ລາຍໄດ້ບໍ່ໜ້ອຍ! ປູກອ້ອຍຂາຍສ້າງລາຍຮັບ 140ລ້ານກວ່າກີບຕໍ່ປີ

440

ຊົມເຊີຍປະຊາຊົນ ທີ່ມີການຫັນປ່ຽນເຂົ້າສູ່ການຜະລິດເປັນສິນຄ້າ ສ້າງລາຍຮັບເຂົ້າຄອບຄົວ ຄືດັ່ງຄອບຄົວຂອງທ່ານສະໝານ ຜາວົງ ອາຍຸ 50 ປີ ປະຊາຊົນບ້ານ ຍາງໂພສີ ນະຄອນໄກສອນພົມວິຫານ ແຂວງສະຫວັນນະເຂດ ທີ່ໄດ້ຫັນມາປູກອ້ອຍເປັນສິນຄ້າ ເຮັດໃຫ້ມີລາຍໄດ້ເຂົ້າຄອບຄົວສູງເຖິງ 140ລ້ານກວ່າກີບຕໍ່ປີ.

ທ່ານ ສະໝານ ຜາວົງ ໃຫ້ສຳພາດຕໍ່ທີມງານຜູ້ສື່ຂ່າວສະຫະພັນກຳມະບານແຂວງສະຫວັນນະເຂດເມື່ອບໍ່ດົນມານີ້ວ່າ: ແຕ່ກ່ອນຕົນເອງ ແລະ ຄອບຄົວ ປະກອບອາຊີບເຮັດນາປູກເຂົ້າຂາຍ ແຕ່ມາຮອດປີ 2016 ຈຶ່ງໄດ້ມີແນວຄວາມຄິດ ຢາກປູກອ້ອຍຂາຍສົ່ງເຂົ້າໂຮງງານ ເນື່ອງຈາກເຫັນວ່າຈະເປັນຫົນທາງສ້າງລາຍຮັບໄດ້ດີກວ່າພືດອື່ນໆ ຈຶ່ງເລີ່ມລົງມື ແຕ່ກໍ່ຍັງບໍ່ໄດ້ຮັບຜົນດີເທົ່າທີ່ຄວນ, ຈົນມາຮອດສົກປີ 2018-2019 ຈຶ່ງເລີ່ມມີລາຍຮັບທີ່ດີຂຶ້ນ ໂດຍສະເພາະປີ 2019 ລາຍຮັບສະເລ່ຍ 143ລ້ານກີບ ຈາກເນື້ອທີ່ປູກທັງໝົດ 5ເຮັກຕາ.

ທັງນີ້, ໃນເນື້ອທີ່ປູກດັ່ງກ່າວ ແມ່ນນໍາໃຊ້ທຶນຂອງບໍລິສັດນ້ຳຕານ ເປັນຜູ້ສະໜອງທຶນກ່ອນ ເພື່ອບຸກເບີກເນື້ອທີ່ດິນ , ການປູກ ລວມທັງການໃສ່ຝຸ່ນ, ໃສ່ປຸ໋ຍ ແລະ ອື່ນໆ. ສຳລັບອ້ອຍທີ່ນຳມາປູກ ມີຢູ່ 2 ຊະນິດ ຄື ອ້ອຍອິນຊີ ແລະ ອ້ອຍຕໍ; ສ່ວນລາຄາການເກັບຊື້ ອ້ອຍອິນຊີ ບໍລິສັດຈະເກັບຊື້ໃນລາຄາ 3 ແສນກວ່າກີບຕໍ່ໂຕນ, ສ່ວນອ້ອຍຕໍ ລາຄາ 2 ແສນກວ່າກີບຕໍ່ໂຕນ.

ສໍາລັບຂັ້ນຕອນການປູກ ຫຼື ບົວລະບັດຮັກສາແມ່ນບໍ່ມີຄວາມຫຍຸ້ງຍາກຫຍັງຫຼາຍ ເນື່ອງຈາກມີວິຊາການຂອງບໍລິສັດລົງມາແນະນໍາຢູ່ເປັນປະຈໍາ, ສະເພາະການປູກຈະເລີ່ມປູກແຕ່ຕົ້ນເດືອນ 10 ຂອງທຸກປີ ໂດຍອ້ອຍຈະເລີ່ມຈະເລີນເຕີບໂຕ ໃນໄລຍະ 13 ເດືອນ, ເມື່ອຮອດລະດູການເກັບກ່ຽວ ກໍ່ຈະມີລົດເກັບກູ້ຈາກບໍລິສັດມາເກັບກູ້ເອງ ຕົນເອງກໍ່ມີພຽງຈ້າງແຮງງານຄົນນຳເລັກນ້ອຍເທົ່ານັ້ນ.

ເຖິງຢ່າງໃດກໍ່ຕາມ ຜົນຜະລິດໃນປີທຳອິດສາມາດເກັບກ່ຽວໄດ້ທັງໝົດ 450ໂຕນ, ມູນຄ່າ 42 ລ້ານກວ່າກີບ ທັງນີ້ ຍ້ອນວ່າທາງບໍລິສັດໄດ້ຕັດຕົ້ນທຶນຄ່າບຸກເບີກ, ຄ່າບຳລຸງຮັກສາ, ຄ່າປຸ໋ຍ ແລະ ອື່ນໆ. ສ່ວນຜົນຜະລິດປີຫຼ້າສຸດ 2018-2019 ເຫັນວ່າຍອດຜົນຜະລິດເພີ່ມຂື້ນເປັນ 500 ກວ່າໂຕນ ຈື່ງໄດ້ມີການຂະຫຍາຍເນື້ອທີ່ອອກອີກ 03 ເຮັກຕາ. ເວົ້າແລ້ວລາຍຮັບຈາກການປູກອ້ອຍຂາຍ ສາມາດຊື້ລົດໄຖແທັກເຕີ້ໄດ້ 01 ຄັນ, ມີໂຮງສີເຂົ້າ 01 ເຄື່ອງ ແລະ ສາມາດສົ່ງລູກຮຽນໄດ້.