ວັນທີ04-06 ມີນາ 2019 ຈະມີຝົນຕົກ ຟ້າຮ້ອງ ຟ້າເຫຼື້ອມ ແລະ ໝາກເຫັບຕົກ ຢູ່ບາງທ້ອງຖິ່ນໃນແຕ່ລະພາກ

306

ຄຳເຕືອນ: ໃນໄລຍະວັນທີ 04-06 ມີນາ 2019 ກະແສລົມຕາເວັນຕົກ-ຕາເວັນຕົກສ່ຽງໃຕ້ຈະພັດປົກຄຸມດ້ວຍກຳລັງປານກາງ, ເຊິ່ງຈະເຮັດໃຫ້ມີຝົນຕົກ, ຟ້າຮ້ອງ, ຟ້າເຫຼື້ອມ, ໝາກເຫັບຕົກ ພ້ອມມີລົມພັດແຮງຢູ່ບາງທ້ອງຖິ່ນໃນແຕ່ລະພາກ, ດັ່ງນັ້ນ ຈື່ງແຈ້ງເຕືອນປະຊາຊົນບັນດາເຜົ່າ, ຈົ່ງມີສະຕິຕໍ່ສະພາບອາກາດທີ່ຈະເກີດຂື້ນໃນໄລຍະໜື່ງອາທີດຕໍ່ໜ້າ ແລະ ໃຫ້ຕິດຕາມຂ່າວພະຍາກອນອາກາດ ຈາກກົມອຸຕຸນິຍົມ ແລະ ອຸທົກກະສາດ.

ກົມອຸຕຸນິຍົມ ແລະ ອຸທົກກະສາດໄດ້ອອກບົດລາຍງານສະພາບອາກາດໃນໄລຍະຄາດຄະເນ ແຕ່ວັນທີ 04-10 ມີນາ 2019 ສະບັບເລກທີ 0315/ກອຕທ ລົງວັນທີ 04 ມີນາ 2019. ໃນໄລຍະໜື່ງອາທິດຕໍ່ໜ້າ ໄລຍະວັນທີ 04-10 ມີນາ 2019 ຄວາມກົດດັນສູງຂອງອາກາດໜາວເຢັນທີ່ມີກຳລັງອ່ອນຍັງຈະປົກຄຸມຢູ່ພາກເໜືອທາງດ້ານຕາເວັນອອກຂອງປະເທດລາວ, ສ່ວນພາກເໜືອດ້ານຕາເວັນຕົກ ລົງຫາ ພາກກາງ ແລະ ພາກໃຕ້ ປົກຄຸມດ້ວຍບໍລິເວນຄວາມກົດດັນຕໍ່າຂອງອາກາດຮ້ອນ, ສົມທົບກັບກະແສລົມຕາເວັນຕົກ – ຕາເວັນຕົກສ່ຽງໃຕ້ພັດປົກຄຸມ, ເຊິ່ງຈະເຮັດໃຫ້ອາກາດຮ້ອນຂື້ນໃນຕອນບ່າຍຢູ່ໃນແຕ່ລະພາກ, ແຕ່ອາກາດຍັງເຢັນໃນຕອນກາງຄືນ ຫາ ຕອນເຊົ້າພ້ອມມີໝອກບາງປົກຫຸ້ມໂດຍສະເພາະແຂວງພາກເໜືອ, ແຂວງໄຊສົມບູນ ແລະ ເຂດພູພຽງບໍລະເວນ ແລະ ໃນໄລຍະວັນທີ 04-05 ມີນາ 2019ຈະມີຝົນຕົກຟ້າຮ້ອງ, ຟ້າເຫຼື້ຶອມໃນລະດັບຄ່ອຍຢູ່ບາງທ້ອງຖິ່ນ ພ້ອມມີລົມພັດແຮງຢູ່ບາງທ້ອງຖິ່ນ ແຂວງພາກເໜືອດ້ານຕາເວັນອອກລົງ ຫາ ພາກກາງ ແລະ ພາກໃຕ້.

