ນໍ້າປະປາ ແລະ ສະຫາກອນຜູ້ຜະລິດກາເຟ ປະກອບສ່ວນວັດຖຸ-ປັດໃຈຊ່ວຍຕ້ານໂຄວິດ-19

781

ວັນທີ 1 ເມສາ 2020, ສະຫະກອນຜູ້ຜະລິດການເຟ ເຂດພູພຽງບໍລະເວນ ຫຼື ສຜກ ໄດ້ມອບເງິນໃຫ້ຄະນະພັກ-ອົງການປົກຄອງ 3 ເມືອງ ຄື: ເມືອງປາກຊ່ອງ, ເມືອງບາຈຽງຈະເລີນສຸກ ແຂວງຈໍາປາສັກ ແລະ ເມືອງເລົ່າງາມ ແຂວງສາລະວັນ ເມືອງລະ 10 ລ້ານກີບ ລວມ 30 ລ້ານກີບ ເພື່ອປະກອບສ່ວນຊ່ວຍເຫຼືອໃນການເຄື່ອນໄຫວວຽກງານປ້ອງກັນ ແລະ ຕ້ານພະຍາດໂຄວິດ 19.

ພິມີມອບ-ຮັບເງິນຊ່ວຍເຫຼືອດັ່ງກ່າວ ຈັດຂຶ້ນຢູ່ສະໂມສອນຂອງແຕ່ລະເມືອງ, ມອບໂດຍທ່ານ ບຸນທົງ ເທບໄກສອນ ປະທານ ສຜກ, ເມືອງປາກຊ່ອງ ຮັບໂດຍທ່ານ ພິມພອນ ພັນດານຸວົງ ເລຂາພັກເມືອງ ເຈົ້າເມືອງໆປາກຊ່ອງ; ເມືອງບາຈຽງຈະເລີນສຸກ ຮັບໂດຍທ່ານ ສົມລິດ ປັນທະບົວສີ ເລຂາພັກເມືອງ ເຈົ້າເມືອງໆບາຈຽງຈະເລີນສຸກ; ເມືອງເລົ່າງາມ ຮັບໂດຍທ່ານສົມສັກ ວົງວິຫານ ເລຂາພັກເມືອງ ເຈົ້າເມືອງໆເລົ່າງາມ.ມີການນໍາແຕ່ລະເມືອງ, ການນໍາຂະແໜງການ ແລະ ພະນັກງານວິຊາການທີ່ກ່ຽວຂ້ອງເຂົ້າຮ່ວມເປັນສັກຂີພະຍານ.

ສ່ວນວັນທີ 2 ເມສາ 2020, ລັດວິສາຫະກິດ ນໍ້າປະປາແຂວງຈໍາປາສັກ ໄດ້ມອບນໍ້າຢາຂ້າເຊື້ອພະຍາດ 10 ຖັງ ພ້ອມດ້ວຍບັ້ງຊີດຢາ 10 ບັ້ງ ລວມມູນຄ່າ 20 ລ້ານກີບ ໃຫ້ແກ່ຄະນະກໍາມະການສະເພາະກິດ ຕ້ານພະຍາດໂຄວິດ 19 ຂັ້ນແຂວງ ເພື່ອປະກອບສ່ວນເຂົ້າໃນວຽກງານປ້ອງກັນ ແລະ ຕ້ານພະຍາດດັ່ງກ່າວ.

ພິທີມອບ-ຮັບ ເຄື່ອງຊ່ວຍເຫຼືອດັ່ງກ່າວ ຈັດຂຶ້ນຢູ່ຫ້ອງວ່າການແຂວງ, ມອບໂດຍ ທ່ານ ປອ.ໄກ່ຄໍາ ສຸວັນນະເມທີ ຜູ້ອໍານວຍການລັດວິສາຫະກິດ ນໍ້າປະປາແຂວງ, ຮັບໂດຍທ່ານ ບົວລິນ ວົງພະຈັນ ຮອງເຈົ້າແຂວງໆຈໍາປາສັກ ຮອງປະທານຄະນະກໍາມະການສະເພາະກິດ ຕ້ານພະຍາດໂຄວິດ 19 ຂັ້ນແຂວງ. ມີຫົວໜ້າຫ້ອງວ່າການແຂວງ, ຫົວໜ້າພະແນກສາທາລະນະສຸກແຂວງ, ຄະນະອໍານວຍການລັດວິສາຫະກິດນໍ້າປະປາແຂວງ ແລະ ພາກສ່ວນກ່ຽວຂ້ອງ ເຂົ້າຮ່ວມເປັນສັກຂີພະຍານ.

ໃນໂອກາດນີ້, ທ່ານ ບົວລິນ ວົງພະຈັນ ຮອງເຈົ້າແຂວງໆຈໍາປາສັກ ມີຄໍາເຫັນວ່າ: ລັດວິສາຫະກິດນໍ້າປະປາແຂວງ ເປັນພາກສ່ວນທໍາອິດ ທີ່ນໍາເອົານໍ້າຢາຂ້າເຊື້ອພະຍາດ ແລະ ບັ້ງຊີດຢາ ມອບໃຫ້ຄະນະກໍາມະການສະເພາະກິດ ຕ້ານພະຍາດໂຄວິດ 19 ຂັ້ນແຂວງ ເຊິ່ງຄະນະກໍາມະການພວກເຮົາ ຈະແບ່ງປັນໃຫ້ 9 ເມືອງ ແລະ 1 ນະຄອນ ເພື່ອນໍາໃຊ້ປະກອບສ່ວນຊີດຂ້າເຊື້ອພະຍາດ ຢູ່ຕາມສູນກັກກັນ, ເຂດຊຸມຊົນແໜ້ນໜາ ແລະ ເຂດທີ່ມີຄວາມສ່ຽງອື່ນໆ. ນອກນີ້ ລັດວິສາຫະກິດ ນໍ້າປະປາແຂວງ ຍັງໄດ້ມອບບັ້ງຊີດຢາຂ້າເຊື້ອພະຍາດ ໃຫ້ແກ່ພະແນກສາທາລະນະສຸກແຂວງ ອີກ 10 ບັ້ງ ລວມມູນຄ່າ 5 ລ້ານກີບ.

*** ຂ່າວ-ພາບ: ທູນທອງໃຈ ***