ອອກພັນສານີ້ ລາຄາດອກດາວເຮືອງອາດປັບຂຶ້ນ

282

ໃກ້ເຂົ້າມາແລ້ວບຸນອອກພັນສາ ປະຈໍາປີ 2019 ລາຄາດອກໄມ້ທີ່ປະຊາຊົນລາວມັກໃຊ້ເຂົ້າໃນການປະກອບພິທີທາງສາສະໜາອາດປັບຂຶ້ນໂດຍສະເພາະແມ່ນດອກດາວເຮືອງ ເຊິ່ງແມ່ຄ້າສ່ວນຫຼາຍບອກວ່າດອກດາວເຮືອງສາຍພັນໄທອາດມີທ່າອ່ຽງລາຄາສູງຂຶ້ນ ເຖິງ 25 – 30 ພັນກີບຕໍ່ກິໂລ,ຂະນະທີ່ສາຍພັນຂອງລາວ ລາຄາອາດເໜັງຂຶ້ນເລັກໜ້ອຍ ຫຼື ອາດຄົງທີ່ ເນື່ອງຈາກຄວາມແຕກຕ່າງດ້ານຄຸນນະພາບ.

ໃນວັນທີ 7 ຕຸລາ 2019 ທີມຂ່າວເສດຖະກິດ – ການຄ້າ ໄດ້ລົງສໍາພາດບັນດາຮ້ານທີ່ເຮັດພາຂວັນ ແລະ ໝາກເບັງຂາຍຢູ່ເຂດວັດສີເມືອງ ໂດຍແມ່ຕູ້ແມວ ເຈົ້າຂອງຮ້ານຂາຍໝາກເບັງ ໃຫ້ຮູ້ວ່າ: ລາຄາດອກດາວເຮືອງ ມີການເໜັງຕີງຢູ່ຕະຫຼອດມື້ຕໍ່ມື້ ແຕ່ຈະຂຶ້ນສູງໃນໄລຍະທີ່ມີບຸນປະເພນີຕ່າງໆ ໂດຍສະເພາະແມ່ນໄລຍະເຂົ້າພັນສາ ໂດຍລາຄາດອກດາວເຮືອງພັນໄທຈະມີລາຄາສູງເຖິງ 40 ພັນກີບຕໍ່ກິໂລ, ຖ້າໄລຍະໃດຂາດຕະຫຼາດ ດອກດາວເຮືອງສາຍພັນລາວກໍຈະໄດ້ໂອກາດຂຶ້ນລາຄາເຊັ່ນກັນ ແຕ່ກໍບໍ່ຫຼຸດລື່ນກັນຫຼາຍ; ສະເພາະໄລຍະນີ້ ເຊິ່ງເປັນໄລຍະໃກ້ຈະອອກພັນສາ ລາຄາດອກດາວເຮືອງ ຢູ່ທີ່ 5 – 10 ພັນກີບຕໍ່ກິໂລ ແຕ່ຖ້າຮອດໄລຍະມື້ບຸນແທ້ເຊື່ອວ່າຈະປັບຂຶ້ນອີກແນ່ນອນ ເຊິ່ງວ່າດອກດາວເຮືອງສ່ວນຫຼາຍທີ່ຊື້ມາແມ່ນນໍາເຂົ້າຈາກປະເທດເພື່ອນບ້ານ ເຊິ່ງເປັນທີ່ນິຍົມຫຼາຍກວ່າດອກດາວເຮືອງສາຍພັນລາວ ເນື່ອງຈາກບໍ່ແຫ່ວໄວ, ບໍ່ຊໍ້າງ່າຍ.

