ຮອງນາຍົກ ເນັ້ນຫຼວງນ້ຳທາເພີ່ມການຜະລິດພາຍໃນເພື່ອຫຼຸດການນໍາເຂົ້າ

258

ໃນວັນທີ 3 ກັນຍາ 2019 ນີ້, ທ່ານ ສົມດີ ດວງດີ ຮອງນາຍົກລັດຖະມົນຕີລັດຖະມົນຕີກະຊວງການເງິນ ພ້ອມດ້ວຍຄະນະ ໄດ້ລົງເຄື່ອນຊຸກຍູ້ວຽກງານເກັບລາຍຮັບ ຢູ່ແຂວງຫລວງນ້ຳທາ, ພ້ອມທັງໃຫ້ທິດຊີ້ນໍາຕໍ່ຄະນະພັກ, ຄະນະນຳ ພະນັກງານຂະແໜງການເງິນແຂວງ ພ້ອມກັນເອົາໃຈໃສ່ຕໍ່ໜ້າທີ່ວຽກງານທີ່ຕົນຮັບຜິດຊອບໃຫ້ສໍາເລັດ. ເຖິງແມ່ນວ່າສະພາບເສດຖະກິດຝືດເຄືອງ, ສະພາບການເງິນມີຄວາມຫຍຸ້ງຍາກ ໂດຍສະເພາະແມ່ນຂະແໜງການເງິນ ຈົ່ງເພີ່ມທະວີສຸມໃສ່ຈັດຕັ້ງປະ ຕິບັດໜ້າທີ່ວຽກງານ ໃນການເກັບລາຍຮັບຂອງແຕ່ລະຂະແໜງໃຫ້ໄດ້ຕາມແຜນການວາງໄວ້.

ພ້ອມດຽວກັນນີ້, ຕ້ອງໄດ້ເພີ່ມຄວາມຮັບຜິດຊອບ, ເອົາໃຈໃສ່ປະຢັດມັດທະຍັດ, ປຸກລະດົມຊຸກ ຍູ້ການຜະລິດພາຍໃນ ນໍາໃຊ້ໃນສິ່ງທີ່ເຮົາມີ, ສາມາດຜະລິດໄດ້ເພື່ອທົດແທນການນໍາເຂົ້າ; ເມື່ອມີເຄື່ອງມືນໍາໃຊ້ເກັບລາຍຮັບກ້າວໄປສູ່ທັນສະໄໝ ຍິ່ງມີຄວາມສໍາຄັນທີ່ຈະຕ້ອງໄດ້ຍົກລະດັບຄວາມຮູ້ຄວາມສາມາດຂອງພະນັກງານ, ເພີ່ມຄວາມຮັບຜິດຊອບໃຫ້ສູງຂຶ້ນ ໃນການເຮັດວຽກງານຈິ່ງຈະເຮັດໃຫ້ ການພັດທະນາເສດຖະກິດ-ສັງຄົມ ຂອງແຂວງມີປະສິດທິພາບ ແລະ ໄດ້ຜົນສໍາເລັດດ້ວຍດີ.

ທ່ານ ອ່ອນຈັນ ຄຳພາວົງ ຫົວໜ້າພະແນກການເງິນ ແຂວງຫລວງນ້ຳທາ ໃຫ້ຮູ້ວ່າ: ສະເພາະໃນ 7 ເດືອນປີ 2019 ການຈັດຕັ້ງປະຕິບັດແຜນງົບປະມານແຫ່ງລັດ ລາຍຮັບພູດສູນກາງ ສາມາດບັນລຸໄດ້ 186,4 ຕື້ກີບ ເທົ່າກັບ 60,32% ຂອງແຜນການປີ 309 ຕື້ກວ່າກີບ; ທຽບໃສ່ໄລຍະດຽວກັນເພີ່ມຂຶ້ນ 27,64%. ໃນນີ້, ລາຍຮັບພາສີ 152,5 ຕື້ກວ່າກີບ, ລາຍຮັບສ່ວຍສາອາກອນ 26,6 ຕື້ກວ່າກີບ, ລາຍຮັບຄຸ້ມຄອງຊັບສິນຂອງລັດ 7,2 ຕື້ກີບ, ລາຍຮັບຄຸ້ມຄອງວິສາຫະກິດລັດລົງທຶນ ແລະ ປະ ກັນໄພປະຕິບັດໄດ້ 20 ລ້ານກີບ. 

ສ່ວນລາຍຮັບພູດທ້ອງຖິ່ນ ປະຕິບັດໄດ້ 73 ຕື້ກວ່າກີບ ເທົ່າກັບ 71,10% ຂອງແຜນການປີ 104 ຕື້ກວ່າກີບ ເພີ່ມຂຶ້ນ 21%. ໃນນີ້, ລາຍຮັບສ່ວຍສາອາກອນປະຕິບັດໄດ້ 68 ຕື້ກວ່າກີບ ເທົ່າກັບ 70,37% ຂອງແຜນການປີ ເພີ່ມຂຶ້ນ 23,55%, ລາຍຮັບຄຸ້ມຄອງຊັບສິນຂອງລັດປະຕິບັດໄດ້ 5,8 ຕື້ກວ່າກີບ ແລະ ໄດ້ສໍາເລັດຝຶກອົບຮົມດ້ານວິຊາການ ໃຫ້ແກ່ພະນັກງານການເງິນຂັ້ນບ້ານສາມສ້າງໃນ 5 ເມືອງ ມີ 362 ບ້ານ, ໄດ້ຕັ້ງການເງິນຂັ້ນບ້ານແລ້ວ 278 ບ້ານເທົ່າກັບ 76,80% ຂອງບ້ານທັງໝົດ