ລະວັງ ພາຍຸລະດຸຮ້ອນໃນໄລຍະຕົ້ນອາທິດນີ້

419

ຄໍາເຕືອນ: ໃນໄລຍະວັນທີ່ 01-03 ເມສາ 2019 ຄວາມກົດດັນສູງຂອງອາກາດເຢັນຈາກປະເທດຈີນຍັງຈະມີກຳລັງອ່ອນປົກຄຸມຢູ່ພາກເໜຶອຂອງປະເທດລາວ, ສົມທົບກັບກະແສລົມຕາເວັນຕົກພັດປົກຄຸມເປັນສ່ວນໃຫຍ່, ສ່ວນພາກກາງ ພາ ພາກໃຕ້ ຄວາມກົດດັນຕໍ່າຂອງອາກາດຮ້ອນຍັງປົກຄຸມ ແລະ ລົມຕາເວັນອອກສ່ຽງໃຕ້ພັດປົກຄຸມ, ເຊິ່ງຈະເຮັດໃຫ້ມີພະຍຸລະດູຮ້ອນເກີດຂື້ນຢູ່ບາງທ້ອງຖິ່ນໃນແຕ່ລະພາກ. ດັ່ງນັ້ນ ຈື່ງຂໍແຈ້ງເຕືອນປະຊາຊົນບັນດາເຜົ່າ ຈົ່ງມີສະຕິຕໍ່ສະພາບອາກາດທີ່ຈະເກີດຂື້ນໃນໄລຍະຕົ້ນອາທິດ ແລະ ໃຫ້ຕິດຕາມຂ່າວພະຍາກອນອາກາດຈາກກົມອຸຕຸນິຍົມ ແລະ ອຸທົກກະສາດເປັນປະຈຳ.

ກົມອຸຕຸນິຍົມ ແລະ ອຸທົກກະສາດໄດ້ອອກບົດລາຍງານຄາດຄະເນສະພາບອາກາດ ສະບັບເລກທີ0437 / ກອຕທ ລົງວັນທີ 01/04/2019 ໃຫ້ຮູ້ວ່າ: ໃນໄລຍະຕົ້ນອາທິດ ແຕ່ວັນທີ 01-03 ເມສາ 2019
ຄວາມກົດດັນສູງຂອງອາກາດເຢັນທີ່ມີກຳລັງອ່ອນ ຍັງຈະສືບຕໍ່ປົກຄຸມຢູ່ທົ່ວທຸກພາກຂອງປະເທດລາວ, ສົມທົບກັບກະແສລົມຕາເວັນຕົກພັດປົກຄຸມຢູ່ພາກເໜືອ ແລະ ລົມຕາເວັນຕົກສ່ຽງໃຕ້ ພັດປົກຄຸມພາກກາງ ແລະ ພາກໃຕ້ ເປັນສ່ວນໃຫຍ່ ເຊິ່ງຈະເຮັດໃຫ້ອາກາດເຢັນພ້ອມມີໝອກບາງປົກຫຸ້ມໃນຕອນເຊົ້າ ໂດຍສະເພາະຢູ່ແຂວງພາກເໜືອ ແລະ ຈະມີຝົນຕົກ ຟ້າຮ້ອງ ຟ້າເຫຼື້ອມ ໃນລະດັບຄ່ອຍຢູ່ບາງທ້ອງຖິ່ນໃນແຕ່ລະພາກ ພ້ອມຈະມີລົມພັດແຮງເປັນບາງໂອກາດ. ຈາກນັ້ນ ວັນທີ 04-07 ເມສາ 2019 ຄວາມກົດດັນຕໍ່າຂອງອາກາດຮ້ອນຍັງຈະປົກຄຸມຢູ່ທົ່ວທຸກພາກຂອງປະເທດລາວ ດ້ວຍກຳລັງອ່ອນ ຫາ ປານກາງ, ເຊິ່ງຈະເຮັດໃຫ້ອາກາດຮ້ອນຂື້ນໃນຕອນບ່າຍ ພ້ອມມີໝອກແຫ້ງປົກຫຸ້ມຢູ່ແຕ່ລະພາກ ແລະ ຈະມີຝົນຕົກ ຟ້າຮ້ອງ ຟ້າເຫຼື້ອມໃນລະດັບຄ່ອຍ ແລະ ຕົກປານກາງພ້ອມມີລົມພັດແຮງຢູ່ບາງທ້ອງຖິ່ນໃນຕອນບ່າຍ ຫາ ຄໍ່າຢູ່ແຂວງພາກເໜືອດ້ານຕາເວັນຕົກ ລົງຫາພາກກາງ ແລະ ພາກໃຕ້.

