ສປ ຈີນ ຈັດພິທີສະເຫຼີມສະຫຼອງວັນສະຖາປະນາ ຄົບຮອບ 70 ປີຂຶ້ນຢ່າງຍິ່ງໃຫຍ່ຄືກຄື້ນ

363

cri, ວັນທີ 1 ຕຸລານີ້, ພິທີສະເຫຼີມສະຫຼອງວັນສະຖາປະນາ ສປ ຈີນຄົບຮອບ 70 ປີໄດ້ຈັດຂຶ້ນຢູ່ສະໜາມຫຼວງທ່ຽນອ່ານເມີນທີ່ນະຄອນຫຼວງປັກກິ່ງ. ທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນ, ປະທານປະເທດຈີນ, ປະທານຄະນະກຳມະການການທະຫານສູນກາງຈີນໄດ້ກ່າວປາໄສສຳຄັນ.

ຫຼັງຈາກນັ້ນແມ່ນພິທີສວນສະໜາມທີ່ຍິ່ງໃຫຍ່ມະໂຫລານ ເຊິ່ງເປັນຄັ້ງທຳອິດທີ່ກອງທັບຈີນເຂົ້າຮ່ວມການສວນສະໜາມຫຼັງການປະຕິຮູບ ເຊິ່ງມີນາຍແລະພົນທະຫານ 15.000 ຄົນ ເຊິ່ງເປັນການສວນສະໜາມທີ່ມີຂະໜາດໃຫຍ່ທີ່ສຸດໃນຊຸມປີມໍ່ໆມານີ້. ຫຼັງການສວນສະໜາມແລ້ວ, ຈະແມ່ນການແຫ່ຂະບວນທີ່ມີປະຊາຊົນເຂົ້າຮ່ວມປະມານ 1 ແສນຄົນ.

ໃນ 70 ປີມານີ້, ເສດຖະກິດສັງຄົມຂອງຈີນໄດ້ຮັບການພັດທະນາທີ່ປະຈັກຕາຊາວໂລກ ເຊິ່ງໄດ້ເຮັດໃຫ້ຈີນຈາກປະເທດທີ່ທຸກຍາກແລະອ່ອນແອພັດທະນາເປັນກຸ່ມເສດຖະກິດໃຫຍ່ທີສອງໃນໂລກ, ປະເທດໃຫຍ່ອັນດັບໜຶ່ງດ້ານສິນຄ້າການຄ້າທີ່ຈັບຕ້ອງໄດ້, ປະເທດໃຫຍ່ອັນດັບໜຶ່ງດ້ານຄັງສຳຮອງເງິນຕາຕ່າງປະເທດ, ປະເທດໃຫຍ່ອັນດັບສອງດ້ານການລົງທຶນຕໍ່ຕ່າງປະເທດ.

ທ່ານສີຈິ້ນຜິງ ຜູ້ນຳສູງສຸດຂອງຈີນກ່າວວ່າ: ອະດີດຂອງຈີນໄດ້ຖືກບັນທຶກໄວ້ຢູ່ໃນປະຫວັດສາດແລ້ວ, ມື້ນີ້ຂອງຈີນພວມໄດ້ຮັບການປະດິດສ້າງດ້ວຍປະຊາຊົນຫຼາຍຮ້ອຍລ້ານຄົນ, ອະນະຄົດຂອງຈີນຈະດີງາມກວ່າເກົ່າຢ່າງແນ່ນອນ.

ໃນພິທີສະເຫຼີມສະຫຼອງວັນສະຖາປະນາ ສປ ຈີນຄົບຮອບ 70 ປີ, ທ່ານສີຈິ້ນຜິງໄດ້ຮຽກຮ້ອງໃຫ້ສະມາຊິກທົ່ວພັກ ທົ່ວກອງທັບ ແລະ ປະຊາຊົນບັນດາເຜົ່າໃນທົ່ວປະເທດຈົ່ງສາມັກຄີກັນຢ່າງແໜ້ນແຟ້ນກວ່າເກົ່າ, ສືບຕໍ່ປັບປຸງແລະພັດທະນາສາທາລະນະລັດປະຊາຊົນຈີນໃຫ້ດີ, ສືບຕໍ່ບາກບັ່ນສູ້ຊົນເພື່ອບັນລຸເປົ້າໝາຍສູ້ຊົນຮ້ອຍປີ 2 ເຫດການ ແລະບັນລຸຄວາມໄຝ່ຝັນຈີນທີ່ຟື້ນຟູຄວາມຈະເລີນຮຸ່ງເຮືອງອັນຍິ່ງໃຫຍ່ຂອງປະຊາຊາດຈີນ.