ຕິດຕາມລົດ 3 ຄ້າຍ ໃນງານວຽງຈັນມໍເຕີ ເອັກໂປ 2019

444

ງານວາງສະແດງລົດນາໆຊາດ ວຽງຈັນ 2019 ຫຼື Vientiane international Motor Expo 2019 ໄດ້ເລີ່ມມາແຕ່ທ້າຍອາທິດຜ່ານມາ ພາຍໃຕ້ຫົວຂໍ້ຖືກ, ປະຢັດ ແລະ ທັນສະໄໝ. ຈຸດເດັ່ນໃນງານແມ່ນລົດທີ່ນໍາໃຊ້ພະລັງງານໄຟຟ້າ, ພ້ອມນັ້ນ ຍັງມີລົດ 3 ຍີ່ຫໍ້ ເຂົ້າມາເປີດຕະຫຼາດໃໝ່ຢູ່ລາວ. ໃນນັ້ນ, ເດັ່ນກວ່າໝູ່ແມ່ນລົດໄຟຟ້າຍີ່ຫໍ້ BYD ເຊິ່ງເປັນລົດທີ່ໃຊ້ພະລັງງານໄຟຟ້າ ສາມາດສາກໄຟຟ້າໃນຄົວເຮືອນໄດ້.

ທ່ານ ພອນຈັນ ເພັງສຸວັນ ຜູ້ອໍານວຍການ ບໍລິສັດ ພີພີໄຊໂຍ ເອັນເຕີເທັນເມັນ ແອນອໍການາຍເຊີ ຈໍາກັດຜູ້ດຽວ ໄດ້ກ່າວໃນງານຖະແຫຼງຂ່າວ ວ່າ: ຈຸດປະສົງຂອງງານເພື່ອຕອບໂຈດໃຫ້ກັບບໍລິສັດ, ຫ້າງຮ້ານທີ່ຈໍາໜ່າຍລົດ ແລະ ຜະລິດຕະພັນຕົກແຕ່ງລົດ ລວມໄປເຖິງ ຄວາມຮຽກຮ້ອງຕ້ອງການຂອງບັນດາລູກຄ້າຜູ້ຊົມໃຊ້ລົດໄດ້ເຂົ້າມາພົບປະແລກປ່ຽນ ແລະ ຮັບຮູ້ນະວັດຕະກໍາໃໝ່ໆຂອງລົດໃນແຕ່ລະຄ້າຍ – ແຕ່ລະລຸ້ນ ເພື່ອເປັນຂໍ້ມູນໃນການຕັດສິນເປັນເຈົ້າຂອງລົດ.

ສ່ວນກິດຈະກໍາພາຍໃນງານ ມີການທົດລອງຂັບລົດທີ່ໃຊ້ພະລັງງານໄຟຟ້າບໍ່ເສຍຄ່າ, ເກມໝູນວົງລໍ້ລຸ້ນລາງວັນ, ມີການວາງສະແດງລົດ, ກິດຈະກໍາຈາກຜູ້ຈັດງານ, ລຸ້ນຮັບສາຍຄໍຄໍາ, ພວງກຸນແຈ, ເສື້ອຢືດ, ບັດສ່ວນຫຼຸດເຄືອບແກ້ວລົດ. ນອກນັ້ນ, ຍັງມີການທັດສະນະສຶກສາຮ່ວມຟັງການບັນຍາຍກົດລະບຽບຈະລາຈອນ. ພ້ອມດຽວກັນ, ກໍຍັງໄດ້ມີການຈັດວາງສະແດງຜະລິດຕະພັນເຄື່ອງກົນຈັກໜັກ ເປັນຕົ້ນແມ່ນລົດໂມ້ປູນ, ລົດຍິງປູນ, ລົດເຄນ, ລົດຈັກ ແລະ ຜະລິດຕະພັນຕ່າງໆ. ພິເສດພາຍໃນງານຍັງມີການສະແດງຄອນເສີດຈາກສິລະປິນທັງພາຍໃນ ແລະ ປະເທດເພື່ອນບ້ານ.

ຄາດໝາຍຜູ້ເຂົ້າຮ່ວມຊົມງານ 4 ແສນເທື່ອຄົນ ສໍາລັບລົດທີ່ເຂົ້າຮ່ວມວາງສະແດງໃນງານມີ 13 ຍີ່ຫໍ້ ລວມລົດ 20 ກວ່າລຸ້ນ ເດັ່ນກວ່າໝູ່ແມ່ນລົດທີ່ນໍາໃຊ້ພະລັງງານໄຟຟ້າ ຈາກຍີ່ຫໍ້ BYD ເຊິ່ງມີ 2 ລຸ້ນໃຫ້ເລືອກ ມາພ້ອມກັບຫົວສາກທີ່ສາມາດຕິດຕັ້ງໄຟຟ້າໃນຄົວເຮືອນໄດ້ ເຊິ່ງໄດ້ຮັບຄວາມສົນໃຈຈາກປະຊາຊົນເປັນຈໍານວນຫຼາຍ. ພ້ອມນັ້ນ, ກໍແມ່ນລະບົບຫົວສາກໄຟຟ້າຈາກ ບໍລິສັດ ອີວີ ລາວ.

ສໍາລັບຍີ່ຫໍ້ລົດໃໝ່ທີ່ເຂົ້າຮ່ວມງານ 3 ຍີ່ຫໍ້ຖືເປັນການເປີດຕະຫຼາດໃນ ສປປ ລາວ ໄດ້ແກ່ຍີ່ຫໍ້ BYD, GAC MOTOR ແລະ ຄ້າຍ Volkswagen ເຊິ່ງໄດ້ນໍາລົດບໍ່ຕໍ່າກວ່າ 10 ລຸ້ນເຂົ້າມາຮ່ວມປະຊັນຄວາມຫຼູຫຼາ, ເຕັກໂນໂລຊີໃໝ່ໆ ໂດຍສະເພາະແມ່ນລົດທີ່ນໍາໃຊ້ພະລັງງານໄຟຟ້າ.

ພິທີເປີດງານຈັດຂຶ້ນໃນວັນທີ 30 ກັນຍາ 2019 ໂດຍການເຂົ້າຮ່ວມຂອງ ທ່ານ ວຽງສະຫວັດ ສີພັນດອນ ຮອງລັດຖະມົນຕີກະຊວງໂຍທາທິການ ແລະ ຂົນສົ່ງ.

ງານວາງສະແດງລົດວຽງຈັນນາໆຊາດ 2019 ຈະຈັດໄປຈົນເຖິງວັນທີ 6 ຕຸລາ 2019 ທີ່ສູນການຄ້າ ລາວ – ໄອເຕັກ ນະຄອນຫຼວງວຽງຈັນ.