ກຽມຮັບມືພາຍຸລະດູຮ້ອນ!! ໃນວັນທີ 28-31ມີນາຈະມີຝົນຕົກ ຢູ່ທົ່ວທຸກພາກຂອງປະເທດລາວ

312

ໃນໄລຍະວັນທີ 28-31 ມີນາ 2019 ຄວາມກົດດັນສູງຂອງອາກາດເຢັນຈາກປະເທດຈີນຈະມີກຳລັງອ່ອນປົກຄຸມຢູ່ທົ່ວທຸກພາກຂອງປະເທດລາວສົມທົບກັບກະແສລົມຕາເວັນຕົກ-ຕາເວັນຕົກສ່ຽງໃຕ້ ພັດປົກຄຸມເປັນສ່ວນໃຫຍ່,ເຊິ່ງຈະເຮັດໃຫ້ມີຝົນຕົກ ຟ້າຮ້ອງ ຟ້າເຫຼື້ອມພ້ອມມີລົມພັດແຮງຢູ່ບາງທ້ອງຖິ່ນໃນແຕ່ະພາກ. ດັ່ງນັ້ນ, ຈື່ງແຈ້ງເຕືອນເຖິງປະຊາຊົນບັນດາເຜົ່າ,ຈົ່ງມີສະຕິຕໍ່ສະພາບອາກາດທີ່ຈະເກີດຂື້ນໃນໜື່ງອາທິດຕໍ່ໜ້າ ແລະ ໃຫ້ຕິດຕາມຂ່າວພະຍາກອນອາກາດຈາກກົມອຸຕຸນິຍົມ ແລະ ອຸທົກກະສາດເປັນປະຈຳ.

ກົມອຸຕຸນິຍົມ ແລະ ອຸທົກກະສາດໄດ້ອອກບົດລາຍງານຄາດຄະເນສະພາບອາກາດ ສະບັບເລກທີ 0409 ລົງວັນທີ25 ມີນາ 2019. ໃນໄລຍະໜື່ງອາທິດຕໍ່ໜ້າ ວັນທີ 25-31 ມີນາ 2019ບໍລິເວນຄວາມກົດດັນຕໍ່າຂອງກາດຮ້ອນທີ່ມີກຳລັງອ່ອນ ຫາ ປານກາງຍັງຈະສືບຕໍ່ປົກຄຸມຢູ່ທົ່ວທຸກພາກຂອງປະເທດລາວ, ສົມທົບກັບກະແສລົມຕາເວັນຕົກ -ຕາເວັນຕົກສ່ຽງໃຕ້ພັດປົກຄຸມເປັນສ່ວນໃຫຍ່, ເຊິ່ງຈະເຮັດໃຫ້ອາກາດໂດຍທົ່ວໄປຮ້ອນຂື້ນໃນຕອນບ່າຍໃນແຕ່ລະພາກ ແລະ ຈະມີຝົນຕົກ ຟ້າຮ້ອງ ຟ້າເຫຼື້ອມ ໃນລະດັບຄ່ອຍ ແລະ ຕົກປານກາງ ພ້ອມມີລົມພັດແຮງຢູ່ບາງທ້ອງຖິ່ນໃນຕອນບ່າຍຫາຄໍ່າ ແຂວງພາກກາງ ຫາ ພາກໃຕ້.

ພາກເໜຶອດ້ານຕາເວັນອອກ: ໃນໄລຍະວັນທີ 25-27 ມີນາ 2019ໂດຍທົ່ວໄປ ອາກາດເຢັນໃນຕອນກາງຄືນ ຫາ ຕອນເຊົ້າ ແລະ ໃນຕອນບ່າຍ ຫາ ຄໍ່າອາກາດຈະຮ້ອນຂື້ນ. ຈາກນັ້ນ ວັນທີ 28 -31 ມີນາ 2019 ຈະມີຝົນຕົກ ຟ້າຮ້ອງຟ້າເຫຼື້ອມໃນລະດັບຄ່ອຍ ພ້ອມມີລົມພັດແຮງຢູ່ບາງທ້ອງຖິ່ນແຂວງຜົ້ງສາລີ, ຫົວພັນ ແລະ ຊຽງຂວາງ. ອຸນຫະພູມຕໍ່າສຸດ 17-19 ອົງສາ ແລະ ສູງສຸດ 28-30 ອົງສາ.

