ພະແນກ ພວຕ ແຂວງຈໍາປາສັກ ສໍາເລັດການດໍາເນີນກອງປະຊຸມໃຫຍ່ຄັ້ງທີ III

474

ໜ່ວຍພັກຮາກຖານພະແນກວິທະຍາສາດ ແລະ ເຕັກໂນໂລຊີ ແຂວງຈໍາປາສັກ ໄດ້ຈັດກອງປະຊຸມໃຫຍ່ຄັ້ງທີ III ຂຶ້ນຢ່າງເປັນທາງການ ໃຫ້ກຽດເຂົ້າຮ່ວມຂອງສະຫາຍ ໜູຈັນ ຈັນທະພົງ ປະທານກວດກາພັກແຂວງ, ສະຫາຍ ສີເລືອງ ສັກຂັນ ຮອງຫົວໜ້າຄະນະຈັດຕັ້ງແຂວງ, ມີຄະນະຮັບຜິດຊອບບຸກຄະລາກອນຂັ້ນແຂວງ, ຄະນະໜ່ວຍພັກ ແລະ ສະມາຊິກພັກສົມບູນ, ສໍາຮອງ ແລະ ມະຫາຊົນກ້າວໜ້າເຂົ້າຮ່ວມ.

ກອງປະຊຸມໄດ້ສະຫຼຸບຕີລາຄາການນໍາພາຈັດຕັ້ງປະຕິບັດມະຕິຂອງໜ່ວຍພັກໃນຊຸມປີຜ່ານມາ(2015-2019) ເຊິ່ງມີຫຼາຍດ້ານທີ່ຄະນະໜ່ວຍພັກສາມາດຊີ້ນໍາ-ນໍາພາໄດ້ຢ່າງມີຜົນສໍາເລັດ ເປັນຕົ້ນແມ່ນໄດ້ເອົາໃຈໃສ່ນໍາພາປັບປຸງກໍ່ສ້າງພັກຈົນສາມາດຂະຫຍາຍສະມາຊິກພັກໄດ້ 9 ສະຫາຍ, ທຽບໃສ່ປີ 2015 ເພີ່ມຂຶ້ນ 13 ສະຫາຍ ເທົ່າກັບ 44%. ປັດຈຸບັນມີ ສະມາຊິກພັກທັງໝົດ 22 ສະຫາຍ ຍິງ 3 ສະຫາຍໃນນັ້ນ, ສະມາຊິກສໍາຮອງ 3 ສະຫາຍ.

ຄຽງຄູ່ກັນນັ້ນ, ຄະນະພັກຍັງໄດ້ຊີ້ນໍານໍາ-ພາປັບປຸງກົງຈັກລັດ ແລະ ກໍານົດພາລະບົດບາດຂອງການຈັດຕັ່ງພາຍໃນພະແນກວິທະຍາສາດ ແລະ ເຕັກໂນໂລຊີໃນຂັ້ນແຂວງ ມີ 1 ຫ້ອງການ, 5 ຂະແໜງ ຄື: ຫ້ອງການຄຸ້ມຄອງບໍລິຫານ, ຂະແໜງຈັດຕັ້ງ ແລະ ກວດກາ, ຂະແໜງມາດຕະຖານ ແລະ ວັດແທກ,ຂະແໜງຊັບສິນທາງປັນຍາ, ຂະແໜງເຕັກໂນໂລຊີ ແລະ ຂໍ້ມູນ-ຂ່າວສານ, ຂະແໜງວິທະຍາສາດເຕັກໂນໂລຊີ ແລະ ນະວັດຕະກໍາ. ສ່ວນຢູ່ຂັ້ນເມືອງກໍຍັງໄດ້ລົງຊຸກຍູ້ການສ້າງຕັ້ງຫ້ອງການວິທະຍາສາດ ແລະ ເຕັກໂນໂລຊີຢູ່ 9 ເມືອງ ແລະ 1 ນະຄອນອີກດ້ວຍ.

ໃນກອງປະຊຸມຍັງໄດ້ປ່ອນບັດລົງຄະແນນສຽງເພື່ອເລືອກເອົາຄະນະໜ່ວຍພັກຊຸດໃໝ່ ໂດຍເລືອກໄດ້ ສະຫາຍ ອະພິວັດ ສົມບູນຂັນ ເປັນເລຂາໜ່ວຍພັກຮາກຖານ, ສະຫາຍ ວຽງນະຄອນ ບົວລະພັນ ເປັນຮອງເລຂາ ແລະ ສະຫາຍ ສົມຈິດ ໂພທິສານ ເປັນປະທານກວດກາພັກ.

(ເນື້ອໃນ: ເກດສະໜາ)