ເຈົ້າແຂວງສາລະວັນ ເນັ້ນເລັ່ງຟື້ນຟູການທ່ອງທ່ຽວ ແລະ ພັດທະນາແຫຼ່ງທ່ອງທ່ຽວຕາດເລາະ-ຕາດຮັງ

63

ທ່ານ ໂພໄຊ ໄຊຍະສອນ ເຈົ້າແຂວງໆສາລະວັນ ເຄື່ອນໄຫວຢ້ຽມຢາມ, ຊຸກຍູ້ການພັດທະນາ ແລະ ທ່ຽວຊົມສະຖານທີ່ທ່ອງທ່ຽວ ຕາດເລາະ-ຕາດຮັງ ໂດຍໄດ້ເນັ້ນໃຫ້ຂະແໜງການທີ່ກ່ຽວຂ້ອງ ສືບຕໍ່ເອົາໃຈໃສ່ໃນການພັດທະນາ ແລະ ເລັ່ງຟື້ນຟູການທ່ອງທ່ຽວໃຫ້ວ່ອງໄວ, ທ່ວງທັນ ເພື່ອຫັນເອົາການທ່ອງທ່ຽວໃຫ້ກາຍເປັນອຸດສາຫະກໍາ, ປັບປຸງບັນດາພື້ນຖານໂຄງລ່າງ, ສ້າງສິ່ງອຳນວຍຄວາມສະດວກ, ກິດຈະກຳການທ່ອງທ່ຽວ ໃຫ້ມີຫຼາຍສີສັນ, ຫຼາຍທາງເລືອກໃຫ້ກັບນັກທ່ອງທ່ຽວ ໂດຍສະເພາະປັບປຸງຄືນຈຸດທີ່ໄດ້ຮັບຜົນກະທົບຈາກລົມພາຍຸ, ເປ່ເພ ເພື່ອຮອງຮັບໃຫ້ແກ່ການທ່ອງທ່ຽວໃນໄລຍະບຸນປີໃໝ່ລາວ ທີ່ຈະມາເຖິງນີ້.

ພ້ອມດຽວກັນນັ້ນ, ຕ້ອງເອົາໃຈໃສ່ຄຸ້ມຄອງ ແລະ ອະນຸລັກຮັກສາຄວາມສົມບູນສິ່ງແວດລ້ອມ, ທຳມະຊາດ ເປັນການທ່ອງທ່ຽວ ທີ່ປອດມົນລະພິດ ຕິດພັນກັບການທ່ຽວຊົມວິຖີຊີວິດຂອງປະຊາຊົນບັນດາເຜົ່າ.

ແຫຼ່ງທ່ອງທ່ຽວຕາດເລາະ-ຕາດຮັງ ເປັນແຫຼ່ງທ່ອງທ່ຽວທີ່ໄດ້ຮັບຄວາມນິຍົມຊົມຊອບຈາກນັກທ່ອງທ່ຽວທັງພາຍໃນ ແລະ ຕ່າງປະເທດ, ສາມາດດຶງດູດເອົານັກທ່ອງທ່ຽວເຂົ້າມາທ່ຽວແຂວງສາລະວັນ ໄດ້ຢ່າງຕໍ່ເນື່ອງ, ສ້າງຊື່ສຽງດ້ານການທ່ອງທ່ຽວ ແລະ ສາມາດເຊື່ອມໂຍງສູ່ແຫຼ່ງທ່ອງທ່ຽວຕ່າງໆຂອງແຂວງ ໄດ້ຢ່າງກວ້າງຂວາງ. ຫ່າງຈາກເທສະບານເມືອງສາລະວັນ ປະມານ 30 ກວ່າກິໂລແມັດ, ມີນໍ້າຕົກຕາດທີ່ສວຍງາມ, ມີທໍາມະຊາດທີ່ອຸດົມສົມບູນ, ມີບ່ອນທ່ຽວຊົມ, ຫຼີ້ນນ້ຳ, ພັກຜ່ອນຫຼາຍຈຸດ ແລະ ກວ້າງຂວາງ ຕິດພັນກັບການທ່ຽວຊົມວິຖີຊີວິດຂອງພໍ່ແມ່ປະຊາຊົນບັນດາເຜົ່າ ໃນຂອບນັ້ນ ຕື່ມອີກ.

ຈາກນັ້ນ, ທ່ານເຈົ້າແຂວງສາລະວັນ ພ້ອມຄະນະ ໄດ້ຕິດຕາມເບິ່ງການພັດທະນາ ແລະ ກໍ່ສ້າງຂົວຂ້າມນໍ້າເຊເສັດ ຕາດຮັງ ທີ່ໄດ້ຮັບຜົນກະທົບຈາກລົມພາຍຸຜ່ານມາ ແລະ ການກໍ່ສ້າງກັນເຈື່ອນ. ປັດຈຸບັນ, ພາກສ່ວນທີ່ກ່ຽວຂ້ອງ ແລະ ບໍລິສັດ ຂຸ້ນຂ້ຽວລົງມືດຳເນີນການກໍ່ສ້າງຢ່າງຮີບດ່ວນ ໃຫ້ສໍາເລັດໃນໄວໆນີ້ ແລະ ໃຫ້ໄດ້ນຳໃຊ້ໃນໄລຍະເທສະການບຸນປີໃໝ່ລາວ ທີ່ຈະມາເຖິງນີ້. ພ້ອມນັ້ນ, ກໍ່ໄດ້ຢ້ຽມຢາມເບິ່ງສະຖານທີ່ທ່ອງທ່ຽວຕາດເລາະ-ຕາດຮັງ, ດອນຝັນດີ, ຈຸດກໍ່ສ້າງເຮືອນຊົງລາວ ມີແຜນຈະສ້າງເປັນໂຮມສະເຕ ເພື່ອຮອງຮັບໃຫ້ກັບນັກທ່ອງທ່ຽວ.

ການລົງເຄື່ອນໄຫວໃນທ້າຍອາທິດຜ່ານມານີ້, ໂດຍມີບັນດາການນຳຂັ້ນແຂວງ, ການນຳພະແນກການທີ່ກ່ຽວຂ້ອງ ຄື: ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ພະແນກໂຍທາທິການ ແລະ ຂົນສົ່ງ, ແຜນການ ແລະ ການລົງທຶນ.

ຂ່າວໂດຍ: ກິນດາວັນ ອ້ວນນາຄູ