ຊາວໜຸ່ມເດີນທະເລ ອາຊຽນ – ຍີ່ປຸ່ນ ຄັ້ງທີ 46 ເນັ້ນໃສ່ກິດຈະກຳ ຮັກສາສິ່ງແວດລ້ອມ ແລະ ການພັດທະນາແບບຍືນຍົງ

352

ວັນທີ 5 ຕຸລາ 2019 ຄະນະຊາວໜຸ່ມລາວເດີນທະເລ ອາຊຽນ – ຍີ່ປຸ່ນ ໄດ້ຈັດກິດຈະກຳສະແດງສິລະປະ ຂຶ້ນທີ່ຫໍວັດທະນະທຳແຫ່ງຊາດ ໂດຍເຂົ້າຮ່ວມເປັນປະທານຂອງ ທ່ານ ປອ. ນາງ ສູນທອນ ໄຊຍະຈັກ ຫົວໜ້າຄະນະພົວພັນການຕ່າງປະເທດ ສູນກາງພັກປະຊາຊົນ ປະຕິວັດລາວ, ທ່ານ ນາງ ວິລະວອນ ພັນທະວົງ ຮອງເລຂາຄະນະບໍລິຫານງານສູນກາງຊາວໜຸ່ມ ປະຊາຊົນ ປະຕິວັດລາວ ພ້ອມດ້ວຍບັນດາທ່ານຮອງລັດຖະມົນຕີ, ຜູ້ຕາງໜ້າທູດ ແລະ ພາກສ່ວນທີ່ກ່ຽວຂ້ອງຕ່າງໆເຂົ້າຮ່ວມ.

ທ່ານ ຈັນຖະໜອມ ແທ່ງທອງ ຫົວໜ້າຄະນະຊາວໜຸ່ມລາວ ໂຄງການຊາວໜຸ່ມເດີນທະເລ ອາຊຽນ – ຍີ່ປຸ່ນ ຄັ້ງທີ 46 ປະຈຳປີ 2019 ໄດ້ກ່າວວ່າ: ໂຄງການຊາວໜຸ່ມເດີນທະເລ ອາຊຽນ – ຍີ່ປຸ່ນຄັ້ງນີ້, ຄະນະຊາວໜຸ່ມລາວຈະເລີ່ມຕົ້ນການເດີນທາງລະ ຫວ່າງວັນທີ 23 ຕຸລາ ຫາ ວັນທີ 13 ທັນວາ 2019 ໂດຍຢ້ຽມຢາມທັງໝົດ 5 ປະເທດ ຄື: ປະເທດຍີ່ປຸ່ນ, ສສ ຫວຽດນາມ, ສິງກະໂປ, ມຽນມາ ແລະ ມາເລເຊຍ.

ເນັ້ນໃສ່ກິດຈະກຳຮັກສາສິ່ງແວດລ້ອມ ແລະ ການພັດທະນາແບບຍືນຍົງ ທັງໝົດ 9 ຫົວຂໍ້ ຄື: ການຫຼຸດຜ່ອນຄວາມສ່ຽງຈາກໄພພິບັດ ແລະ ການຟື້ນຟູໃຫ້ກັບສູ່ສະພາບປົກກະຕິ; ຄວາມຫຼາກຫຼາຍ ແລະ ການມີສ່ວນຮ່ວມໃນສັງຄົມ; ການສຶກສາ; ການຈ້າງງານ ແລະ ການມີວຽກເຮັດງານທຳທີ່ດີ; ສິ່ງແວດລ້ອມ ແລະ ຄວາມຍືນຍົງ; ສຸຂະພາບ ແລະ ການເປັນຢູ່ທີ່ດີ; ຂໍ້ມູນ – ຂ່າວສານ ແລະ ສື່ມວນຊົນ; ພະລັງຂອງຄວາມອ່ອນໂຍນ ແລະ ການທູດໄວໜຸ່ມ ແລະ ຜູ້ປະກອບການໄວໜຸ່ມ.

ນອກນັ້ນ, ໃນປີນີ້ ຄະນະຊາວໜຸ່ມລາວເດີນທະເລຍັງໄດ້ຈັດກິດຈະກຳກ່ອນການເດີນທະເລ ພາຍໃຕ້ຫົວຂໍ້ “ ໜຶ່ງແຮງສູ່ການປ່ຽນແປງທີ່ຍິ່ງໃຫຍ່ ” ເຊິ່ງມີ 2 ຮູບແບບ ເຊັ່ນ: ການລົງມືອະນາໄມດ້ວຍການເກັບຂີ້ເຫຍື້ອ ແລະ ການກະຈາຍຂໍ້ມູນ – ຂ່າວສານຜ່ານສື່ສັງຄົມອອນລາຍ. ຫຼັງຈາກທີ່ສຳເລັດການເດີນທະເລໃນຄັ້ງນີ້ ຄະນະຊາວໜຸ່ມລາວເດີນທະເລ ຈະສານຕໍ່ກິດຈະກຳຊ່ວຍເຫຼືອສັງຄົມ ໂດຍນຳເອົາ ຄວາມຮູ້, ທັກສະຕ່າງໆ ແລະ ການແລກປ່ຽນກັບບັນດາຊາວໜຸ່ມໃນປະເທດຍີ່ປຸ່ນ ແລະ ບັນດາປະເທດອາຊຽນ ເພື່ອໃຫ້ເກີດປະສິດທິພາບຫຼາຍກວ່າເກົ່າ.

ໂອກາດດັ່ງກ່າວ, ທ່ານ ນາງ ວິລະວອນ ພັນທະວົງ ໄດ້ສະແດງຄວາມຊົມເຊີຍຕໍ່ຄວາມກຽມພ້ອມຂອງຄະນະຊາວໜຸ່ມລາວເດີນທະເລ ທີ່ຈະໄປຖອດຖອນບົດຮຽນ, ແລກປ່ຽນຄວາມຮູ້ – ຄວາມສາມາດ, ແລກປ່ຽນສິລະປະ – ວັດທະນະທຳກັບບັນດາປະເທດ ເພື່ອຈະນຳເອົາຄວາມຮູ້ດັ່ງກ່າວມາຊ່ວຍເຫຼືອສັງຄົມ ປະກອບສ່ວນໃນການພັດທະນາປະເທດຊາດ.

ນອກຈາກນັ້ນ, ຍັງມີການສະແດງສິລະປະ – ວັດທະນະທຳອັນດີງາມຂອງ ສປປ ລາວ ທີ່ທາງຄະນະຊາວໜຸ່ມລາວເດີນທະເລ ອາຊຽນ – ຍີ່ປຸ່ນ ໄດ້ກະກຽມມາເປັນເວລາ 3 ເດືອນ ເພື່ອທີ່ຈະໄປແລກປ່ຽນໃນຄັ້ງນີ້ອີກດ້ວຍ.