ມອບ-ຮັບ ໂຄງການກໍ່ສ້າງ ອາຄານກອງບັນຊາການ ປກສ ແຂວງຫຼວງພະບາງ ຫຼັງໃໝ່

955

ພິທີມອບ-ຮັບ ໂຄງການກໍ່ສ້າງ ກອງບັນຊາການປ້ອງກັນຄວາມສະຫງົບ ແຂວງ ຫຼວງພະບາງ ໄດ້ຈັດຂຶ້ນໃນຕອນເຊົ້າວັນທີ 9 ທັນວາ 2019 ນີ້ ໂດຍການເຂົ້າຮ່ວມຂອງທ່ານ ພົນໂທ ວິໄລ ຫຼ້າຄຳຟອງ ລັດຖະມົນຕີກະຊວງປ້ອງກັນຄວາມສະຫງົບ, ທ່ານ ຄຳຂັນ ຈັນທະວີສຸກ ເຈົ້າແຂວງຫຼວງພະບາງ, ມີຕາງໜ້າກົມ, ພະແນກການກ່ຽວຂ້ອງຂອງແຂວງ, ພ້ອມດ້ວຍພະນັກງານສອງຝ່າຍເຂົ້າຮ່ວມ.

ໂຄງການກໍ່ສ້າງ ກອງບັນຊາການປ້ອງກັນຄວາມສະຫງົບ ແຂວງ ຫຼວງພະບາງ ໂດຍແມ່ນກອງບັນຊາການປ້ອງກັນຄວາມສະຫງົບ ແຂວງເປັນເຈົ້າຂອງໂຄງການ. ບໍລິສັດ 86 ເປັນຜູ້ສຳຫຼວດອອກແບບ, ບໍລິສັດບົວຄຳ ເປັນທີ່ປຶກສາຕິດຕາມການກໍ່ສ້າງ ແລະ ບໍລິສັດຈິດຈະເລີນ ກໍ່ສ້າງ ຈຳກັດ ຜູ້ດຽວ ເປັນຜູ້ຮັບເໝົາກໍ່ສ້າງ ເຊິ່ງປະ ກອບມີ 7 ໜ້າວຽກເຊັ່ນ: ວຽກງານກໍ່ສ້າງອາຄານຫ້ອງການ ກອງບັນຊາການ 3 ຊັ້ນ ລັກສະນະຮູບໂຕຢູ ມີເນື້ອທີ່ກໍ່ສ້າງ 2,920 ຕາແມັດ ມີທັງໝົດ 80 ຫ້ອງ ແລະ ຫ້ອງປະຊຸມໃຫຍ່ ອີກ 1 ຫ້ອງ, ວຽກງານກໍ່ສ້າງປ້ຳຍາມທາງເຂົ້າ 1 ຊັ້ນ ມີ 3 ຫ້ອງ ເນື້ອທີ່ 87 ຕາແມັດ. ວຽກງານກໍ່ສ້າງລານຈອດລົດຄະນະກອງບັນຊາການ ເນື້ອທີ 901 ຕາແມັດ, ວຽກງານປັບປຸງຖົມດິນເນີ້ອທີ່ທັງໝົດ 208,395 ຕາແມັດ.

ວຽກງານຕາຂ່າຍໄຟຟ້ານອກອາຄານ, ວຽກງານຕິດຕັ້ງລະບົບໂທລະສັບ, ລະບົບສາຍແລ່ນ, ອິນເຕີເນັດ, ລະບບົກອງວົງຈອນ, ລະບົບໂປເຈັກເຕີ, ເຄື່ອງສຽງຫ້ອງປະຊຸມ ແລະ ລະບົບປັບອາກາດ; ວຽກງານກໍ່ສ້າງທາງລົດ ແລະ ຮ່ອງລະບາຍນ້ຳ ລວມມູນຄ່າກໍ່ສ້າງທັງໝົດ 48 ຕື້ ໂຄງການກໍ່ສ້າງແມ່ນໄດ້ເລີ່ມລົງມືກໍ່ສ້າງມາແຕ່ ວັນທີ 3 ສິງຫາ 2016 ແລະ ໄດ້ສຳເລັດການກໍ່ສ້າງ 100% ໃນວັນທີ 31 ພະຈິກ 2019 ລວມໄລຍະການກໍ່ສ້າງ 26 ເດືອນ.

ໃນພິທີ ທ່ານ ພົນຈັດຕະວາ ສົມຈັນ ແກ້ວຈັນດາ ຫົວໜ້າກອງບັນຊາການປ້ອງກັນຄວາມສະຫງົບແຂວງ ຫຼວງພະບາງ ເຈົ້າຂອງໂຄງການ ແລະ ທ່ານ ຟອງ ວິໄລສັກ ຮອງຜູ້ອຳນວຍການ ບໍລິສັດຈິດຈະເລີນ ກໍ່ສ້າງ ຈຳກັດ ຜູ້ດຽວຜູ້ຮັບໝົດການກໍ່ສ້າງ ໄດ້ຮ່ວມກັນລົງນາມເຊັ່ນບົດບັນທຶກມອບ-ຮັບ ຢ່າງສົມກຽດ ໂດຍມີທ່ານລັດຖະມົນຕີກະຊວງປ້ອງກັນຄວາມສະຫງົບ, ທ່ານເຈົ້າແຂວງ ຫຼວງພະບາງ ພ້ອມດ້ວຍພາກສ່ວນທີກ່ຽວຂ້ອງເຂົ້າຮ່ວມເປັນສັກຂີພະຍານ.

ຈາກນັ້ນ ທ່ານ ພົນໂທ ວິໄລ ຫຼ້າຄຳຟອງ ລັດຖະມົນຕີກະຊວງປ້ອງກັນຄວາມສະຫງົບ, ທ່ານ ຄຳຂັນ ຈັນທະວີສຸກ ເຈົ້າແຂວງຫຼວງພະບາງ, ມີຕາງໜ້າກົມ, ພະແນກການກ່ຽວຂ້ອງຂອງແຂວງ, ພ້ອມດ້ວຍພະນັກງານສອງຝ່າຍ ກໍ່ໄດ້ຮ່ວມກັນຕັດແຖບຜ້າ, ປ່ອຍໝາກປຸມເປົ້າ ແລະ ປຸກຕົ້ນໄມເພື່ອເປັນສິລິມຸງຄຸນໃຫ້ແກ່ການມອບ-ຮັບ ພ້ອມທັງທ່ຽວຊົມອາຄານກໍ່ສ້າງຫຼັງໃໝ່ຕື່ມ.

ທີ່ມາ: