ເຮືອນຊົງລາວ ເລັ່ງຕົກແຕ່ງກະກຽມບຸນທາດຫຼວງ

382

ເຮືອນຊົງລາວ ເປັນສະຖານທີ່ທ່ອງທ່ຽວອີກຈຸດໜຶ່ງໃນງານບຸນນະມັດສະການພະທາດຫຼວງວຽງຈັນ ເຊິ່ງແຕ່ລະປີໄດ້ກາຍເປັນສິ່ງດຶງດູດນັກທ່ອງທ່ຽວເຂົ້າມາທ່ຽວຊົມ ເນື່ອງຈາກມີຫຼາກຫຼາຍກິດຈະກຳໄວ້ໃຫ້ບໍລິການ; ສຳລັບປີນີ້ເຈົ້າຂອງຕັ້ງເປົ້າດຶງດູດນັກທ່ອງທ່ຽວເຂົ້າມາຢ້ຽມຊົມ ປະມານ 50 ພັນເທື່ອຄົນ.

ບຸນນະມັດສະການພະທາດຫຼວງວຽງຈັນ ໃນປີນີ້ມີການຄົບງັນພຽງ 3 ວັນ ( ວັນທີ 29 – 31 ຕຸລາ 2020 ) ໂດຍຖືເອົາປະເພນີເປັນຕົ້ນຕໍ.

ຢ່າງໃດກໍຕາມ, ເຮືອນຊົງລາວ ທີ່ຕັ້ງຢູ່ພາຍໃນເດີ່ນພະທາດຫຼວງວຽງຈັນ  ເຊິ່ງຜູ້ສຳປະທານ ກໍຄືບໍລິສັດ ຊີເອັນພີ ( CNP ) ມີຈຸດປະສົງຢາກໃຫ້ຄົນທີ່ມາທ່ຽວຊົມໄດ້ຊື່ນຊົມກິ່ນອາຍ ຂອງວິຖີການດຳລົງຊີວິດ, ວັດທະນະທຳ ແລະ ຮີດຄອງປະເພນີຂອງຄົນສະໄໝກ່ອນທີ່ຖືກຮວບໂຮມມາໄວ້ຢູ່ບ່ອນນີ້ບ່ອນດຽວ. ປັດຈຸບັນຜູ້ສຳປະທານພວມເລັ່ງກະກຽມສະຖານທີ່ຮອງຮັບຜູ້ຄົນທີ່ຈະເຂົ້າມາຮ່ວມງານບຸນນະມັດສະການພະທາດຫຼວງວຽງຈັນ ແລະ ເຂົ້າມາທ່ຽວຊົມສະຖານທີ່ທ່ອງທ່ຽວທາງດ້ານວັດທະນະທຳເຮືອນຊົງລາວ.

ທ່ານ ນາງ ຈັນນະພາ ວົງສະໝໍລະພູມ ປະທານ ບໍລິສັດ CNP ຜູ້ສຳປະທານສະຖານທີ່ທ່ອງທ່ຽວເຮືອນຊົງລາວ ກ່າວວ່າ: ໃນປີ 2020 ນີ້ ແມ່ນໄດ້ໃຊ້ງົບປະມານຫຼາຍຄືປີທີ່ຜ່ານມາໃນການປັບປຸງເບິ່ງແຍງ ແຕ່ຈະຍັງຮັກສາຄວາມໂດດເດັ່ນທາງດ້ານລັກສະນະຮູບຊົງ ແລະ ການຕົກແຕ່ງທີ່ສ່ອງແສງໃຫ້ເຫັນປະເທດລາວມີບາດກ້າວການພັດທະນາ ແລະ ເພື່ອອະນຸຮັກວັດທະນະທຳ ແລະ ຮີດຄອງປະເພນີອັນດັ້ງເດີມຂອງລາວ, ທັງແນໃສ່ໂຄສະນາເຜີຍແຜ່ວັດທະນະທຳຂອງລາວໃຫ້ລູກຫຼານທີ່ເກີດຮຸ່ນຫຼັງ ຕະຫຼອດຮອດແຂກທັງພາຍໃນ ແລະ ຕ່າງປະເທດ ໄດ້ເຫັນເຮືອນຊົງລາວເດີມ, ວິຖີການດຳລົງຊີວິດອັນດີງາມຂອງຊາວລາວ.

ຕະຫຼອດໄລຍະການຈັດງານ ຄາດວ່າຈະມີນັກທ່ອງທ່ຽວເຂົ້າຊົມບໍ່ຕໍ່າກວ່າ 50 ພັນຄົນ ໂດຍພວກເຮົາໄດ້ກະກຽມທີມງານຈາກໜ່ວຍກູ້ໄພໃນການຕິດຕາມກວດກາຜ້າອັດປາກ ແລະ ວັດແທກອຸນຫະພູມ ເພື່ອປ້ອງກັນບໍ່ໃຫ້ມີການລະບາດຂອງພະຍາດໂຄວິດ – 19.

ສະນັ້ນ, ຈຶ່ງຂໍເຊີນຊວນໃຫ້ພໍ່ແມ່ປະຊາຊົນລາວ ແລະ ນັກທ່ອງທ່ຽວທັງພາຍໃນ ແລະ ຕ່າງປະເທດຜູ້ທີ່ບໍ່ເຄີຍເຫັນ, ບໍ່ເຄີຍໄດ້ສຳຜັດກັບ ຄວາມອຸດົມສົມບູນຂອງວັດທະນະທຳລາວ ກໍໃຫ້ມາທ່ຽວຊົມ ແລະ ຊີມອາຫານພື້ນບ້ານທີ່ຫາກິນໄດ້ຍາກ ແລະ ໃສ່ຊຸດດັ້ງເດີມ ເພື່ອຖ່າຍຮູບເປັນທີ່ລະນຶກ.