ພົບຜູ້ຕິດເຊື້ອໂຄວິດ-19 ຄົນທີ 11 ເປັນຊາວຕ່າງປະເທດມາເຮັດວຽກຢູ່ບໍລິສັດພູເບ້ຍ

818

ກວດພົບຜູ້ຕິດເຊື້ອໂຄວິດ-19 ເພີ່ມຂຶ້ນ 1 ຄົນ 👆 ເປັນຊາວຕ່າງປະເທດ ທີ່ເຮັດວຽກຢູ່ ສປປ ລາວ, ເຮັດໃຫ້ຍອດລວມສະສົມ ຜູ້ຕິດເຊື້ອທັງໝົດໃນປະເທດເພີ່ມຂຶ້ນເປັນ 11 ກໍລະນີ

ວັນທີ 5 ເມສາ 2020 ເວລາ 14:30 ໂມງ ທີ່ສູນປະຕິບັດງານ ຄະນະສະເພາະກິດປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດ ໂຄວິດ-19 ຖະແຫຼງຂ່າວໃຫ້ຮູ້ວ່າ ມາຮອດມື້ນີ້ໄດ້ກວດພົບຜູ້ຕິດເຊື້ອ ໂຄວິດ-19 ລາຍໃໝ່ຢູ່ ສປປ ລາວ ເພີ່ມຂຶ້ນ 1 ຄົນ ເປັນຊາວປາປົວນິວກີເນ 🇵🇬 ເພດຊາຍ ອາຍຸ 55 ປີ ພະນັກງານຂອງ ບໍລິສັດ ພູເບ້ຍ ມາຍນິງ ໂດຍຜູ້ກ່ຽວມີອາການ ໄຂ້ ໄອ ແລະ ເປັນຫວັດ ຈຶ່ງໄດ້ມາກວດເຊື້ອຢູ່ໂຮງໝໍມິດຕະພາບ, ຜ່ານການເກັບຕົວຢ່າງກວດສອບ ພົບວ່າຜູ້ກ່ຽວແມ່ນຕິດເຊື້ອໂຄວິດ-19 ແລະ ກາຍເປັນຜູ້ຕິດເຊື້ອ ຄົນທີ 11 ໃນ ສປປ ລາວ.

ຜູ້ກ່ຽວມີປະຫວັດເດີນທາງມາຈາກປະເທດປາປົວນິວກີເນ ຜ່ານປະເທດສິງກະໂປ ໃນວັນທີ 22 ມີນາ ແລ້ວມາລົງຜ່ານປະເທດໄທ ໃນວັນທີ 23 ມີນາ ກ່ອນເດີນທາງມາພັກຢູ່ໂຮງແຮມຄຣາວພລາຊາ ໃນວັນດຽວກັນ. ຈາກນັ້ນ, ຈຶ່ງຂຶ້ນລົດຕູ້ມີຜູ້ໂດຍສານ 11 ຄົນ ອອກໄປສະໜາມຢູ່ພູເບ້ຍ. ຄາດວ່າຈະມີຜູ້ໃກ້ຊິດພົວພັນກັບຜູ້ກ່ຽວ ປະມານ 100 ຄົນ. ປັດຈຸບັນຄະນະສະເພາະກິດກໍາລັງຕິດຕາມ ແລະ ຊັກຖາມລະອຽດການເດີນທາງໄປບ່ອນຕ່າງໆຢູ່ ສປປ ລາວ.

ສະຖານະການການແຜ່ລະບາດຂອງເຊື້ອ ໂຄວິດ-19 ໃນທົ່ວໂລກ 205 ປະເທດ, ຕິດເຊື້ອ 1,2 ລ້ານຄົນ, ເສຍຊີວິດ 12.000 ກວ່າຄົນ ເຊິ່ງແມ່ນຍັງມີທ່າອ່ຽງເພີ່ມສູງຂຶ້ນຢ່າງຕໍ່ເນື່ອງ ແລະ ໜ້າຢ້ານກົວທີ່ສຸດ, ຮຽກຮ້ອງໃຫ້ປະຊາຊົນລາວບັນດາເຜົ່າຈົ່ງເພີ່ມທະວີເອົາໃຈໃສ່ຮັກສາຕົນເອງ ແລະ ປະຕິບັດຕາມມາດຕະຖານການປ້ອງກັນຂອງລັດຖະບານລາວວາງອອກຢ່າງເຄັ່ງຄັດ, ພ້ອມທັງກັກຕົນເອງຢູ່ເຮືອນບໍ່ອອກໄປໃສຍົກເວັ້ນກໍລະນີຈໍາເປັນແນໃສ່ຕ້ານ ແລະ ຄວບຄຸມເຊື້ອໄວຣັສນີ້ບໍ່ໃຫ້ເພີ່ມຂຶ້ນຕື່ມໃນ ສປປ ລາວ.