ແບບນີ້ຈຶ່ງປອດໄພ! ນາຍົກລາວ, ຫວຽດນາມ ແລະ ກໍາປູເຈຍ ຫາລືຕອບໂຕ້ການລະບາດໂຄວິດ-19 ຜ່ານໂທລະສັບ

3096

ໃນສະພາບການແບບນີ້ການສື່ສານທີ່ຢູ່ຫ່າງໄກ ຜ່ານເຄື່ອງມືເອເລັກໂຕນິກທີ່ທັນສະໄໝ ນັບເປັນສິ່ງທີ່ສາມາດສ້າງຄວາມປອດໄພໃນການປຶກສາຫາລືວຽກງານຮ່ວມກັນ ທັງພາຍໃນ ແລະ ຕ່າງປະເທດ ເພື່ອປ້ອງກັນການຕິດເຊື້ອໂຄວິດ-19, ດັ່ງທ່ານນາຍົກລັດຖະມົນຕີຂອງລາວ, ຫວຽດນາມ ແລະ ກໍາປູເຈຍ ທີ່ຫາລືປະສານງານໃນການຕອບໂຕ້ການລະບາດຂອງໂຄວິດ-19 ຜ່ານໂທລະສັບ.

ໃນວັນທີ 26 ມີນາຜ່ານມາ ທ່ານ ຫງວຽນ ຊວນ ຟຸກ ນາຍົກລັດຖະມົນຕີຫວຽດນາມ ໄດ້ປຶກສາຫາລືຜ່ານໂທລະສັບກັບ ທ່ານ ທອງລຸນ ສີສຸລິດ ນາຍົກລັດຖະມົນຕີຂອງ ລາວ ແລະ ທ່ານ ຮຸນ ເເຊນ ນາຍົກລັດຖະມົນຕີກຳປູເຈຍ ໂດຍໄດ້ຫາລືການປະສານງານລະຫວ່າງສາມປະເທດໃນການຕອບໂຕ້ການແຜ່ລະບາດຂອງພະຍາດ ໂຄວິດ-19.

ໃນການປຶກສາຫາລື ນາຍົກລັດຖະມົນຕີລາວ ແລະ ຫວຽດນາມໄດ້ຊົມເຊີຍຄວາມພະຍາຍາມຂອງກັນ ແລະ ກັນໃນການປ້ອງກັນພະຍາດດັ່ງກ່າວ. ສ່ວນ ນາຍົກຫວຽດນາມກໍໄດ້ກ່າວວ່າ ຫວຽດນາມມີຄວາມຍິນດີທີ່ຈະຊ່ວຍເຫຼືອ ແລະ ຢືນຄຽງຂ້າງລາວໃນການຕໍ່ສູ້ກັບພະຍາດດັ່ງກ່າວ.