ບໍລິສັດ ເອໄອດີຊີ ໂລຈິສຕິກ ຈຳກັດຜູ້ດຽວເປີດໃຫ້ບໍລິການຂົນສົ່ງ ຢູ່ແຂວງຄຳມ່ວນ

232

ບໍລິສັດ ເອໄອດີຊີ ໂລຈິສຕິກ ຈຳກັດຜູ້ດຽວ ເປີດບໍລິການຂົນສົ່ງພາກໃຕ້ ແຂວງຄຳມ່ວນ ໃນວັນທີ 2 ຕຸລາ 2021 ຢູ່ທາງເຂົ້າຂົວມິດຕະພາບ ແຫ່ງທີ 3 (ຄຳມ່ວນ-ນະຄອນພະນົມ) ເມືອງທ່າແຂກ ໂດຍມີ ທ່ານ ວັນໄຊ ພອງສະຫັວນ ເຈົ້າແຂວງຄຳມ່ວນ, ມີການນຳແຂວງ, ເມືອງ ແລະ ພາກສ່ວນກ່ຽວຂ້ອງ ເຂົ້າຮ່ວມ.


ທ່ານ ພຶດສະພາ ພູມມະສັກ ປະທານ ບໍລິສັດ ເອໄອດີຊີ ໂລຈິສຕິກ ຈຳກັດຜູ້ດຽວ ໄດ້ໃຫ້ຮູ້ວ່າ: ບໍລິສັດ ເອໄອດີຊີ ໂລຈິສຕິກ ຈໍາກັດ ຜູ້ດຽວ ໄດ້ເລີ່ມເຄື່ອນໄຫວບໍລິການຂົນສົ່ງ ມາແຕ່ເດືອນ 3 ປີ 2021 ຢູ່ແຂວງຈໍາປາສັກ ແລະ ແຂວງບໍລິຄໍາໄຊ ເຊິ່ງຢູ່ບໍລິຄໍາໄຊແມ່ນໄດ້ບໍລິການຂົນສົ່ງແຮ່ເຫລັກ ແລະ ບໍລິສັດເຫັນວ່າແຂວງຄໍາມ່ວນ ເປັນແຂວງທີ່ມີກໍາລັງແຮງ ແລະ ເປັນທາງເຊື່ອມຈອດ ກັບປະເທດອ້ອມຂ້າງ ເປັນຕົ້ນ ປະເທດໄທ ແລະ ສສຫວຽດນາມ, ເຊິ່ງເປັນຈຸດທີ່ສໍາຄັນໃນການຂໍ້ຕໍ່ຍອດໄປ ສູ່ສະຖານນີລົດໄຟລາວ-ຈີນ, ດັ່ງນັ້ນ, ພວກເຮົາຈຶ່ງຕັດສິນໃຈມາຂະຫຍາຍທຸລະກິດຢູ່ແຂວງຄໍາມ່ວນ ຕື່ມອີກ.


