ຍັງຈະມີຝົນຕົກ ຟ້າຮ້ອງ ຟ້າເຫຼື້ອມຢູ່ບາງທ້ອງຖິ່ນ ໃນທົ່ວທຸກພາກຂອງປະເທດລາວ

553

ກົມອຸຕຸນິຍົມ ແລະ ອຸທົກກະສາດໃຫ້ຮູ້ວ່າ: ສະພາບອາກາດໂດຍທົ່ວໄປລວມເວລາ 7:00 ໂມງຂອງວັນທີ 20/03/2019. ບໍລິເວນຄວາມກົດດັນຕໍາຂອງອາກາດຮ້ອນຍັງປົກຄຸມຢູ່ທົ່ວທຸກພາກຂອງປະເທດລາວດ້ວຍກຳລັງປານກາງ ແລະ ສົມທົບກັບສອງກະແສລົມຕາເວັນຕົກພັດປົກຄຸມພາກເໜືອ ແລະ ກະແສລົມຕາເວັນຕົກສ່ຽງໃຕ້ພັດປົກຄຸມພາກກາງ ຫາ ພາກໃຕ້, ເຊິ່ງລັກສະນະເຊັ່ນນີ້ຈະເຮັດໃຫ້ມີຝົນຕົກ ຟ້າຮ້ອງ ຟ້າເຫຼື້ອມ ພ້ອມມີລົມພັດແຮງຢູ່ບາງທ້ອງຖິ່ນແຂວງພາກກາງ ແລະ ພາກໃຕ້ ແລະອາກາດຍັງຮ້ອນ ຫາ ຮ້ອນເອົ້າ.

ສຳຫຼັບຄ່າຝຸ່ນລະອອງທີ່ມີຂະໜາດ 2.5 ໄມຄຼອນ ຫຼື PM 2.5 ຄ່າສູງສຸດແມ່ນ ເວລາ 07:00 ໂມງເຊົ້າ ແມ່ນ 63.5 ໄມໂຄກຼາມຕໍ່ແມັດກ້ອນ ຊຶ່ງເຫັນວ່າການຈັດລະດັບຄຸນນະພາບຂອງອາກາດ ທີ່ມີຜົນຕໍ່ສຸຂະພາບ ໃນຕອນເຊົ້້າຂອງມື້ນີ້ສະເລ່ຍຖືວ່າຫຼຸດລົງຫຼາຍແລ້ວ.

ພາກເໜຶອດ້ານຕາເວັນອອກ: ອາກາດເຢັນພ້ອມມີໝອກບາງປົກຫຸ້ມໃນຕອນເຊົ້າ ແລະ ຈະມີຝົນຕົກຟ້າຮ້ອງໃນລະດັບຄ່ອຍ ພ້ອມມີລົມພັດແຮງເປັນບາງໂອກາດຢູ່ບາງທ້ອງຖິ່ນ ແຂວງຫົວພັນ ແລະ ແຂວງຊຽງຂວາງ. ອຸນຫະພູມໃນລະຫວ່າງ 15-29 ອົງສາ.

ພາກເໜຶອດ້ານຕາເວັນຕົກ: ອາກາດເຢັນໃນຕອນເຊົ້າ, ພ້ອມມີໝອກບາງປົກຫຸ້ມ, ສ່ວນໃນຕອນບ່າຍອາກາດຮ້ອນ ພ້ອມມີລົມພັດແຮງຢູ່ບາງທ້ອງຖິ່ນ. ອຸນຫະພູມໃນລະຫວ່າງ 15-35 ອົງສາ.

ພາກກາງ: ອາກາດຮ້ອນ ພ້ອມຈະມີຝົນຕົກຟ້າຮ້ອງ ໃນລະດັບຄ່ອຍ ພ້ອມມີລົມພັດແຮງເປັນບາງໂອກາດຢູ່ບາງທ້ອງຖິ່ນ ແຂວງວຽງຈັນ, ແຂວງ ບໍລິຄຳໄຊ ແລະ ແຂວງຄຳມ່ວນ. ອຸນຫະພູມໃນລະຫວ່າງ 23-36 ອົງສາ.

ພາກໃຕ້: ອາກາດຮ້ອນ ຫາ ຮ້ອນເອົ້າ ພ້ອມມີໝອກແຫ້ງປົກຫຸ້ມຢູ່ທົ່ວໄປໃນຕອນກາງເວັນ ແລະ ຈະມີຝົນຕົກຟ້າຮ້ອງ ຟ້າເຫຼື້ອມໃນລະດັບຄ່ອຍ. ອຸນຫະພູມໃນລະຫວ່າງ 19-38 ອົງສາ.

ຂໍ້ມູນຈາກ: ກົມອຸຕຸນິຍົມ ແລະ ອຸທົກກະສາດ