ກະຊວງ ອຄ ເນັ້ນເມືອງນາຊາຍທອງ ຄຸ້ມຄອງລາຄາສິນຄ້າ ຄຽງຄູ່ກັບສົ່ງເສີມການຜະລິດ

489

ຮອງລັດຖະມົນຕີກະຊວງອຸດສາຫະກໍາ ແລະ ການຄ້າ ( ອຄ ) ເນັ້ນໃຫ້ເມືອງນາຊາຍທອງ ຄຸມເຂັ້ມການຄຸ້ມຄອງລາຄາສິນຄ້າບໍ່ໃຫ້ມີການສວຍໃຊ້ໂອກາດເອົາລັດເອົາປຽບຜູ້ຊົມໃຊ້. ພ້ອມນີ້, ການຄຸ້ມຄອງສິນຄ້າກໍຕ້ອງກວດສອບໃຫ້ດີ ແລະ ບໍ່ໃຫ້ມີການກັກຕຸນສິນຄ້າເພື່ອສວຍໂອກາດຂຶ້ນລາຄາ. ຄຽງຄູ່ກັນນັ້ນ, ກໍໃຫ້ສຸມໃສ່ສົ່ງເສີມໃຫ້ປະຊາຊົນຜະລິດສິນຄ້າອອກສູ່ຕະຫຼາດຫຼາຍຂຶ້ນ.

ກອງປະຊຸມສ່ອງແສງສັນຈອນ ພະແນກອຸດສາຫະກໍາ ແລະ ການຄ້າ ນະຄອນຫຼວງວຽງຈັນ ( ອຄ.ນວ ) ໄດ້ຈັດຂຶ້ນໃນວັນທີ 30 ກັນຍາ 2019 ທີ່ຫ້ອງວ່າການປົກຄອງເມືອງນາຊາຍທອງ ນະຄອນຫຼວງວຽງຈັນ ໂດຍ  ການເຂົ້າຮ່ວມຂອງ ທ່ານ ພັນທອງ ພິດທຸມມາ ຮອງລັດຖະມົນຕີກະຊວງ ອຄ, ທ່ານ ອາດສະພັງທອງ ສີພັນດອນ ຮອງເຈົ້າຄອງນະຄອນຫຼວງວຽງຈັນ, ຫົວໜ້າພະແນກ ອຄ ນະຄອນຫຼວງວຽງຈັນ, ຫົວໜ້າຫ້ອງການ ອຄ ຂອງ 9 ຕົວເມືອງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ທ່ານ ພອນທິບ ຍົກໄຊຍະຄໍາ ຫົວໜ້າຫ້ອງການ ອຄ ເມືອງນາຊາຍທອງ ໄດ້ລາຍງານກ່ຽວກັບການຈັດຕັ້ງປະຕິບັດວຽກງານຂະແໜງ ອຄ ໃນທົ່ວເມືອງ ວ່າ: ເມືອງນາຊາຍທອງ ແມ່ນເມືອງອູ່ເຂົ້າອູ່ປາທີ່ສໍາຄັນໃນການຜະລິດສະບຽງອາຫານເຂົ້າສູ່ນະຄອນຫຼວງວຽງຈັນ. ພ້ອມນີ້, ກໍມີໂຮງຊ່າງຫັດຖະກໍາ, ໂຮງງານອຸດສາຫະກໍາ, ມີຕະຫຼາດ, ຟາມ, ສູນຜະລິດກະສິກໍາ ແລະ ອື່ນໆ ທີ່ເປັນທ່າແຮງການສ້າງເສດຖະກິດຂອງເມືອງໄດ້ຂະຫຍາຍຕົວຢ່າງຕໍ່ເນື່ອງ. ນອກຈາກນີ້, ວຽກງານການຄ້າພາຍໃນກໍໄດ້ເອົາໃຈໃສ່ກວດກາສິນຄ້າໝົດອາຍຸເສື່ອມຄຸນນະພາບ ພ້ອມຢຶດທໍາລາຍຖິ້ມ, ໄດ້ເອົາໃຈໃສ່ການຄຸ້ມຄອງຕະຫຼາດ, ຄຸ້ມຄອງສິນຄ້າ, ລາຄາສິນຄ້າ ເພື່ອປົກປ້ອງຜູ້ຊົມໃຊ້ ພ້ອມລາຍງານໃຫ້ຂັ້ນເທິງຮັບຊາບຢ່າງເປັນປະຈຳ.

ຈາກນັ້ນ, ທ່ານ ພັນທອງ ພິດທຸມມາ ກໍໄດ້ມີຄໍາເຫັນເນັ້ນໃຫ້ໜ່ວຍງານຂະແໜງ ອຄ ຂອງ 9 ຕົວເມືອງ ໃນນະຄອນຫຼວງວຽງຈັນ ເວົ້າລວມ, ເວົ້າສະເພາະກໍຄືເມືອງນາຊາຍທອງ ໃຫ້ສືບຕໍ່ຄຸມເຂັ້ມຄຸ້ມຄອງສິນຄ້າໃຫ້ມີສະໜອງພຽງພໍພາຍໃນ, ບໍ່ໃຫ້ມີການກັກຕຸນສິນຄ້າ, ສວຍໂອກາດຂຶ້ນລາຄາເອົາປຽບຜູ້ຊົມໃຊ້, ຄຸມເຂັ້ມບໍ່ໃຫ້ມີການຫຼົບໜີພາສີ ຫຼື ລັກລອບນໍາເຂົ້າສິນຄ້າທີ່ບໍ່ໄດ້ຮັບອະນຸຍາດ, ຫຼີກເວັ້ນບໍ່ໃຫ້ມີສິນຄ້າໝົດອາຍຸມາຈໍາໜ່າຍ. ພ້ອມດຽວກັນນັ້ນ, ການຄຸ້ມຄອງລາຄາສິນຄ້າກໍຕ້ອງກວດກາໃຫ້ຢູ່ໃນເກນທີ່ກໍານົດ, ກວດກາບໍ່ໃຫ້ມີການຂຶ້ນລາຄາຕາມໃຈແມ່ຄ້າ. ນອກຈາກນີ້, ການສົ່ງເສີມການຜະລິດສິນຄ້າພາຍໃນກໍເປັນສິ່ງສໍາຄັນ ຕ້ອງສົ່ງເສີມໃຫ້ເກີດດອກອອກຜົນ ແຕ່ກ່ອນຈະເຮັດໄດ້ກໍຕ້ອງແມ່ນພາກລັດ ແລະ ເອກະຊົນຊ່ວຍເຫຼືອກັນ, ມີການປະສານສົມທົບກັນຕະຫຼອດເວລາ.

ທ່ານ ອາດສະພັງທອງ ສີພັນດອນ ກ່າວວ່າ: ການສົ່ງເສີມຜະລິດເປັນສິນຄ້າ ໃຫ້ສົ່ງເສີມຢ່າງມີຄວາມໝັ້ນຄົງ ພ້ອມຮັບປະກັນຄຸນນະພາບ ແລະ ຕ້ອງຕິດຕາມກວດກາການຈັດຕັ້ງປະຕິບັດວຽກງານໃຫ້ສອດຄ່ອງກັບແຕ່ລະຂະແໜງການ ທີ່ສໍາຄັນໃຫ້ມີການຕີລາຄາການປະຕິບັດວຽກງານໃນແຕ່ລະເດືອນໃຫ້ຂັ້ນເທິງຮັບຊາບຢ່າງລະອຽດ.