ເຮືອເມືອງພີນຄອງເຈົ້າໜ້ານໍ້າເຊສາລາລອງ

388

ຊາວເມືອງທ່າປາງທອງ ພ້ອມພາກັນຈັດງານບຸນປະເພນີຊ່ວງເຮືອຂຶ້ນ, ທັງເປັນການສົ່ງເສີມການທ່ອງທ່ຽວ ທາງດ້ານວັດທະນະທຳ ໃຫ້ມີບາດກ້າວຂະຫຍາຍຕົວຢ່າງກວ້າງຂວາງ, ພ້ອມທັງຮັດແໜ້ນຄວາມສາມັກຄີຂອງປວງຊົນ ແລະ ເປັນການແລກປ່ຽນຊື້ – ຂາຍສິນຄ້າຜະລິດຕະພັນຫັດຖະກໍາຕ່າງໆຂອງທ້ອງຖິ່ນ ເຊິ່ງງານດັ່ງກ່າວໄດ້ຈັດຂຶ້ນລະຫວ່າງວັນທີ 6-8 ທັນວາ 2019 ນີ້, ຢູ່ທີ່ອ່າງເກັບນໍ້າຊົນລະປະທານເຊສາລາລອງເມືອງທ່າປາງທອງ ແຂວງສະຫວັນນະເຂດ

ພາຍຫຼັງທີ່ໄດ້ຮັບຊົມການສະແດງສິລະປະວັນນະຄະດີ ແລະ ຮັບຟັງການກ່າວຕ້ອນຮັບແຂກຈາກຕາງໜ້າການນຳຂັ້ນເມືອງແລ້ວ, ທ່ານ ຄຳປະສົງ ຂົງຄຳ ຮອງເລຂາພັກເມືອງ ຮອງເຈົ້າເມືອງ ໄດ້ໃຫ້ກຽດຂຶ້ນລາຍງານການຈັດງານແຂ່ງຂັນເຮືອຊ່ວງປະຈຳປີ 2019 ໃນຄັ້ງນີ້ວ່າ: ການງານແຂ່ງຂັນຊ່ວງເຮືອປະເພນີປະປະຈຳປີ 2019ມີເຮືອເຂົ້າຮ່ວມການແຂ່ງຂັນທັງໝົດ 33 ລຳ, ເຊິ່ງໄດ້ຈັດການແຂ່ງຂັນເຮືອ 2 ປະເພດຄື:ປະເພດ 12 ສີຟາຍ ແລະ ປະເພດ 4 ສີຟາຍ, ໃນນີ້ ປະເພດ 12 ສີຟາຍມີ 11 ລໍາເຮືອຊ່ວງພາຍໃນເມືອງ 9 ລໍາ ແລະ ມາຈາກຕ່າງເມືອງ 2 ລໍາ

ປະເພດ 4 ສີຟາຍ ມີ 22 ລໍາ, ຜ່ານການແຂ່ງຂັນຊະນະເລີດປະເພດເຮືອ 12 ສີຟາຍ: ຊະນະເລີດໄດ້ແກ່: ເຮືອເຈົ້າແມ່ຫົງຄຳ ມາຈາກເມືອງພີນ ໄດ້ຮັບລາງວັນເງິນສົດ 5ລ້ານ ກີບ ພ້ອມຂັນ 1 ໜ່ວຍ, ຮອງຊະນະເລີດອັນດັບ 1 ໄດ້ແກ່: ເຮືອເຈົ້າພໍ່ຜາແດງ ຂົງເຂດ ປກຊ-ປກສ ເມືອງ ໄດ້ຮັບລາງວັນເງິນສົດ 3ລ້ານ ກີບ ພ້ອມຂັນ 1 ໜ່ວຍ, ຮອງຊະນະເລີດອັນດັບ 2 ໄດ້ແກ່: ເຮືອສາວນ້ອຍກຸດລຳພັນ ບ້ານກຸດຮີ (ຄຸ້ມກຸດລຳພັນ ) ໄດ້ຮັບລາງວັນເງິນສົດ 2ລ້ານ ກີບ ພ້ອມຂັນ 1 ໜ່ວຍ, ຮອງຊະນະເລີດອັນດັບ 3 ໄດ້ແກ່

ເຮືອຍາຄູເພັດພະຈຸມຮຸມ ບ້ານທົ່ງປາງ ໄດ້ຮັບລາງວັນເງິນສົດ 1,5ລ້ານ ກີບ. ສຳລັບເຮືອປະເພດ 4 ສີຟາຍ: ຊະນະເລີດໄດ້ແກ່: ເຮືອກຸ່ມບ້ານທີ 3 ຫ້ວຍໝື່ນ ໄດ້ຮັບລາງວັນເງິນສົດ 2,5ລ້ານ ກີບ ພ້ອມຂັນ 1 ໜ່ວຍ, ຮອງຊະນະເລີດອັນດັບ 1 ໄດ້ແກ່: ເຮືອເຈົ້າແມ່ບຸນຫຼາຍສາຍຊຶ້ງ ບ້ານຫ້ວຍໝື່ນ ໄດ້ຮັບລາງວັນເງິນສົດ 1,5ລ້ານ ກີບ ພ້ອມຂັນ 1 ໜ່ວຍ

ຮອງຊະນະເລີດອັນດັບ 2 ໄດ້ແກ່: ເຮືອເຈົ້າພໍ່ຜາແດງ ປກຊ ເມືອງ ໄດ້ຮັບລາງວັນເງິນສົດ 1ລ້ານ ກີບ ພ້ອມຂັນ 1 ໜ່ວຍ, ຮອງຊະນະເລີດອັນດັບ 3 ໄດ້ແກ່: ເຮືອຍາຄູເພັດພະຈຸມຮຸມ2 ບ້ານທົ່ງປາງ ໄດ້ຮັບລາງວັນເງິນສົດ 7,5ແສນ ກີບ.

ຂ່າວໂດຍ:ສີຫຼວຍ ແກ້ວລະກົດໂພສີ