໜ້າ.