ທູດຈີນປະຈຳລາວຊີ້ແຈງເຫດລົດເມນັກທ່ອງທ່ຽວຈີນຕົກເຫວ, ພ້ອມເນັ້ນວຽກທີ່ເລັ່ງດ່ວນເຮັດ 4 ດ້ານ

318

ຕາມຂ່າວ CRI: ວັນທີ 20 ສິງຫານີ້, ທ່ານ ຈ່ຽງຈ້າຍຕຸ່ງ ເອກອັກຄະລັດຖະທູດ ສປ ຈີນ ປະຈຳ ສປປ ລາວໄດ້ເດີນທາງໄປນະຄອນຫຼວງພະບາງເພື່ອຢ້ຽມຢາມ ແລະ ສະແດງຄວາມເຫັນໃຈຕໍ່ຜູ້ບາດເຈັບໃນອຸບັດຕິເຫດລົດໂດຍສານນັກທ່ອງທ່ຽວຈີນຕົກເຫວ, ພ້ອມທັງຈັດກອງປະຊຸມກັບພາກສ່ວນທີ່ກ່ຽວຂ້ອງຂອງຝ່າຍລາວ ແລະຖະແຫຼງຂ່າວ ເພື່ອຊີ້ແຈງສະພາບການຂອງການຊ່ວຍເຫຼືອກູ້ໄພໃນເຫດການດັ່ງກ່າວ.

ຂ່າວແຈ້ງວ່າ: ວັນທີ 19 ສິງຫາ 2019 ນີ້, ລົດໂດຍສານທີ່ໄດ້ບັນທຸກນັກທ່ອງທ່ຽວຈີນ ຈາກນະຄອນຫຼວງວຽງຈັນມຸ່ງໜ້າສູ່ນະຄອນຫຼວງພະບາງ ໄດ້ເກີດອຸບັດຕິເຫດຢ່າງຮ້າຍແຮງ ທີ່ເສັ້ນທາງກາສີ-ເມືອງນານ ຂະນະທີ່ເດີນທາງຮອດຂົວນໍ້າງາວ, ເຊິ່ງເຮັດໃຫ້ຄົນຈີນ 13 ຄົນເສຍຊີວິດ, ແລະ 31 ຄົນ ບາດເຈັບ.

ທ່ານ ຈ່ຽງຈ້າຍຕຸ່ງ ກ່າວວ່າ: ພວກເຮົາຂໍສະແດງຄວາມເສົ້າສະຫຼົດໃຈຕໍ່ຜູ້ປະສົບເຄາະຮ້າຍ ທັງສະແດງຄວາມເຫັນໃຈຢ່າງຈິງໃຈມາຍັງຄອບຄົວຂອງຜູ້ປະສົບເຄາະຮ້າຍກໍ່ຄືຜູ້ບາດເຈັບທັງໝົດ. ພາຍຫຼັງໄດ້ຊາບຂ່າວການເກີດອຸບັດຕິເຫດດັ່ງກ່າວແລ້ວ, ສະຖານທູດຈີນປະຈຳລາວ ກໍ່ຄືສະຖານກົງສູນໃຫຍ່ຈີນປະຈຳຫຼວງພະບາງ ກໍ່ໄດ້ຈັດຕັ້ງປະຕິບັດການຊ່ວຍເຫຼືອກູ້ໄພຢ່າງທັນການ ໂດຍທ່ານ ຈ່ຽງຈ້າຍຕຸ່ງ ໄດ້ໂທລະສັບຕິດຕໍ່ຫາເຈົ້າໜ້າທີ່ກະຊວງການຕ່າງປະເທດ, ປກສ, ປກຊ ກໍ່ຄື ຖວທ ເພື່ອປະສານສົມທົບກັບຝ່າຍລາວ ໃຫ້ຂົນຂວາຍກຳລັງເພື່ອຊອກຄົ້ນຫາ ແລະ ຊ່ວຍເຫຼືອຜູ້ບາດເຈັບ. ຂະນະທີ່ທີມແພດກອງທັບຈີນທີ່ພວມເຂົ້າຮ່ວມການຝຶກຊ້ອມ “ຂະບວນລົດໄພສັນຕິພາບ 2019” ຢູ່ທີ່ນະຄອນຫຼວງວຽງຈັນ ກໍ່ໄດ້ຂີ່ຍົນເຮລີຄອບເຕີໄປດຳເນີນການຊ່ວຍເຫຼືອກູ້ໄພຢູ່ສະຖານທີ່ເກີດເຫດໃນຕອນຮຸ່ງເຊົ້າຂອງວັນທີ 20 ສິງຫານີ້.

 ທ່ານ ຈ່ຽງຈ້າຍຕຸ່ງ ກ່າວວ່າ: ພາຍໃຕ້ຄວາມພະຍາຍາມຮ່ວມກັນຂອງສອງຝ່າຍຈີນ-ລາວ, ການຊ່ວຍເຫຼືອກູ້ໄພຢູ່ຈຸດເກີດເຫດໄດ້ສຳເລັດເປັນຢ່າງດີ  ໂດຍສອງຝ່າຍຈະສຸມໃສ່ການປິ່ນປົວຜູ້ບາດເຈັບ ກໍ່ຄືການແກ້ໄຂບັນຫາພາຍຫຼັງເປັນວຽກງານເລັ່ງດ່ວນ ໂດຍຈະເນັ້ນໃສ່ 4 ດ້ານຄື: 1.ເພີ່ມທະວີການປະສານງານຂອງສອງຝ່າຍເພື່ອປິ່ນປົວຜູ້ບາດເຈັບໃຫ້ດີທີ່ສຸດ; 2.ຮັກສາສົບຂອງຜູ້ເສຍຊີວິດ ແລະ ແກ້ໄຂບັນຫາພາຍຫຼັງໃຫ້ດີ; 3.ຕ້ອນຮັບຄອບຄົວຂອງນັກທ່ອງທ່ຽວກຸ່ມນີ້ທີ່ໄດ້ເດີນທາງມາຢ້ຽມຢາມ ແລະ ເບິ່ງແຍງເຂົາເຈົ້າໃຫ້ດີ; 4.ແນະນໍາບໍລິສັດທ່ອງທ່ຽວໃຫ້ແກ້ໄຂບັນຫາພາຍຫຼັງໃຫ້ດີ.
ຂ່າວ: ທ.ຍາວ, ນ.ດາ