ລັດຖະມົນຕີສາທາລົງພື້ນທີ່ເອງ ວາງແຜນຟື້ນຟູຫຼັງນ້ຳລົງ

403

ພາຍຫຼັງທີ່ທ່ານ ຮສ.ດຣ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກພ້ອມຄະນະໄດ້ສໍາເລັດການລົງເຄື່ອນໄຫວຊຸກຍູ້ວຽກງານຫຼັງນໍ້າຫຼຸດລົງ ຢູ່ບັນດາແຂວງພາກໃຕ້ແລ້ວ ໃນຕອນບ່າຍຂອງວັນທີ 27 ກັນຍາ 2019 ທ່ານກໍ່ໄດ້ລົງເຮັດວຽກຢູ່ຮ່ວມກັບຄະນະພະແນກສາທາລະນະສຸກແຂວງຄໍາມ່ວນພ້ອມດ້ວຍບັນດາທ່ານຮອງເຈົ້າເມືອງ, ຫົວໜ້າຫ້ອງການສາທາລະນະສຸກຈາກ 10 ເມືອງຂອງແຂວງຄໍາມ່ວນ ແລະ ພະນັກງານວິຊາການທີ່ກ່ຽວຂ້ອງ ໂດຍການຕ້ອນຮັບຂອງທ່ານ ນາງ ດຣ. ພາສຸກ ຄໍາມະນີທອງ ຮອງຫົວໜ້າພະແນກສາທາລະນະສຸກແຂວງ.

ທ່ານ ນາງ ດຣ. ພາສຸກ ຄໍາມະນີທອງ ຮອງຫົວໜ້າພະແນກສາທາລະນະສຸກແຂວງໄດ້ລາຍງານການກະກຽມຄວາມພ້ອມເພື່ອຕອບໂຕ້ໄພພິບັດນໍ້າຖ້ວມ ແລະ ສະພາບນໍ້າຖ້ວມທີ່ສົ່ງຜົນກະທົບໂດຍກົງໃສ່ການບໍລິການສຸຂະພາບເຊິ່ງແຂວງຄໍາມ່ວນໄດ້ຮັບຜົນກະທົບຈາກໄພນໍ້າຖ້ວມມີທັງໝົດ 06 ເມືອງຄື: ບົວລະພາ, ໄຊບົວທອງ, ຍົມມະລາດ, ມະຫາໄຊ, ເຊບັ້ງໄຟ ແລະ ໜອງບົກ, ມີ 231 ບ້ານ, 16.670ຄອບຄົວ, ປະຊາກອນ 69.844 ຄົນ, ໄດ້ຍົກຍ້າຍໄປຢູ່ເຂດທີ່ປອດໄພມີທັງໝົດ 36 ບ້ານ, ມີ 1.305 ຄອບຄົວ, ປະຊາກອນ 5.589ຄົນ, ໂຮງໝໍນ້ອຍຖືກນໍ້າຖ້ວມທັງໝົດ 11 ແຫ່ງ, ນໍ້າປະປາຊົນນະບົດທີ່ຖືກຖ້ວມ 09 ແຫ່ງ, ນໍ້າບາດານຖືກຖ້ວມ 723 ບໍ່, ນໍ້າສ້າງຖືກຖ້ວມ 119 ບໍ່, ວິດຖ່າຍຖືກຖ້ວມ 4.970 ໜ່ວຍ.

ຜົນກະທົບດັ່ງກ່າວໄດ້ເຮັດໃຫ້ປະຊາຊົນຂາດການເຂົ້າເຖິງການບໍລິການສຸຂະພາບ, ຂາດນໍ້າດື່ມ, ຂາດນໍ້າໃຊ້ ແລະ ບໍ່ມີການນໍາໃຊ້ວິດຖ່າຍ. ເຊິ່ງແຜນກະກຽມຄວາມພ້ອມເພື່ອຕອບໂຕ້ການບໍລິການໃນສະພາບນໍ້າຖ້ວມຜ່ານມາແມ່ນໄດ້ມີການວາງແຜນເປັນ 03 ໄລຍະຄື: ແຜນໄລຍະຮີບດ່ວນ ( ໄລະຍະນໍ້າກໍາລັງຖ້ວມ), ແຜນແກ້ໄຂໄລຍະກາງ ( ໄລຍະພາຍຫລັງນໍ້າແຫ້ງ ) ແລະ ແຜນຍາວນານ.