ພາກເໜຶອດ້ານຕາເວັນອອກ: ໃນໄລຍະວັນທີ 01-05 ເມສາ 2019 ໂດຍທົ່ວໄປ ອາກາດເຢັນໃນຕອນກາງຄືນ ຫາ ຕອນເຊົ້າ ແລະ ຈະມີຝົນຕົກ ຟ້າຮ້ອງ ຟ້າເຫຼື້ອມໃນລະດັບຄ່ອຍ ພ້ອມມີລົມພັດແຮງຢູ່ບາງທ້ອງຖິ່ນ ແຂວງຜົ້ງສາລີ, ຫົວພັນ ແລະ ຊຽງຊວາງ. ຈາກນັ້ນວັນທີ 06-07 ເມສາ 2019 ອາກາດຈະຮ້ອນຂື້ນໃນຕອນບ່າຍ. ອຸນຫະພູມຕໍ່າສຸດ 16-18 ອົງສາ ແລະ ສູງສຸດ 28-30​ອົງສາ.

ພາກເໜຶອດ້ານຕາເວັນຕົກ: ໃນໄລຍະວັນທີ 01-05 ເມສາ 2019 ອາກາດເຢັນ ພ້ອມມີໝອກບາງປົກຫຸ້ມນຕອນເຊົ້າ, ຈະມີຝົນຕົກ ຟ້າຮ້ອງ ຟ້າເຫຼື້ອມໃນລະດັບຄ່ອຍຢູ່ທົ່ວໄປ ແລະ ຕົກປານກາງຢູ່ບາງທ້ອງຖິ່ນແຂວງຫຼວງນໍ້າທາ, ຫຼວງພະບາງ ແລະ ໄຊຍະບູລີ. ຈາກນັ້ນວັນທີ 06-07 ເມສາ 2019 ໂດຍທົ່ວໄປອາກາດຈະຮ້ອນຂື້ນໃນຕອນບ່າຍພ້ອມຈະມີໝອກແຫ້ງປົກຫຸ້ມໃນຕອນກາງເວັນ ແລະ ຈະມີລົມພັດແຮງເປັນບາງໂອກາດໃນຕອນບ່າຍຫາຄໍ່າ. ອຸນຫະພູມຕໍ່າສຸກ 16-18 ອົງສາ ແລະ ສູງສຸດ 35-37 ອົງສາ.

ພາກກາງ: ໃນໄລຍະວັນທີ 01-07 ເມສາ 2019 ມີເຝື້ອປົກຄຸມເປັນສ່ວນຫຼາຍ, ອາກາດຮ້ອນໃນໄລຍະຕອນບ່າຍ, ຈະມີຝົນຕົກຟ້າຮ້ອງຟ້າເຫຼື້ອມໃນລະດັບຄ່ອຍຢູ່ທົ່ວໄປ ແລະ ຕົກໃນລະດັບປານກາງ ຢູ່ບາງທ້ອງຖິ່ນແຂວງຄຳມ່ວນ ແລະ ສະຫວັນນະເຂດ ພ້ອມມີລົມພັດແຮງເປັນບາງໂອກາດ. ອຸນຫະພູມຕໍ່າສຸດ 22-24​ ອົງສາ ແລະ ສູງສຸດ 35-37 ອົງສາ

ພາກໃຕ້: ໃນໄລຍະວັນທີ 01-07 ເມສາ 2019 ອາກາດຮ້ອນໃນຕອນບ່າຍ ພ້ອມມີໝອກແຫ້ງປົກຫຸ້ມຢູ່ທົ່ວໄປໃນຕອນກາງເວັນ ແລະ ຈະມີຝົນຕົກ ຟ້າຮ້ອງ ໃນລະດັບຄ່ອຍ ພ້ອມລົມພັດແຮງຢູ່ບາງທ້ອງຖິ່ນແຂວງສາລະວັນ ແລະ ຈຳປາສັກ, ເຊກອງ ແລະ ອັດຕະປື. ອຸນຫະພູມຕໍ່າສຸດ 22-24 ອົງສາ ແລະ ສູງສຸດ 36-38 ອົງສາ.

ນະຄອນຫຼວງວຽງຈັນ: ໃນໄລຍະວັນທີ 01-07 ເມສາ 2019 ອາກາດຮ້ອນໃນໄລຍະຕອນບ່າຍ ພ້ອມມີໝອກແຫ້ງປົກຫຸ້ມໃນຕອນເຊົ້າ ແລະ ຈະມີຝົນຕົກ ຟ້າຮ້ອງ ຟ້າເຫຼື້ອມໃນລະດັບຄ່ອຍຢູ່ບາງບໍລິເວນ ພ້ອມມີລົມພັດແຮງເປັນບາງໂອກາດໃນທ້າຍຕອນບ່າຍ ຫາ ກາງຄືນ. ອຸນຫະພູມຕໍ່າສຸດ 23-25 ອົງສາ ແລະ ສູງສຸດ 35-37 ອົງສາ.