ຊົມເຊີຍ! ພະນັກງານບໍານານ ມອບເຄື່ອງກັນໜາວແກ່ປະຊາຊົນ

474

ທ່ານນາງ ບົວຈັນ ປໍສະຫວັດດີ ພະນັກງານບຳນານພະແນກສຶກສາທິການ ແລະ ກິລາ ແຂວງໄຊຍະບູລີ ມອບເຄື່ອງນຸ່ງກັນໜາວໃຫ້ ນ້ອງນັກຮຽນ, ຄູອາຈານ ແລະ ປະຊາຊົນ ບ້ານແກ້ງແອນ, ບ້ານທ່າຊ່ວງ ແລະ ບ້ານກິ່ວສາລາ.

ໃນວັນທີ 15 ທັນວາ 2019 ນີ້, ທ່ານ ນາງ ບົວຈັນ ປໍສະຫວັດດີ ພະນັກງານບຳນານພະແນກສຶກສາທິການ ແລະ ກິລາ ແຂວງໄຊຍະບູລີ ພ້ອມດ້ວຍຄອບຄົວ ໄດ້ນຳເອົາເຄື່ອນຸ່ງຫົ່ມກັນໜາວມາມອບໃຫ້ ນ້ອງນັກຮຽນ, ຄູອາຈານ ແລະ ປະຊາຊົນ ບ້ານແກ້ງແອນ, ບ້ານທ່າຊ່ວງ, ບ້ານກິ່ວສາລາ ແລະ ມອບໃຫ້ເດັກກຳພອຍຢູ່ບ້ານເມືອງຫານຈຳນວນຫນຶ່ງ ໂດຍເຂົ້າຮ່ວມມີ ທ່ານ ນາງດາວວິນ ລາດຊະກິດ ຮອງເລຂາພັກເມືອງ ຮອງເຈົ້າເມືອງຫົງສາ, ມີທ່ານ ປ່ຽນ ຈິນດາ ຫົວໜ້າຫ້ອງການສຶກສາທິການ ແລະ ກິລາເມືອງ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ

ເຄື່ອງທີ່ນຳມາມອບຄັ້ງນີ້ ມີມູນຄ່າທັງໝົດ 8 ລ້ານ 2 ແສນກີບ, ນອກນັ້ນຍັງມີເຄື່ອງນຸ່ງທີ່ບຸກຄົນໄດ້ປະກອບສວ່ນຈຳນວນໜຶ່ງ, ເຄື່ອງທີ່ນຳມາມອບແມ່ນໄດ້ຈາກ ທ່ານ ນາງ ບົວຈັນ ປໍສະຫວັດດີ ໄດ້ປຸກລະດົມວັດຖຸປັດໃຈຈາກຄອບຄົວການນຳຂອງແຂວງໄຊຍະບູລີ, ນັກທຸລະກິດ, ໝ່ຄູ່ເພື່ອນມິດສະຫາຍຜູ້ທີ່ມີຈິດໃຈໃສສັດທາ ແລະ ຄອບຄົວຂອງເພິ່ນເອງ, ເຊິ່ງເປັນປະເພດເຄື່ອງນຸ່ງຫົ່ມກັນໜາວ ເພື່ອເປັນສ່ວນໜຶ່ງໃນການມອບຄວາມອົບອຸ່ນໃຫ້ແກ່ນ້ອງນັກຮຽນ, ຄູອາຈານ ແລະ ປະຊາຊົນທີ່ຢູ່ບ້ານເຂດຫ່າງໄກສອກຫຼີກທັງເປັນການແບ່ງປັນນ້ຳຈິດນ້ຳໃຈຊ່ວຍກັນຕ້ານໄພໜາວໃນປີນີ້

ໃນໂອກາດນີ້ ທ່ານ ນາງດາວວິນ ລາດຊະກິດ ຕາງໜ້າອົງການປົກຄອງເມືອງຫົງສາ ກໍ່ໄດ້ໃຫ້ກຽດມອບໃບສົມມະນາບຸນຄຸນ ແລະ ກ່າວສະແດງຄວາມຂອບໃຈຕໍ່ກັບທ່ານພ້ອມດ້ວຍ ທຸກພາກສ່ວນທີີ່ໄດ້ສະຫຼະເວລາ ແລະ ຊັບສິນຂອງຕົນໃນການປະກອບສ່ວນ ແລະ ລົງມາມອບເຄື່ອງຊ່ວຍເຫຼືອຢູ່ເມືອງຫົງສາໃນຄັ້ງນີ້ຕື່ມອີກ.

ທີ່ມາ: ສະຖານີວິທະຍຸໂທລະໂຄ່ງເມືອງຫົງສາ