ນັກສຶກສາ 112 ຄົນ 3 ສາຂາວິຊາຈາກວິທະຍາໄລ ສອນພິທັກລາວ ພ້ອມຮັບໃຊ້ສັງຄົມ

435

ວັນທີ 28 ກັນຍາ 2019 ວິທະຍາໄລສອນພິທັກລາວ ( ສພລ ) ໄດ້ຈັດພິທີສະຫຼຸບສົກຮຽນ 2018 – 2019 ພ້ອມທັງມອບໃບປະກາດໃຫ້ແກ່ນັກສຶກສາທີ່ສຳເລັດການສຶກສາ ແລະ ມອບໃບຍ້ອງຍໍໃຫ້ແກ່ຄູ – ອາຈານ ແລະ ນັກສຶກສາທີ່ດີເດັ່ນ ແລະ ມີຜົນງານດ້ານຂະບວນການ ແລະ ການສຶກສາຮໍ່າຮຽນໃນສົກຜ່ານມາ ໂດຍການເຂົ້າຮ່ວມຂອງ ທ່ານ ຄຳພອນ ໄຊສົມພູຫົວໜ້າຫ້ອງການສະພາທີ່ປຶກສາການສຶກສາພາກເອກະຊົນ, ທ່ານ ສຸກັນ ສຸວັນນະຈັນມີຫົວໜ້າຫ້ອງການສຶກສາເມືອງສີສັດຕະນາກ, ທ່ານ ປະນົມສອນຫຼວງສຸວັນນະວົງ ຜູ້ອຳນວຍການ ສພລ ພ້ອມດ້ວຍບັນດາຄູ – ອາຈານ ແລະ ນ້ອງນັກສຶກສາເຂົ້າຮ່ວມ.

ທ່ານ ປະນົມສອນ ຫຼວງສຸວັນນະວົງ ໄດ້ກ່າວວ່າ: ຕະຫຼອດໄລຍະສົກປີ 2018 – 2019 ຜ່ານມາ, ສພລ ໄດ້ເອົາໃຈໃສ່ປະຕິບັດການຮຽນ – ການສອນຕາມຫຼັກສູດທີ່ໄດ້ຮັບອະນຸຍາດຈາກກະຊວງສຶກສາທິການ ແລະ ກີລາ, ໄດ້ເອົາໃຈໃສ່ປະຕິບັດການສິດສອນຕາມ 3 ລັກສະນະ ແລະ 5 ຫຼັກມູນຂອງການສຶກສາແຫ່ງຊາດ. ພ້ອມນັ້ນ, ບັນດາຄູ – ອາຈານກໍໄດ້ຕັ້ງໜ້າໃນການສຶກສາຄົ້ນຄວ້າ, ສ້າງແຜນການສອນ ແລະ ແຕ່ງບົດສອນຕາມວິຊາສະເພາະໃຫ້ແທດເໝາະກັບສະພາບຕົວຈິງ. ສົກປີຜ່ານມາມີນັກສຶກສາສາມາດຈົບການສຶກສາທັງໝົດ 112 ຄົນ ໃນຈຳນວນ 120 ຄົນ.

ເຖິງຢ່າງໃດກໍຕາມ, ໃນສົກປີຜ່ານມາ ສພລ ຍັງມີຈຸດອ່ອນບາງດ້ານ ແລະ ຍັງມີລັກສະນະສະເພາະໜ້າເທົ່ານັ້ນ ເປັນຕົ້ນແມ່ນຍັງມີນັກສຶກສາ 4 ຄົນ ທີ່ເສັງບໍ່ຜ່ານ ແລະ 4 ຄົນໂຈະການສຶກສາຍ້ອນຄວາມຈຳເປັນ. ສະນັ້ນ, ໃນສົກປີ 2019 – 2020 ນີ້ ສພລ ຈະໄດ້ສືບຕໍ່ປັບປຸງລະບົບການຈັດຕັ້ງ ແລະ ແຜນການຮຽນ – ການສອນໃຫ້ເຂັ້ມແຂງຂຶ້ນ.

ໂອກາດນີ້, ທ່ານ ຄຳພອນ ໄຊສົມພູ ໄດ້ສະແດງຄວາມຊົມເຊີຍຕໍ່ຜົນສຳເລັດຂອງ ສພລ ໃນສົກປີຜ່ານມາ ພ້ອມທັງໃຫ້ທິດຊີ້ນຳບາງປະການ ເຊັ່ນ: ສພລ ຕ້ອງເອົາໃຈໃສ່ຕື່ມໃນການນຳເອົາລະບົບໄອທີ ເຂົ້າໃນແຕ່ລະສາຂາວິຊາຕື່ມ ເພື່ອພັດທະນາແຕ່ລະສາຂາວິຊາໃຫ້ມີຄວາມໂດດເດັ່ນຂຶ້ນ, ນັກສຶກສາທີ່ຈົບການສຶກສາຕ້ອງເອົາໃຈໃສ່ຕື່ມໃນການສຶກສາຄົ້ນຄວ້າ ແລະ ທົບທວນບົດຮຽນ ເພື່ອໃຫ້ສາມາດນຳໃຊ້ ຄວາມຮູ້ດັ່ງກ່າວມາປະຍຸກໃຊ້ໃຫ້ໄດ້ ແລະ ປາກົດຜົນເປັນຈິງ.

ໃນຕອນທ້າຍພິທີ ສພລ ຍັງໄດ້ມີພິທີມອບໃບປະກາດໃຫ້ແກ່ນ້ອງນັກສຶກສາທັງໝົດ 112 ຄົນ ໃນ 3 ສາຂາວິຊາ ຄື: ການພັດທະນາໂປຣແກຣມເມີ 38 ຄົນ, ພາສາອັງກິດທຸລະກິດ 59 ຄົນ ແລະ ການເງິນ – ການກວດສອບບັນຊີ ຈຳນວນ 15 ຄົນ.

ຂ່າວ: ກາວຊົ່ງ