ເຕືອນ! ສູບຢາ ຫຼື ຂາຍຢາສູບຢູ່ຄິວລົດສາຍໃຕ້ ອາດຖືກປັບໃໝສູງເຖິງ 1 ລ້ານກີບ

470

ໜັງສືພິມວຽງຈັນໃໝ່ລາຍງານເມື່ອວັນທີ 22 ພະຈິກ 2019 ໃຫ້ຮູ້ວ່າ: ກະຊວງໂຍທາທິການ ແລະ ຂົນສົ່ງຮ່ວມກັບກະຊວງສາທາລະນະສຸກ ແລະ ຄະນະກໍາມະການແຫ່ງຊາດ ເພື່ອການຄວບຄຸມຢາສູບໄດ້ຈັດພິທີປະກາດສະຖານີຂົນສົ່ງລົດໂດຍສານສາຍໃຕ້ທີ່ຕັ້ງຢູ່ເສັ້ນທາງ 450ປີ ບ້ານສະພັງເມິກ ເມຶືອງໄຊທານີ ນະຄອນຫຼວງວຽງຈັນ ເປັນເຂດປອດຄວັນຢາສູບຂຶ້ນ ໃນວັນທີ 21 ພະຈິກ 2019 ໃຫ້ກຽດເຂົ້າຮ່ວມຂອງທ່ານ ວຽງສະຫວັດ ສີພັນດອນ ຮອງລັດຖະມົນຕີກະຊວງໂຍທາທິການ ແລະ ຂົນສົ່ງ, ທ່ານ ພອນປະເສີດ ອຸນາພົມ ຮອງຫົວໜ້າກົມອະນາໄມ ແລະ ກັນພະຍາດກະຊວງສາທາລະນະສຸກ, ທ່ານ ອໍານວຍການສະຖານີຂົນສົ່ງລົດໂດຍສານສາຍໃຕ້ ພ້ອມດ້ວຍຜູ້ປະກອບການດ້ານຂົນສົ່ງ ແລະ ເຈົ້າໜ້າທີ່ກ່ຽວຂ້ອງເຂົ້າຮ່ວມ

ທ່ານ ວຽງສະຫວັດ ສີພັນດອນ ກ່າວວ່າ: ການກໍານົດເອົາສະຖານີຂົນສົ່ງ ແລະ ລົດໂດຍສານສາທາລະນະປອດຄວັນຢາສູບ ໝາຍເຖິງບໍ່ໃຫ້ມີການສູບຢາ ແລະ ຊື້ຂາຍຜະລິດຕະພັນຢາສູບພາຍໃນຂອບເຂດສະຖານີທັງໝົດທີ່ມີປ້າຍຫ້າມສູບຢາ ຫຼື ບໍ່ໃຫ້ຜູ້ຂັບຂີ່ (ໂຊເຟີ), ຜູ້ຂັບລົດຕຸກໆ, ຈໍາໂບ້, ລົດສາມລໍ້ ແລະ ລົດຈັກ, ຮັບຈ້າງທຸກປະເພດສູບຢາໃນຂະນະມາປະຕິບັດໜ້າທີ່ຕະຫຼອດຮອດຜູ້ໂດຍສານກໍບໍ່ອະນຸຍາດໃຫ້ສູບຢາໃນຂະນະລໍຖ້າຂຶ້ນລົດຢູ່ໃນຄິວລົດແຫ່ງນີ້ ຫຼື ຢູ່ໃນລົດໂດຍສານກໍ່ເຊັ່ນກັນ. ສໍາລັບຜູ້ທີ່ຕ້ອງການຢາກສູບຢາ ແມ່ນກໍານົດໃຫ້ສູບຢູ່ບໍລິເວນທີ່ຄະນະຮັບຜິດຊອບຈັດໄວ້ໃຫ້ສະເພາະເທົ່ານັ້ນ.

ພາບປະກອບ

ການຈັດໃຫ້ສະຖານີຂົນສົ່ງເປັນເຂດປອດຄວັນຢາສູບໃນຄັ້ງນີ້ ໄດ້ຕິດປ້າຍຫ້າມສູບຢາພາຍໃນຕົວອາຄານຂອງສະຖານີລານຈອດລົດ ແລະ ພາຍໃນພາຫະນະຕ່າງໆ ແລະ ຫ້າມບໍ່ໃຫ້ມີການໂຄສະນາ ຫຼື ຕິດປ້າຍໂຄສະນາຜະລິດຕະພັນຢາສູບທຸກຊະນິດໃນສະຖານີ ແລະ ພາຍໃນພາຫະນະຕ່າງໆ. ດັ່ງນັ້ນ ຈຶ່ງຮຽກຮ້ອງມາຍັງເຈົ້າໜ້າທີ່, ພະນັກງານປະຈໍາສະຖານີ ແລະ ຜູ້ຂັບຂີ່ທຸກຄົນທີ່ມີພັນທະ ແລະ ໜ້າທີ່ຈົ່ງໃຫ້ຄວາມຮ່ວມມືປະຕິບັດລະບຽບດັ່ງກ່າວ.

ພາບປະກອບ

ສໍາລັບການປະຕິບັດລະບຽບຕໍ່ຜູ້ທີ່ລະເມີດ ຖ້າຫາກພົບເຫັນຈະຖືກກ່າວເຕືອນ ແລະ ປັບໃໝຕາມອັດຕາທີ່ລະບຸໄວ້ໃນດໍາລັດວ່າດ້ວຍການປັບໄໝ ແລະ ຈະໃຊ້ມາດຕະການເດັດຂາດຕໍ່ຜູ້ລະເມີດລະບຽບການດັ່ງກ່າວຢ່າງເຂັ້ມງວດຄື:

ພາບປະກອບ

ຖ້າພົບເຫັນມີການສູບຢາໃນສະຖານທີ່ຫ້າມສູບຢາຄັ້ງທີ 1 ຈະຖືກສຶກສາອົບຮົມ ແລະ ກ່າວເຕືອນ, ຄັ້ງທີ 2 ຈະຖືກປັບໄໝ 2ແສນກີບ ແລະ ຄັ້ງທີ 3 ຂຶ້ນໄປ ຈະຖືກປັບໄໝຄັ້ງລະ 4 ແສນກີບ ແລະ ຖ້າຫາກພົບເຫັນມີການຂາຍ ຫຼື ຈໍາໜ່າຍຜະລິດຕະພັນຢາສູບໃນສະຖານທີ່ເກືອດຫ້າມ ພາຍຫຼັງກ່າວເຕືອນແລ້ວຈາກຄັ້ງທີ 2 ຍັງເຮັດອີກຈະຖືກປັບໄໝ 1 ລ້ານກີບ ຫຼື ມີການລະເມີດອີກເປັນຄັ້ງທີ 3 ຂຶ້ນໄປ ຈະຖືກປັບໄໝຄັ້ງລະ 1 ລ້ານກີບ