ບໍລິສັດ ລົງທຶນຢາງພາລາຢູນນານ ເປີດກິດຈະການຜະລິດຢາງພາລາຄືນໃໝ່.

647

ບໍລິສັດ ການລົງທຶນຢາງພາລາຢູນນານ ຈໍາກັດ ແຂວງຫຼວງນໍ້າທາ ໄດ້ເປີດກິດຈະການຜະລິດຢາງ ພາລາຄືນໃໝ່ ພາຍຫຼັງງົດການຜະລິດຍ້ອນພະຍາດໂຄວິດ-19 ເຊິ່ງມີສວນຢາງພາລາ 21 ແຫ່ງ ລວມເນື້ອທີ່ 6.666 ເຮັກຕາ. ຄຽງຄູ່ກັນນັ້ນ, ທາງບໍລິສັດກໍ່ປ່ອຍເງິນກູ້ໂດຍບໍ່ມີດອກເບ້ຍ ຈໍານວນ 2 ຕື້ 690 ລ້ານກີບ ໃຫ້ປະຊາຊົນຊື້ອຸປະກອນ ແລະ ໃຊ້ຈ່າຍສິ່ງຈໍາເປັນໃນຊີວິດປະຈໍາວັນ, ສ່ວນໂຮງງານ 3 ແຫ່ງກໍ່ໄດ້ຜ່ານການກວດກາຂອງຄະນະສະເພາະກິດ ເຫັນວ່າມີເງື່ອນໄຂພ້ອມທີ່ຈະດໍາເນີນການຜະລິດໃຫ້ເປັນປົກກະຕິ.

ທ່ານ ປາຍ ຢວນ ສົ່ງ ຜູ້ອໍານວຍການ ບໍລິສັດ ການລົງທຶນຢາງພາລາຢູນນານ ຈໍາກັດ ໄດ້ລາຍງານໃຫ້ຮູ້ວ່າ: ບໍລິສັດໄດ້ດໍາເນີນໂຄງການປູກຢາງພາລາທົດແທນການປູກຝີ່ນຢູ່ແຂວງຫຼວງນໍ້າທາເປັນເວລາ 14 ປີແລ້ວ, ປັດຈຸບັນມີສວນຢາງພາລາ 21 ແຫ່ງ, ມີເນື້ອທີ່ 6.666 ເຮັກຕາ, ມີໂຮງງານຜະລິດຢາງພາລາ 3 ແຫ່ງ ເຊິ່ງມີສໍານັກງານໃຫ່ຍຂອງບໍລິສັດຕັ້ງຢູ່ແຂວງຫຼວງນໍ້າທາ ແລະ ມີສາຂາຢູ່ແຂວງຫຼວງພະບາງ, ບໍ່ແກ້ວ, ໄຊຍະບູລີ, ແຂວງວຽງຈັນ, ຄໍາມ່ວນ ແລະ ແຂວງຈໍາປາສັກ.

ຕະຫຼອດໄລຍະ 14 ປີຜ່ານມາ, ບໍລິສັດ ແລະ ປະຊາຊົນຊາວຫຼວງນໍ້າທາໄດ້ບຸກບືນຜ່ານຜ່າຄວາມຫຍຸ້ງຍາກຮ່ວມກັນ ເພື່ອພັດທະນາ-ຍົກສູງຊິວີດການເປັນຢູ່ ແລະ ປະກອບສ່ວນໃນການພັດທະນາເສດຖະກິດ-ສັງຄົມໃຫ້ນັບມື້ດີຂື້ນເລື້ອຍໆ. ມາໃນໄລຍະທີ່ປະຕິບັດມາດຕະການຂອງລັດຖະບານເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19; ທາງບໍລິສັກຈິ່ງໄດ້ໂຈະກິດຈະການຜະລິດຢາງພາລາເລີ່ມແຕ່ທ້າຍເດືອນກຸມພາເປັນຕົ້ນມາ.

