ບີເອັນໄອ ລາວ ຈັດງານພົບປະກຸ່ມນັກທຸລະກິດ ແລະ ອວຍພອນປີໃໝ່ລາວ 2019

369

ບັນດານັກທຸລະກິດທີ່ເປັນສະມາຊິກຂອງບີເອັນໄອ ລາວ ( BNI Lao ) ໄດ້ຈັດງານພົບປະສັງສັນເພື່ອແລກປ່ຽນບົດຮຽນເຊິ່ງກັນ ແລະ ກັນ ທັງເປັນການອວຍພອນປີໃໝ່ລາວທີ່ຈະມາເຖິງນີ້. ຈຸດປະສົງຫຼັກແມ່ນການເຕົ້າໂຮມຄວາມສາມັກຄີບັນດາຜູ້ປະກອບການທີ່ເຮັດທຸລະກິດໃນຫຼາຍສາຂາອາຊີບໄດ້ເຂົ້າມາສົນທະນາເລື່ອງທຸລະກິດ ແລະ ຈັບມືກັນກ້າວໄປຂ້າງໜ້າພາຍໃຕ້ການຊ່ວຍເຫຼືອເຊິ່ງກັນ ແລະ ກັນ.

ທ່ານ ນາງ ພິມພອນ ດວງສະຫວັນ ປະທານ BNI Lao ກ່າວວ່າ: ບີເອັນໄອ ແມ່ນເນັດເວີກຄິງ ຂອງຫຼາຍກວ່າ 70 ປະເທດໃນໂລກ ໄດ້ມີການສ້າງຕັ້ງຢູ່ລາວ ນັບແຕ່ປີ 2014 ເປັນຕົ້ນມາ ເຊິ່ງເປັນການເຕົ້າໂຮມເອົາບັນດານັກທຸລະກິດພາຍໃນເປັນກຸ່ມເພື່ອແລກປ່ຽນບົດຮຽນ, ຊ່ວຍເຫຼືອເຊິ່ງກັນ ແລະ ກັນ ໂດຍມີໂຄງສ້າງ, ລະບົບບໍລິຫານຈັດການ ແລະ ເຄື່ອງມືຕ່າງໆທີ່ມາແນະນຳໃຫ້ສະມາຊິກເພື່ອຕໍ່ຍອດທຸລະກິດຂອງທຸກຄົນໃຫ້ຂະຫຍາຍຕົວໄປເລື້ອຍໆ ເຊິ່ງການເຂົ້າເປັນສະມາຊິກຂອງ ບີເອັນໄອ ລາວ ກໍຈະເປັນການສົ່ງຕໍ່ທຸລະກິດທີ່ຕົນມີຢູ່ເພື່ອແລກປ່ຽນ ຫຼື ຈັບຄູ່ທຸລະກິດກັບບໍລິສັດອື່ນໆທີ່ຢູ່ພາຍໃນກຸ່ມກໍສາມາດເຮັດໄດ້.

ທ່ານ ອານຸສິດ ຫຼວງລາດ ຮອງປະທານ ບີເອັນໄອ ລາວ ກ່າວຕື່ມວ່າ: ຈຸດປະສົງຂອງການເຕົ້າໂຮມກັນແມ່ນເພື່ອການຮຽນຮູ້, ແລກປ່ຽນປະສົບການເຊິ່ງກັນ ແລະ ກັນ ບໍ່ວ່າທ່ານຈະເຮັດທຸລະກິດໃນສາຂາທີ່ແຕກຕ່າງກັນ, ຖ້າຫາກເຮົາເປັນຜູ້ໃຫ້ແລ້ວວັນໜຶ່ງເຮົາກໍຈະໄດ້ຮັບສິ່ງເຫຼົ່ານັ້ນກັບຄືນມາເຊັ່ນກັນ.

ກ່ອນໜ້ານັ້ນ, ທ່ານ ທັດສະນາຈອນ ບຸນທັນ ຜູ້ອຳນວຍການ ບີເອັນໄອ ລາວ ໄດ້ກ່າວວ່າ: BNI ຫຍໍ້ມາຈາກ Business International ເຊິ່ງເປັນອົງກອນທີ່ເຊື່ອມໂຍງບັນດາທຸລະກິດສາກົນທີ່ໃຫຍ່ທີ່ສຸດ ແລະ ໄດ້ຮັບຜົນສຳເລັດທີ່ສຸດໃນໂລກ ໂດຍປັດຈຸບັນເປົ້າໝາຍຂອງ ບີເອັນໄອ ແມ່ນຕ້ອງການຊ່ວຍເຫຼືອບັນດາທຸລະກິດຂະໜາດນ້ອຍ ແລະ ກາງ ເພື່ອເປັນການເປີດໂອກາດໃນການຮ່ວມມືທຸລະກິດທີ່ມີຄວາມຕ້ອງການ ແລະ ກ່ຽວພັນເຊິ່ງກັນ ແລະ ກັນ, ມີການແລກປ່ຽນທາງການຄ້າໃນບັນຍາກາດສິ່ງແວດລ້ອມທີ່ເປັນມິດ ແລະ ຊ່ວຍເຫຼືອກັນ ເພື່ອການຂະຫຍາຍຕົວຂອງທຸລະກິດ.

ພາຍໃນງານຍັງໄດ້ເປີດໂອກາດໃຫ້ບັນດາເຈົ້າຂອງທຸລະກິດທີ່ເຂົ້າຮ່ວມໄດ້ນຳສະເໜີຮູບແບບທຸລະກິດຂອງຕົນເອງ, ເປົ້າໝາຍການໃຫ້ບໍລິການ, ຄວາມຕ້ອງການໃນດ້ານຂອງຄູ່ຮ່ວມທຸລະກິດ ແລະ ກຸ່ມລູກຄ້າຫຼັກຂອງຕົນເອງ ເພື່ອໃຫ້ບໍລິສັດອື່ນໄດ້ຮູ້ຈັກ ແລະ ເປັນຄູ່ຮ່ວມທີ່ມີຄວາມຕ້ອງການແບບດຽວກັນ ເຊິ່ງງານດັ່ງກ່າວຈັດຂຶ້ນໃນທ້າຍອາທິດຜ່ານມາ ທີ່ຮ້ານອາຫານຊ້າງແກ້ວທະວີໂຊກ ເມືອງໄຊທານີ ນະຄອນຫຼວງວຽງຈັນ.