ທ່ານ ອຸໄດ ອໍາພອນຍະລາດ ຜູ້ປູກດອກດາວເຮືອງສາຍພັນໄທ ຢູ່ບ້ານດຸງ ເມືອງໄຊເສດຖາ ນະຄອນຫຼວງວຽງຈັນ ໃຫ້ຮູ້ວ່າ: ດອກດາວເຮືອງສາຍພັນໄທ ມີຕົ້ນທຶນການຜະລິດທີ່ສູງ ເນື່ອງຈາກນໍາເຂົ້າແນວພັນສະເພາະຈາກປະເທດເພື່ອນບ້ານ, ມີຂັ້ນຕອນການເບິ່ງແຍງຮັກສາທີ່ຫຍຸ້ງຍາກ ເພາະວ່າຕ້ອງນໍາໃຊ້ດິນທີ່ປູກສາຍພັນໄທໂດຍສະເພາະ, ສ່ວນລາຄາຂາຍປັດຈຸບັນນີ້ແມ່ນຢູ່ທີ່ 15 ພັນກີບຕໍ່ກິໂລ ແຕ່ໃນທ້າຍອາທິດນີ້ ເຊິ່ງກົງກັບມື້ບຸນອອກພັນສາ ເຊື່ອວ່າລາຄາຈະສູງຂຶ້ນຢູ່ທີ່ 25 – 30 ພັນກີບຕໍ່ກິໂລ ເນື່ອງຈາກວ່າເປັນໄລຍະທີ່ມີການນໍາໃຊ້ດອກໄມ້ຫຼາຍ, ເຮັດໃຫ້ການສະໜອງບໍ່ພຽງພໍ ຈຶ່ງເຮັດໃຫ້ລາຄາດອກດາວເຮືອງສາຍພັນໄທຈະແພງຂຶ້ນ. ແນວໃດກໍຕາມ, ດອກໄມ້ທີ່ຂາຍຢູ່ລາວເຮົາສ່ວນຫຼາຍຍັງມີການນໍາເຂົ້າເປັນສ່ວນຫຼາຍ. ດັ່ງນັ້ນ, ການຜະລິດ ແລະ ສົ່ງເສີມນໍາໃຊ້ສິນຄ້າພາຍໃນ ຈຶ່ງເປັນສິ່ງທ້າທາຍສໍາລັບຜູ້ຜະລິດພາຍໃນ.

ແມ່ຕູ້ໂລ້ ແມ່ຄ້າຂາຍດອກໄມ້ສາຍພັນລາວ ຢູ່ຕະຫຼາດໂນນຄໍ້ ເມືອງໄຊເສດຖາ ນະຄອນຫຼວງວຽງຈັນ ກ່າວວ່າ: ພາຍໃນຕະຫຼາດແຫ່ງນີ້ແມ່ນຂາຍແຕ່ດອກດາວເຮືອງສາຍພັນລາວ ເຊິ່ງຮັບມາຈາກແມ່ຄ້າທີ່ນໍາມາສົ່ງໃຫ້ຢູ່ໃນຕະຫຼາດ ໂດຍລາຄາໃນໄລຍະນີ້ຢູ່ທີ່ 2 – 3 ພັນກີບຕໍ່ກິໂລ ແຕ່ຖ້າເປັນໄລຍະບຸນປະເພນີຕ່າງໆລາຄາກໍຈະປັບຂຶ້ນເລັກໜ້ອຍ ເນື່ອງຈາກໄລຍະນັ້ນການນໍາໃຊ້ດອກດາວເຮືອງສາຍພັນໄທ ບໍ່ພຽງພໍຕໍ່ຄວາມຕ້ອງການຂອງຕະຫຼາດ, ດອກດາວເຮືອງສາຍພັນລາວຈະເປັນທາງເລືອກໃຫ້ແກ່ຜູ້ຊົມໃຊ້.

ເມື່ອເວົ້າເຖິງເຫດຜົນທີ່ດອກດາວເຮືອງສາຍພັນໄທ ມີລາຄາແພງ ແຕ່ກໍໄດ້ຮັບ ຄວາມນິຍົມ ນາງ ນ້ອຍ ລູກຄ້າຊື້ດອກດາວເຮືອງສາຍພັນໄທເປັນປະຈໍາ ໃຫ້ຮູ້ວ່າ: ສໍາລັບຕົນເອງອາດເປັນຍ້ອນຄວາມເຊື່ອສ່ວນຕົວ ທີ່ເມື່ອເວລາເຮັດບຸນ ຫຼື ຕັກບາດຢາດນໍ້າ, ເຮັດພິທີກໍາຕ່າງໆແມ່ນຢາກໄດ້ເຄື່ອງຂອງທີ່ມີຄວາມສວຍງາມ, ດອກໄມ້ກໍເຊັ່ນກັນ ເຊິ່ງດອກດາວເຮືອງສາຍພັນໄທ ສາມາດຕອບໂຈດໃຫ້ຕົນເອງໄດ້ ເນື່ອງຈາກວ່າມັນເປັນດອກໃຫຍ່, ງາມ, ບໍ່ແຫ່ວງ່າຍ, ຮັກສາຮູບລັກໄວ້ໄດ້ງາມ ແລະ ດົນກວ່າດອກດາວເຮືອງສາຍພັນລາວ. ດັ່ງນັ້ນ, ລາຄາທີ່ແພງຂຶ້ນ ຫຼື ຖືກລົງຈະບໍ່ເປັນບັນຫາໃຫ້ກັບຕົນເອງ.

ທີ່ມາ: ໜັງສືພິມ ເສດຖະກິດ-ການຄ້າ