ພາກເໜຶອດ້ານຕາເວັນຕົກ: ໃນໄລຍະວັນທີ 25-27 ມີນາ 2019 ອາກາດເຢັນໃນຕອນເຊົ້າພ້ອມມີໝອກບາງປົກຫຸ້ມໃນຕອນເຊົ້າ, ສ່ວນໃນຕອນບ່າຍອາກາດຈະຮ້ອນຂື້ນພ້ອມມີໝອກແຫ້ງປົກຫຸ້ມຢູ່ທົ່ວໄປ. ຈາກນັ້ນວັນທີ 28-31 ມີນາ 2019 ຈະມີຝົນຕົກ ຟ້າຮ້ອງ ຟ້າເຫຼື້ອມ ໃນລະດັບຄ່ອຍ ແລະ ຕົກປານກາງເປັນບາງໂອກາດ. ອຸນຫະພູມຕໍ່າສຸດ 17-19 ອົງສາ ແລະ ສູງສຸດ 35-37 ອົງສາ.

ພາກກາງ: ໃນໄລຍະວັນທີ 25-27 ມີນາ 2019ອາກາດຈະຮ້ອນຂື້ນໃນໄລຍະຕອນບ່າຍ. ຈາກນັ້ນວັນທີ 28-31 ມີນາ 2019ອາກາດສືບຕໍ່ຮ້ອນໃນໄລຍະຕອນບ່າຍ ແລະ ຈະມີຝົນຕົກ ຟ້າຮ້ອງ ຟ້າເຫຼື້ອມໃນລະດັບຄ່ອຍຢູ່ທົ່ວໄປ ແລະ ຕົກລະດັບປານກາງ ຢູ່ບາງທ້ອງຖິ່ນແຂວງວຽງຈັນ, ບໍລິຄຳໄຊ,ຄຳມ່ວນ ແລະ ສະຫວັນນະເຂດ ພ້ອມມີລົມພັດແຮງເປັນບາງໂອກາດ. ອຸນຫະພູມຕໍ່າສຸດ 22-24​ອົງສາ ແລະ ສູງສຸດ 35-37 ອົງສາ.

ພາກໃຕ້: ໃນໄລຍະວັນທີ 25-27 ມີນາ 2019, ອາກາດຮ້ອນພ້ອມມີໝອກແຫ້ງປົກຫຸ້ມຢູ່ທົ່ວໄປໃນຕອນກາງເວັນ ແລະ ຈະມີຝົນຕົກ ຟ້າຮ້ອງພ້ອມມີລົມພັດແຮງຢູ່ບາງທ້ອງຖິ່ນ. ຈາກນັ້ນໃນວັນທີ 28-31 ມີນາ 2019 ອາກາດຍັງສືບຕໍ່ຮ້ອນ ຈະມີຝົນຕົກ ຟ້າຮ້ອງ ຟ້າເຫຼື້ອມ ໃນລະດັບຄ່ອຍຢູ່ບາງທ້ອງຖິ່ນແຂວງ ສາລະວັນ ແລະ ຈຳປາສັກ, ເຊກອງ ແລະ ອັດຕະປື. ອຸນຫະພູມຕໍ່າສຸດ 22-24 ອົງສາ ແລະ ສູງສຸດ 36-38 ອົງສາ.

ຂໍ້ມູນຈາກ: ກົມອຸຕຸນິຍົມ ແລະ ອຸທົກກະສາດ