ສໍາລັບແຜນໄລຍະຮີບດ່ວນ ( ໄລະຍະນໍ້າກໍາລັງຖ້ວມ ) ແມ່ນໄດ້ມີການແຕ່ງຕັ້ງຫ້ອງການຂອງໜ່ວຍປະຕິບັດງານເພື່ອເຝົ້າລະວັງໄພພິບັດຂັ້ນເມືອງ ແລະ ຂັ້ນແຂວງຊຶ່ງໄດ້ປະຈໍາການ 24 ຊົ່ວໂມງ, ຍົກຍ້າຍສະຖານທີ່ບໍລິການ ແລະ ຍົກຍ້າຍປະຊາຊົນ, ໄດ້ແຕ່ງຕັ້ງທີມແພດຂອງເມືອງລົງເຄື່ອນໄຫວບໍລິການຕິດຕາມ, ກວດກາສະພາບສຸຂະພາບຂອງປະຊາຊົນ ແລະ ໂຄສະນາສຸຂະສຶກສາ, ພະແນກສາທາລະນະສຸກແຂວງໄດ້ລົງເຄື່ອນໄຫວຢ້ຽມຢາມ ແລະ ປະເມີນຜົນກະທົບຂອງສະພາບນໍ້າຖ້ວມຕໍ່ວຽກງານບໍລິການສຸຂະພາບ ແລະ ໄດ້ນໍາເອົາຢາປິ່ນປົວພະຍາດ ແລະ ອຸປະກອນການແພດທີ່ຈໍາເປັນເພື່ອລົງໄປມອບໃຫ້ 06 ເມືອງ, ຈົນມາຮອດວັນທີ 17 ກັນຍາ 2019  ສະພາບນໍ້າຖ້ວມຢູ່ແຕ່ລະຈຸດກໍໄດ້ລຸດລົງໄປຫລາຍແລ້ວປະຊາຊົນທີ່ຖືກຍົກຍ້າຍທັງຫລາຍກໍໄດ້ກັບໄປຢູ່ບ້ານເຮືອນຕາມປົກກະຕິແລ້ວ.

ສໍາລັບແຜນແກ້ໄຂໄລຍະກາງ ( ໄລຍະພາຍຫລັງນໍ້າແຫ້ງ ) ເປັນຕົ້ນວຽກຟື້ນຟູສະຖານທີ່ບໍລິການທີ່ຖືກນໍ້າຖ້ວມຕ້ອງການນໍາໃຊ້ງົບປະມານໃນວຽກນີ້ 1,2 ລ້ານກີບ, ເຄື່ອນໄຫວເຮັດ ກິດຈະກໍາຂອງໜ່ວຍແພດເຄື່ອນທີ່ຕ້ອງການນໍາໃຊ້ງົບປະມານໃນວຽກນີ້ 65 ລ້ານກີບ, ຂຶ້ນແຜນຄວາມຕ້ອງການດ້ານຢາປິ່ນປົວ ແລະ ອຸປະກອນການແພດທີ່ຈໍາເປັນຕ້ອງການນໍາໃຊ້ງົບປະມານຈຳນວນຫຼາຍ, ສະເພາະໄລຍະນີ້ຕ້ອງການ 311.182.000  ກີບ.

