ໜ່ວຍພັກພະແນກ ແຜນການ ແລະ ການເງິນ ສະຫຼຸບຜົນສໍາເລັດຜ່ານມາ.

501

ກອງປະຊຸມໃຫຍ່ ຄັ້ງທີ I ຂອງໜ່ວຍພັກພະແນກແຜນການ ແລະ ການເງິນ ຂຶ້ນກັບຄະນະພັກຮາກຖານຫ້ອງການກະຊວງການເງິນ, ໄດ້ຈັດຂຶ້ນໃນວັນທີ 12 ກຸມພາ 2020 ໂດຍການເຂົ້າຮ່ວມເປັນປະທານຂອງສະຫາຍ ສົມບູນ ອິນທະປັດຖາ ເລຂາຄະນະພັກຮາກຖານຫ້ອງການກະຊວງການເງິນ, ມີສະຫາຍ ວຽງທາ ຈິດດາລາ ເລຂາໜ່ວຍພັກພະແນກແຜນການ ແລະ ການເງິນ, ມີຕາງໜ້າໜ່ວຍພັກອ້ອມຂ້າງ, ຕາງໜ້າ 3 ອົງການຈັດຕັ້ງພ້ອມດ້ວຍສະມາຊິກພັກສົມບູນ-ສຳຮອງເຂົ້າຮ່ວມ.

ໂອກາດດັ່ງກ່າວ, ສະຫາຍ ວຽງທາ ຈິດດາລາ ເລຂາໜ່ວຍພັກພະແນກແຜນການ ແລະ ການເງິນ ໄດ້ຜ່ານບົດລາຍງານການເມືອງແບບແຜນການດຳເນີນງານຂອງພັກຊຶ່ງໜ່ວຍພັກດັ່ງກ່າວໄດ້ຮວມເອົາສອງພະແນກຄື: ພະແນກແຜນການລົງທຶນ ແລະ ພະແນກການເງິນເຂົ້າກັນເປັນເປັນພະແນກດຽວໂດຍໃສ່ຊື່ວ່າ: ພະແນກແຜນການ ແລະ ການເງິນຕາມພາລະບົດບາດ ແລະ ໂຄງປະກອບການຈັດຕັ້ງໃໝ່ຂອງຫ້ອງການ, ຊຶ່ງປະກອບມີສະມາຊິກພັກທັງໝົດ 6 ສະຫາຍ, ຍິງ 3 ສະຫາຍ ແລະ ຄະນະໜ່ວຍພັກ 2 ສະຫາຍ.

ໃນໄລຍະ 4 ປີຜ່ານມາຄະນະໜ່ວຍພັກໄດ້ຖືສຳຄັນວຽກງານການສຶກສາອົບຮົມການເມືອງ-ແນວຄິດໃຫ້ແກ່ບັນດາສະມາຊິກ-ພະນັກງານ ໂດຍຖືເອົາການດຳເນີນຊີວິດພັກ ແລະ ການເຄື່ອນໄຫວວຽກງານວິຊາສະເພາະໃນແຕ່ລະເດືອນເປັນບ່ອນສຶກສາອົບຮົມກໍ່ສ້າງຊ່ວຍເຫຼືອຊຶ່ງກັນ ແລະ ກັນ. ນອກນັ້ນ, ຍັງໄດ້ເຂົ້າຮ່ວມເຊື່ອມຊຶມການເຜີຍແຜ່ກົດລະບຽບພັກ, ຜົນສຳເລັດຂອງກອງປະຊຸມໃຫຍ່ຄັ້ງທີ່ X ຂອງພັກປະຊາຊົນປະຕິວັດລາວ, ມະຕິຄຳສັ່ງຕ່າງໆຂອງກົມການເມືອງສູນກາງພັກເຮັດໃຫ້ພະນັກງານສະມາຊິກພັກມີຄວາມຮັບຮັບເຂົ້າໃຈ, ກຳໄດ້ແນວທາງນະ ໂຍບາຍການປ່ຽນແປງໃໝ່ຂອງພັກ, ມີນໍ້າໃຈມີຄວາມຮັບຜິດຊອບຕໍ່ການຈັດຕັ້ງ ແລະ ເປັນເຈົ້າການໃນການປະຕິບັດລະບຽບກົດໝາຍຂອງລັດຢ່າງເຂັ້ມງວດ.

ໃນກອງປະຊຸມ, ສະມາຊິກຜູ້ແທນກອງປະຊຸມໄດ້ພ້ອມກັນໃຊ້ສິດປະຊາທິປະໄຕຂອງຕົນປ່ອນບັດເລືອກຕັ້ງເອົາຄະນະໜ່ວຍພັກຊຸດໃໝ່ບົນພື້ນຖານຫຼັກການລວມສູນປະຊາທິປະໄຕທັງຖືກຕ້ອງສອດຄ່ອງກັບບັນດາມາດຖານເງື່ອນໄຂທີ່ກຳນົດໄວ້. ຊຶ່ງມີຜູ້ສະໝັກເລືອກຕັ້ງ 4 ສະຫາຍ, ຍິງ 2 ສະຫາຍ. ໃນກອງປະຊຸມຄັ້ງປະຖົມມະລຶກຂອງໜ່ວຍພັກພະແນກແຜນການ ແລະ ການເງິນ ໄດ້ເປັນເອກະສັນເລືອກຕັ້ງເອົາສະຫາຍ ວຽງທາ ຈິດດາລາ ເປັນເລຂາໜ່ວຍພັກອີກໜຶ່ງສະໄໝ ແລະ ສະຫາຍ ສົມນຶກ ທຳມະວົງສາ ເປັນຮອງເລຂາໜ່ວຍພັກ ທັງເປັນປະທານກວດກາໜ່ວຍພັກ.