ອາກາດຍັງຈະຮ້ອນຂຶ້ນອີກ ຂະນະທີ່ຫຼວງພະບາງອຸນຫະພູມ 41 ອົງສາ

536

ມື້ນີ້, ຮ້ອນພິລຶກຂະນະທີ່ຫຼວງພະບາງອຸນຫະພູມສູງເຖິງ 41 ອົງສາ

ກົມອຸຕຸນິຍົມ ແລະ ອຸທົກກະສາດ ໄດ້ລາຍງານພະຍາກອນອາກາດປະຈໍາວັນທີ 20 ເມສາ 2019ວ່າ: ຄວາມກົດດັນຕໍ່າຂອງອາກາດຮ້ອນຍັງສືບຕໍ່ມີກຳລັງປານກາງປົກຄຸມຢູ່ທົ່ວທຸກພາກຂອງປະເທດລາວ ແລະ ສົມທົບກັບກະແສລົມຕາເວັນຕົກ-ຕາເວັນຕົກສ່ຽງເໜືອພັດປົກຄຸມເປັນສ່ວນໃຫຍ່. ເຊິ່ງລັກສະນະເຊັ່ນນີ້, ຈະເຮັດໃຫ້ອາກາດສືບຕໍ່ຮ້ອນ ຫາ ຮ້ອນເອົ້າ ແລະ ມີໝອກແຫ້ງປົກຫຸ້ມໃນຕອນກາງເວັນ ແລະ ຈະມີຝົນຕົກຟ້າຮ້ອງໃນລະດັບຄ່ອຍ ພ້ອມມີລົມພັດແຮງຢູ່ບາງທ້ອງຖິ່ນ.

ພາກເໜືອດ້ານຕາເວັນອອກ: ອາກາດຮ້ອນ ແລະ ມີລົມພັດແຮງຢູ່ບາງທ້ອງຖິ່ນ ອຸນຫະພູມໃນລະຫວ່າງ 20-35 ອົງສາ.

ພາກເໜືອດ້ານຕາເວັນຕົກ: ອາກາດຮ້ອນ ຫາ ຮ້ອນເອົ້າຫຼາຍ, ພ້ອມມີໝອກແຫ້ງປົກຫຸ້ມໃນຕອນກາງເວັນ ແລະ ຈະມີລົມພັດແຮງຢູ່ບາງທ້ອງຖິ່ນໃນໄລຍະຕອນບ່າຍ ຫາ ຄໍ່າ ອຸນຫະພູມໃນລະຫວ່າງ 21-40 ອົງສາ.

ພາກກາງ: ອາກາດຮ້ອນ ຫາຮ້ອນເອົ້າ ແລະ ຈະມີຝົນຕົກຟ້າເຫຼື້ອມຟ້າຮ້ອງໃນລະດັບຄ່ອຍພ້ອມມີລົມພັດແຮງຢູ່ບາງທ້ອງຖິ່ນແຂວງ ບໍລິຄຳໄຊ ແລະ ຄຳມ່ວນ ອຸນຫະພູມໃນະຫວ່າງ 26-39ອົງສາ. ສ່ວນແຂວງ ໄຊສົມບູນ ອາກາດຮ້ອນໃນຕອນບ່າຍ ແລະ ຈະມີລົມພັດແຮງເປັນບາງໂອກາດອຸນຫະພູມໃນລະຫວ່າງ 16-31 ອົງສາ.

ສ່ວນນະຄອນຫຼວງວຽງຈັນ: ອາກາດຍັງສືບຕໍ່ຮ້ອນເອົ້າ ພ້ອມມີໝອກແຫ້ງປົກຫຸ້ມໃນຕອນກາງເວັນ ແລະ ມີລົມພັດແຮງຢູ່ບາງບໍລິເວນ ອຸນຫະພູມໃນລະຫວ່າງ 26-40 ອົງສາ.

ພາກໃຕ້: ອາກາດຮ້ອນຫາຮ້ອນເອົ້າ ແລະ ຍັງຈະມີຝົນຕົກຟ້າຮ້ອງຟ້າເຫຼື້ອມ ພ້ອມມີລົມພັດແຮງເປັນບາງໂອກາດຢູ່ບາງທ້ອງຖິ່ນຕື່ມອີກ ອຸນຫະພູມໃນລະຫວ່າງ 26-38 ອົງສາ. ສຳລັບເຂດພູພຽງບໍລິເວນ ຍັງຈະມີຝົນຕົກໃນລະດັບຄ່ອຍ ອຸນຫະພູມໃນລະຫວ່າງ 16-30 ອົງສາ.