ສຳລັບການບໍລິການຂົນສົ່ງປັດຈຸບັນ, ແມ່ນຮັບຂົນສົ່ງໃນທຸລະກິດຊື້-ຂາຍມັນ ຕົ້ນແຫ້ງ, ກຸ່ມລູກຄ້າຜະລິດແຮ່, ກຸ່ມລູກຄ້າກະສິກໍາເຊັ່ນ: ກ້ວຍ, ໝາກໄມ້ຕາມລະດູການ ແລະ ກຸ່ມລູກຄ້າຜູ້ຜະລິດ ແລະ ແປຮູບສິນຄ້າກະສິກໍາ ເປັນຕົ້ນ ແມ່ນນໍ້າຕານ ໂດຍຮູບແບບການຂົນສົ່ງຈະເປັນແບບຄວບຄຸມອຸນຫະພູມຄວາມເຢັນ ແລະ ບໍ່ຄວບຄຸມອຸນນະພູມຄວາມເຢັນ ຂຶ້ນກັບປະເພດສິນຄ້າ ໂດຍເນັ້ນການຂົນສົ່ງພາຍໃນປະເທດເປັນຫລັກ ຕາມແຕ່ປະເພດສິນຄ້າຂອງແຕ່ລະແຂວງ, ເຊິ່ງຜ່ານມາ, ບໍລິສັດ ເອໄອດີຊີ ໂລຈິສຕິກ ຈຳກັດຜູ້ດຽວໄດ້ບໍລິການຂົນ ສົ່ງຢູ່ 4 ແຂວງຄື: ບໍລິຄໍາໄຊ (ທ່າບົກ) ຂົນສົ່ງປະເພດແຮ່ເຫລັກຕ່າງໆ, ແຂວງຈໍາປາສັກ ຂົນສົ່ງມັນຕົ້ນ, ແຂວງສາລະວັນ ຂົນສົ່ງກ້ວຍ ແລະ ແຂວງຄໍາມ່ວນຂົນສົ່ງປະເພດສິນຄ້າໃຊ້ສອຍຕ່າງໆເຊັ່ນ: ເສື້ອຜ້າ, ເຄື່ອງຫລິ້ນຈາກ ສປ ຈີນ, ຜ້າແພ, ນໍ້າຢາປັບຜ້ານຸ່ມ ແລະ ຂົນສົ່ງປະເພດກະສິກໍາ ເຊັ່ນ: ໝາກລໍາໄຍ, ໝາກໝີ້, ຖົ່ວລຽນ, ໝາກມັງຄຸດ, ຫອມແດງ ແລະ ອື່ນໆ.


ທ່ານ ພຶດສະພາ ພູມມະສັກ ຍັງໃຫ້ຮູ້ອີກວ່າ: ໃນຕໍ່ໜ້າບໍລິສັດມີແຜນຈະຂະ ຫຍາຍການຂົນສົ່ງພາຍໃນປະເທດ ໄປສູ່ການຂົນສົ່ງຂ້າມແດນ(Cross Border) ທີ່ເປັນທຸລະກິດກ່ຽວກັບການນໍາເຂົ້າ ແລະ ສົ່ງອອກ, ຈະມີການລົງທຶນສ້າງບ່ອນພັກຕູ້ຄອນເທນເນີແບບແຫ້ງ, ແບບໃຫ້ຄວາມເຢັນທັງໃນ ແລະ ຕ່າງປະເທດ, ໃນອະນາຄົດຈະກາຍເປັນສູນກາງ ການຂົນສົ່ງຄົບວົງຈອນ (Logistics Hup) ໂດຍການລົງທຶນເຮັດສາງກະຈາຍສິນຄ້າທັງພາຍໃນ ແລະ ຕ່າງປະເທດ ເພື່ອຕອບສະໜອງຄວາມຕ້ອງການທາງທຸລະກິດ ລູກຄ້າທີ່ຕ້ອງການຄວາມວ່ອງໄວ ແລະ ປອດໄພ, ສ້າງສູນເກັບສິນຄ້າ ຫລື ບ່ອນຄຽນຖ່າຍສິນຄ້າ ແລະ ອື່ນໆ.
ໃນໂອກາດນີ້, ທ່ານ ວັນໄຊ ພອງສະຫັວນ ໄດ້ສະແດງຄວາມຍ້ອງຍໍຊົມເຊີຍ ຍັງບໍລິສັດດັ່ງກ່າວ ທີ່ເລັງເຫັນຄວາມສຳຄັນໃນວຽກງານຂົນສົ່ງ ຢູ່ແຂວງຄຳມ່ວນ, ເຮັດໃຫ້ແຂວງມີໃບໜ້າໃໝ່ ໂດຍໄດ້ສ້າງ ແລະ ອຳນວຍຄວາມສະດວກໃນການຂົນສົ່ງ ພາຍໃນ ແລະ ຕ່າງປະເທດ ໃຫ້ພຽງພໍກັບຄວາມຕ້ອງການໃນການບໍລິການຂົນສົ່ງໃຫ້ຫລາຍຂື້ນ, ທັງເປັນການປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຂອງແຂວງຄຳມ່ວນ ຕື່ມອີກ.