ກ່ຽວກັບແຜນຍາວນານແມ່ນຈຳເປັນຕ້ອງຟື້ນຟູວິດຖ່າຍ ແລະ ນໍ້າສະອາດ ມອບໃຫ້ໜ່ວຍງານນໍ້າສະອາດ-ອະນາໄມສິ່ງແວດລ້ອມເປັນຜູ້ຂຶ້ນແຜນຕ່າງຫາກ ພ້ອມທັງຂຽນແຜນສະເໜີຍົກຍ້າຍບາງໂຮງໝໍນ້ອຍຈາກບ່ອນເກົ່າໄປຢູ່ບ່ອນໃໝ່ທີ່ເໝາະສົມກວ່າເຊັ່ນ: ໂຮງໝໍນ້ອຍນາໂຊກ ເມືອງຍົມມະລາດ, ໂຮງໝໍນ້ອຍ ຖໍ້າລາຍ ເມືອງເຊບັ້ງໄຟ ແລະ ໂຮງໝໍນ້ອຍ ເວີນ ເມືອງມະຫາໄຊ. ນອກຈາກນີ້, ແຂວງຄໍາມ່ວນຍັງມີການລະບາດຂອງພະຍາດໄຂ້ຍຸງລາຍນັບແຕ່ວັນທີ1/1/2019-26/9/2019 ເຫັນວ່າທົ່ວແຂວງມີ 3.243 ກໍລະນີ ຫຼາຍກວ່າໝູ່ແມ່ນເມືອງຍົມມະລາດມີເຖິງ 1.256 ກໍລະນີ, ເສຍຊີວິດ 02 ຄົນ, ເມືອງທ່າແຂກເສຍຊີວິດ 01 ຄົນ ແລະ ເມືອງເຊບັ້ງໄຟເສຍຊີວິດ 01 ຄົນ.

ທ່ານ ຮສ. ດຣ ບຸນກອງ ສີຫາວົງ ໄດ້ມີຄໍາເຫັນໂອ້ລົມ ແລະ ໃຫ້ທິດຊີ້ນໍາຕໍ່ການນໍາແຕ່ລະຂັ້ນຂອງຂົງເຂດສາທາຢູ່ທ້ອງຖິ່ນເພື່ອນໍາໄປຈັດຕັ້ງປະຕິບັດເປັນຕົ້ນແມ່ນ 10 ຕົວຊີ້ວັດ, ການຄວບຄຸມພະຍາດຕິດຕໍ່ ( ໄຂ້ເລືອດອອກ ), ການກອບກູ້ຊີວິດ ແລະ ບໍລິການດ້ານສຸຂະພາບໃນໄລຍະໄພພິບັດນໍ້າຖ້ວມກໍ່ຄືການແກ້ໄຂຍົກຍ້າຍສຸກສາລາ ຫຼື ໂຮງໝໍນ້ອຍທີ່ຕັ້ງຢູ່ເຂດຕໍ່າມາຢູ່ບ່ອນສູງ ( ບ່ອນທີ່ມີຄວາມປອດໄພ ). ພ້ອມທັງເນັ້ນໜັກໃຫ້ເອົາໃຈໃສ່ໃນການຕິດຕາມ, ກວດກາ, ຮັກສາສຸຂະພາບຂອງພໍ່ແມ່ປະຊາຊົນພາຍຫຼັງນໍ້າບົກແຫ້ງເພື່ອຫຼີກລ້ຽງຈາກພະຍາດທີ່ຈະຕາມມາເຊັ່ນ: ພະຍາດໄຂ້ຫວັດ, ພະຍາດຕຸ່ມຄັນຕາມຜີວໜັງ, ອັກເສບຮູຄໍ, ອັກເສບປອດ, ໄຂ້ທໍລະພິດ, ຖອກທ້ອງ, ທ້ອງບິດ ແລະ ພະຍາດຕາແດງ.

ໃນໂອກາດທີ່ທ່ານລັດຖະມົນຕີກະຊວງສາທາລະນະສຸກພ້ອມດ້ວຍຄະນະໄດ້ລົງມາເຄື່ອນໄຫວຕິດຕາມສະພາບໄພພິບັດພາຍຫຼັງນໍ້າຫຼຸດລົງທີ່ແຂວງຄໍາມ່ວນທ່ານກໍ່ໄດ້ມອບຢາປິ່ນປົວພະຍາດຈໍານວນ 01 ຊຸດ, ລວມມີ 03 ແກັດ, ປະກອບມີ 12 ລາຍການໃຫ້ແກ່ພະແນກສາທາລະນະສຸກແຂວງເພື່ອປະກອບສ່ວນເຂົ້າໃນການຮັກສາສຸຂະພາບຂອງພໍ່ແມ່ປະຊາຊົນບັນດາເຜົ່າທີ່ຖືກຜົນກະທົບຈາກໄພນໍ້າຖ້ວມ.