ເມືອງສອງຄອນ ແລະ ໄຊພູທອງ ມີ​ແຮງ​ງານ​ມາ​ຈາກ​ຕ່າ​ງ​ປະ​ເທດ​ກັກ​ກັ້ນ​ຕົວ 4 ພັນ​ກວ່າ​ຄົນ

1020

ເຈົ້າແຂວງສະຫວັນນະເຂດ ຢ້ຽມຢາມສູນກັກກັນຊົ່ວຄາວ ແຮງງານລາວທີ່ມາຈາກຕ່າງປະເທດ ທີ່ເມືອງສອງຄອນ ແລະ ເມືອງໄຊພູທອງ ລວມ​ມີ​ແຮງ​ງານ​ທັງໝົດ 4.266 ຄົນ ກັກ​ກັ້ນ​ໄວ​ໃນ 104 ສູນ ເພື່ອ​ຕິດ​ຕາມ​ອາ​ກາດ ເພື່ອ​ປ້ອງ​ກັ​ນ​ການ​ລະ​ບາດ​ຂອງ​ພະ​ຍາດ​ໂຄວິດ-19.

ໃນວັນທີ 29 ມີນາ 2020 ນີ້ ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ພ້ອມດ້ວຍຄະນະສະເພາະກິດຕ້ານໂຄວິດ-19 ຂັ້ນແຂວງ ໄດ້ສືບຕໍ່ລົງຢ້ຽມຢາມແຮງງານລາວທີ່ມາຈາກຕ່າງປະເທດ ທີ່ສູນກັກກັນປະຖົມດອນຫວາຍ ແລະ ມສ ທ່າແພ ເມືອງສອງຄອນ. ໂອກາດນີ້ ທ່ານ ພັອ ລຳຄູນ ວໍລະວົງ ເຈົ້າເມືອງສອງຄອນ ໄດ້ລາຍງານໃຫ້ຮູ້ວ່າ: ນັບແຕ່ວັນທີ 24 ຫາ ວັນທີ 28 ມີນາ 2020 ໄດ້ມີລົດນຳສົ່ງແຮງງານລາວທີ່ມາຈາກປະເທດໄທ ເຖິງເມືອງສອງຄອນມີ 15 ຄັນ,ມີ 693 ຄົນ,ຍິງ 323 ຄົນ ເຂົ້າມາຈາກບ່ອນອື່ນ 1.636 ຄົນ,ຍິງ 876 ຄົນ ປັດຈຸບັນທົ່ວເມືອງມີ ສູນກັກກັນທັງໝົດ 56 ສູນ, ມີແຮງງານທີ່ຖືກກັກກັນ 2.449 ຄົນ,ຍິງ 1.246 ຄົນ.

ຈາກນັ້ນທ່ານເຈົ້າແຂວງກໍ່ຍັງໄດ້ສືບຕໍ່ ລົງຢ້ຽມຢາມແຮງງານລາວທີ່ຖືກກັກກັນທີ່ສູນ ມສ ເຮືອນຫີນ,ມສ ໄຊພູທອງ,ປະຖົມຫົວຫາດ,ປະຖົມທ່າໂພ ເຊິ່ງທົ່ວເມືອງໄຊພູທອງ ມີສູນກັກກັນທັງໝົດ 48 ສູນ,ມີ 1.817 ຄົນ,ຍິງ 791 ຄົນ, ເຂົ້າມາໂດຍບໍ່ຖືກຕ້ອງ 203 ຄົນ, ຍິງ 85 ຄົນ ປັດຈຸບັນທາງເມືອງແມ່ນໄດ້ກຽມສູນແຍກປ່ຽວຢູ່ໂຮງໝໍເມືອງມີ 4 ຫ້ອງ ແລະ ຢູ່ໂຮງຮຽນທີ່ໃກ້ກັບໂຮງໝໍມີ 8 ຫ້ອງ.

ໂອກາດລົງຢ້ຽມຢາມແຮງງານລາວທີ່ສູນກັກກັນຄັ້ງນີ້ ທ່ານ ເຈົ້າແຂວງກໍ່ໄດ້ເນັ້ນໃຫ້ອຳນາດການປົກຄອງຂອງເມືອງ,ຂອງບ້ານ ຕ້ອງໄດ້ເອົາໃຈໃສ່ໃນການເຝົ້າລະວັງຢ່າງເຂັ້ມງວດນອກຈາກການເຮັດໜ້າທີ່ປ້ອງກັນຢູ່ສູນແລ້ວ ຕ້ອງໄດ້ຖືເອົາວຽກງານປ້ອງກັນຄວາມປອດໄພຢູ່ທາງບ້ານຕື່ມອີກ ຢ້ານມີຜູ້ສວຍໂອກາດກໍ່ເຫດຂີ້ລັກງັດແງະ,ກໍ່ຄວາມບໍ່ສະຫງົບສຸກພາຍໃນບ້ານ.

ຮູບ​ປະ​ກອບ​ແຮງ​ງານ​ລາວ ມາ​ຈາກ​ປະ​ເທດ​ໄທ

ພ້ອມນີ້ ທ່ານເຈົ້າແຂວງຍັງໄດ້ແນະນຳໃຫ້ທຸກຄົນຕ້ອງໄດ້ເອົາໃຈໃສ່ປ້ອງກັນຕົນເອງໃນຊ່ວງໄລຍະທີ່ເກີດການລະບາດຂອງເຊື້ອພະຍາດໂຄວິ-19 ເຮົາບໍ່ສາມາດຮູ້ໄດ້ວ່າພະຍາດດັ່ງກ່າວຈະເກີດຂຶ້ນຢູ່ຈຸດໃດແດ່ ສະນັ້ນພວກເຮົາຕ້ອງຖືເອົາວຽກງານປ້ອງກັນເປັນບັນຫາສຳຄັນ ໂດຍການໃສ່ຜ້າອັດປາກ,ໝັ່ນອະນາໄມມືເປັນປະຈຳ,ຂະຫຍາຍສູນກັກກັນລົງໂຮງຮຽນໃນບ້ານທີ່ມີເງື່ອນໄຂເປັນອີກສູນໜຶ່ງ,ເດັດຂາດບໍ່ໃຫ້ມີຄວາມແອອັດພາຍໃນສູນ ຖ້າຫາກບຸກຄົນໃດມີອາການເຂົ້າຂ່າຍກໍລະນີສົງໃສຕ້ອງໄດ້ແຍກປ່ຽວ ແລະ ນຳສົ່ງໂຮງໝໍໂດຍໄວ.
ພາບ-ຂ່າວ: ອັກສອນສິນ ພົມມະຈັນ