ພາກເໜືອດ້ານຕາເວັນອອກ: ໃນໄລຍະວັນທີ 04-08 ມີນາ 2019 ໂດຍທົ່ວໄປ ອາກາດຍັງເຢັນໃນຕອນກາງຄືນ ຫາ ຕອນເຊົ້າ ແລະ ຈະມີຝົນຕົກໃນລະດັບຄ່ອຍຢູ່ບາງທ້ອງຖິ່ນແຂວງຜົ້ງສາລີ, ແຂວງຫົວພັນ ແລະ ແຂວງຊຽງຂວາງ ພ້ອມມີລົມພັດແຮງເປັນບາງໂອກາດ. ຈາກນັ້ນ ວັນທີ 09-10 ມີນາ 2019 ອຸນຫະພູມອາກາດຈະຮ້ອນຂື້ນໃນຕອນບ່າຍ. ອຸນຫະພູມຕໍ່າສຸດຢູ່ທີ 14-16 ອົງສາ ແລະ ສູງສຸດ 29-31 ອົງສາ.

ພາກເໜຶອດ້ານຕາເວັນຕົກ: ໃນໄລຍະວັນທີ 04-07 ມີນາ ​2019 ອາກາດຈະເຢັນໃນຕອນກາງຄືນ ຫາ ຕອນເຊົ້າ ແລະ ໃນຕອນບ່າຍອາກາດຈະຮ້ອນຂື້ນ, ໃນໄລຍະວັນທີ 08-10 ມີນາ 2019 ຈະມີຝົນຕົກ, ຟ້າຮ້ອງ, ຟ້າເຫຼື້ອມ ໃນລະດັບຄ່ອຍພ້ອມມີລົມພັດແຮງຢູ່ທ້ອງຖິ່ນ ແຂວງອຸດົມໄຊ, ບໍ່ແກ້ວ, ຫຼວງນໍ້າທາ, ຫຼວງພະບາງ ແລະ ໄຊຍະບູລີ. ອຸນຫະພູມຕໍ່າສຸດ 15-17 ອົງສາ ແລະ ສູງສຸດ 33-35 ອົງສາ.

ພາກກາງ: ໃນໄລຍະວັນທີ 04-05 ມີນາ 2019 ຈະມີຝົນຕົກຟ້າຮ້ອງໃນລະດັບຄ່ອຍຢູ່ເກືອບທົ່ວໄປ ແລະ ຝົນຕົກປານກາງຢູ່ບາງທ້ອງຖິ່ນ ແຂວງບໍລິຄຳໄຊ, ແຂວງຄຳມ່ວນ ແລະ ແຂວງສະຫວັນນະເຂດ ພ້ອມມີລົມພັດແຮງຢູ່ບາງທ້ອງຖິ່ນ. ຈາກນັ້ນວັນທີ 06-10 ມີນາ 2019 ອາກາດຈະຮ້ອນໃນໄລຍະຕອນບ່າຍ. ອຸນຫະພູມຕໍ່າສຸດ 22-24 ອົງສາ ແລະສູງສຸດ 34-36 ອົງສາ.

ພາກໃຕ້:  ໃນໄລຍະວັນທີ 04-05 ມີນາ 2019, ຈະມີຝົນຕົກຟ້າຮ້ອງ ຟ້າເຫຼື້ອມໃນລະດັບຄ່ອຍຢູ່ບາງທ້ອງຖິ່ນແຂວງສາລະວັນ ແລະ ຈຳປາສັກ ພ້ອມມີລົມພັດແຮງເປັນບາງໂອກາດ. ຈາກນັ້ນໃນວັນທີ 06-10 ມີນາ 2019 ອາກາດຈະຮ້ອນຂື້ນໃນຕອນບ່າຍ. ອຸນຫະພູມຕໍ່າສຸດ 23-25 ອົງສາ ແລະ ສູງສຸດ 35-37 ອົງສາ.

ຂໍ້ມູນຈາກ: ກົມອຸຕຸນິຍົມ ແລະ ອຸທົກກະສາດ