ການກໍ່ສ້າງໂຮງງານປຸງແຕ່ງມັນຕົ້ນ ຄາດຈະສຳເລັດ ແລະ ເປີດນໍາໃຊ້ເດືອນຕຸລານີ້

548

ໃນໂອກາດທີ່ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກຳ ແລະ ການຄ້າ ພ້ອມຄະນະ ໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງເຊກອງ ໃນລະຫວ່າງວັນທີ 26-27 ສິງຫາ 2019 ຜ່ານມານີ້ ທ່ານ ພ້ອມດ້ວຍຄະນະ ໄດ້ລົງເຄື່ອນໄຫວຕິດຕາມກວດກາການກໍ່ສ້າງໂຮງງານມັນຕົ້ນ ຄູນມີໄຊ ຢູ່ເມືອງທ່າແຕງ ແຂວງ ເຊກອງ ແລະ ຢ້ຽມຢາມ, ຕິດຕາມໂຮງງານຕ່າງໆຫຼາຍແຫ່ງຢູ່ແຂວງເຊກອງຕື່ມອີກ ໂດຍມີທ່ານ ເຫຼັກໄຫຼ ສີວິໄລ ຮອງເຈົ້າແຂວງໆເຊກອງ, ທ່ານ ພັນສອນ ແສນສົ່ງເສີມ ຫົວໜ້າພະແນກອຸດສາຫະກຳ ແລະ ການຄ້າແຂວງ ໃຫ້ການຕ້ອນຮັບ ແລະ ນໍາພາການເຄື່ອນໄຫວໃນຄັ້ງນີ້.

ທ່ານ ໄຊວິມານ ກູ່ແກ້ວ ຕ່າງໜ້າ ບໍລິສັດ ມັນຕົ້ນ ຄູນມີໄຊ ໄດ້ລາຍງານວ່າ: ໂຮງງານປຸງແຕ່ງມັນຕົ້ນຄູນມີໄຊໄດ້ສ້າງເປັນເວລາ 1 ປີ ກັບ 4 ເດືອນ, ເຊິ່ງມາຮອດປັດຈຸບັນແມ່ນສຳເລັດແລ້ວ 95%, ມີມູນຄ່າການລົງທຶນທັງໝົດ 4,8 ລ້ານໂດລາສະຫະລັດ, ໂຮງງານປຸງແຕ່ງມັນຕົ້ນມີພະນັກງານ ແລະກຳມະກອນທີ່ຈະຮັບໃຊ້ຢູ່ພາຍໃນໂຮງງານ ຈຳນວນ 100 ຄົນ, ເຊິ່ງມີພະນັກງານພາຍໃນ ແລະ ແຮງງານຕ່າງປະເທດທີ່ເປັນວິຊາການ. ສຳລັບວັດຖຸດິບທີ່ຈະປ້ອນເຂົ້າໂຮງງານ ແມ່ນເປັນມັນຕົ້ນດິບ ເຊິ່ງສ່ວນໃຫຍ່ແມ່ນເກັບຊື້ຢູ່ໃນສອງເມືອງຄື: ເມືອງທ່າແຕງ ແລະ ເມືອງລະມາມ.

ນອກຈາກນີ້, ຍັງໄດ້ເກັບຊື້ຢູ່ແຂວງໃກ້ຄຽງ ຄື ແຂວງສາລະວັນ, ຜະລິດຕະພັນຕົ້ນຕໍຂອງໂຮງງານແມ່ນຜະລິດອອກເປັນສິນຄ້າສຳເລັດຮູບ ເພື່ອຈຳໜ່າຍຢູ່ພາຍໃນ ແລະ ສົ່ງອອກໄປຕ່າງປະເທດ ເປັນຕົ້ນແມ່ນສົ່ງອອກໄປປະເທດ ສສ ຫວຽດນາມ. ສຳລັບວຽກງານສິ່ງແວດລ້ອມ ແມ່ນໄດ້ມີບໍລິສັດທີ່ປຶກສາສິ່ງແວດລ້ອມ ແລະ ໄດ້ປະສານງານກັບວິຊາການພາກລັດ, ໂດຍໄດ້ເຮັດການສຶກສາສິ່ງແວດລ້ອມແບບລະອຽດຕາມມາດຕະຖານສາກົນ ໂດຍໄດ້ຮັບການຮັບຮອງຢັ້ງຢືນຈາກກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ, ເຊິ່ງຄາດຄະເນຈະໃຫ້ສໍາເລັດ ແລະ ເປີດໃຊ້ຢ່າງທາງການໃນເດືອນຕຸລາ ປີ 2019 ນີ້.

ໂອກາດດຽວກັນນີ້ ທ່ານ ນາງ ເຂັມມະນີ ພົນເສນາ ພ້ອມຄະນະຍັງໄດ້ເດີນທາງໄປຢ້ຽງຢາມເບິ່ງໂຮງງານຜະລິດນ້ຳຕານອໍແກນິກ ແລະ ຟາມງົວ ຂອງບໍລິສັດແມ່ຂອງຮ່ວມທຸລະກິດ ຢູ່ບ້ານຕິ້ວ ເມືອງ ລະມາມ ແລະ ຕິດຕາມກວດກາການກໍ່ສ້າງສູນການຄ້າຂອງແຂວງເຊກອງຕື່ມອີກ.