ພາຍຫຼັງລັດຖະບານໄດ້ມີມາດຕະການຜ່ອນຜັນ ທາງໂຮງງານຈຶ່ງໄດ້ສືບຕໍ່ເປີດກິດຈະການຜະລິດຢາງພາລາຄືນໃໝ່ນັບຕັ້ງແຕ່ວັນທີ 12 ພຶດສະພາ 2020 ເປັນຕົ້ນໄປ ໂດຍໄດ້ເອົາໃຈປະຕິບັດມາດຕະ ການໃນການປ້ອງກັນພະຍາດໂຄວິດ-19 ພາຍໃນໂຮງງານຢ່າງເຂັ້ມງວດ ຕາມຄໍາແນະນໍາ ແລະ ແຈ້ງການຂອງຄະນະສະເພາະກິດ ເຊິ່ງບໍລິສັດໄດ້ປະກອບສ່ວນບໍລິຈາກວັດຖຸອຸປະກອນປ້ອງກັນພະຍາດດັ່ງໃຫ້ແກ່ພາກລັດມູນຄ່າ 100 ລ້ານກ່ວາກີບ.

ໂອກາດນີ້, ທ່ານ ຄໍາໄຫຼ ສີປະເສີດ ຮອງເຈົ້າແຂວງໆຫຼວງນໍ້າທາ ກໍ່ໄດ້ມີຄໍາເຫັນຫຼາຍບັນຫາ ແລະ ເນັ້ນໜັກໃຫ້ບໍລິສັດສືບຕໍ່ຈັດຕັ້ງປະຕິບັດຕາມລະບຽບກົດໝາຍຂອງລັດວາງອອກ, ສືບຕໍ່ຊຸກຍູ້ສົ່ງເສີມປະຊາຊົນໃນການປາດຢາງພາລາ ແລະ ເກັບຊື້ຢາງພາລານໍາປະຊາຊົນໃນລາຄາທີ່ຍຸຕິທໍາ.

ໃນພິທີ, ທາງບໍລິສັດໄດ້ປ່ອຍເງິນກູ້ໂດຍບໍ່ມີດອກເບ້ຍ ຈໍານວນ 2 ຕື້ 690 ລ້ານກີບ ໃຫ້ປະຊາຊົນຊື້ອຸປະກອນ ແລະ ໃຊ້ຈ່າຍສິ່ງຈໍາເປັນໃນຊີວິດປະຈໍາວັນ. ປັດຈຸບັນທັງ 3 ໂຮງງານໄດ້ຜ່ານການກວດກາຂອງຄະນະສະເພາະກິດ ເຫັນວ່າມີເງື່ອນໄຂພ້ອມທີ່ຈະດໍາເນີນການຜະລິດໃຫ້ເປັນປົກກະຕິ.

ພິທີດັ່ງກ່າວ ຈັດຂຶ້ນໃນວັນທີ 12 ພຶດສະພາ 2020 ຢູ່ທີ່ບໍລິສັດການລົງທຶນຢາງພາລາຢູນນານຈໍາກັດທີ່ແຂວງຫຼວງນໍ້າທາ ເຊິ່ງໃຫ້ກຽດເຂົ້າຮ່ວມຂອງທ່ານ ທ່ານ ຄໍາໄຫຼ ສີປະເສີດ ຮອງເຈົ້າແຂວງຫຼວງນໍ້າທາ, ທ່ານ ປາຍ ຢວນ ສົ່ງ ຜູ້ອໍານວຍການ ບໍລິສັດ ການລົງທຶນຢາງພາລາຢູນນານ ຈໍາກັດ, ມີການນໍາຂັ້ນແຂວງ, ຂັ້ນເມືອງ, ຕາງໜ້າຊາວສວນຢາງພາລາແຕ່ລະກຸ່ມພາຍໃນເມືອງຫຼວງນໍ້າທາເຂົ້າຮ່ວມ.