ມະຫະກໍາບຸນຊ້າງແຂວງໄຊຍະບູລີປີ 2020 ເປີດຂຶ້ນຢ່າງຄຶກຄື້ນມ່ວນຊື່ນ

804

ງານມະຫະກໍາບຸນຊ້າງ ຄັ້ງທີ XIV ທີ່ແຂວງໄຊຍະບູລີ ໄດ້ເປີດຂຶ້ນຢ່າງເປັນທາງການ ໃນວັນທີ 22 ກຸມພາ 2020 ນີ້ຢູ່ທີ່ເດີນສະໜາມຫຼວງ #ແຂວງໄຊຍະບູລີ. ໂດຍໃຫ້ກຽດເຂົ້າຮວ່ມມີ ທ່ານ ພັນຄໍາ ວິພາວັນ ຮອງປະທານປະເທດແຫ່ງ ສປປ ລາວ ພ້ອມດ້ວຍພັນລະຍາ, ທ່ານ ພົງສະຫວັນ ສິດທະວົງ ເຈົ້າແຂວງ ແຂວງໄຊຍະບູລີ ພ້ອມດ້ວຍພັນລະຍາ, ມີການນໍາສູນກາງ, ແຂວງ, ເມືອງ, ແຂກພາຍໃນ ແລະ ຕ່າງປະເທດ ພ້ອມດ້ວຍມວນຊົນ ບັນດາເຜົ່າຊາວແຂວງໄຊຍະບູລີເຂົ້າຮ່ວມຢ່າງຫຼວງຫຼາຍ.


ທ່ານ ຍັນຍົງ ສີປະເສີດ ຮອງເຈົ້າແຂວງໄຊຍະບູລີ ປະທານຄະນະຈັດງານມະຫະກໍາບຸນຊ້າງ ໄດ້ຂຶ້ນກ່າວລາຍງານການກະກຽມມະຫະກໍາບຸນຊ້າງ ທ່ານໄດ້ກ່າວວ່າ: ງານມະຫະກໍາບຸນຊ້າງໄຊຍະບູລີ ແມ່ນຈັດຂຶ້ນໃນເດືອນກຸມພາ ຂອງທຸກໆປີ, ສະເພາະປີນີ້ ແມ່ນຈັດຂຶ້ນເປັນຄັ້ງທີ 14, ມີຊ້າງພາຍໃນແຂວງເຂົ້າຮ່ວມ 71 ໂຕ ຊຶ່ງຕິດພັນກັບວັນສ້າງຕັ້ງກອງທັບປະຊາຊົນລາວຄົບຮອບ 71 ປີ, #ພິເສດປີນີ້ມີຊ້າງເຜືອກເຂົ້າຮ່ວມລວມເປັນ 72 ໂຕ. ຈຸດປະສົງ ຂອງການຈັດງານ ເພື່ອເປັນການອະນຸລັກຮັກສາຊ້າງລາວ ເພາະຊ້າງເປັນມູນມໍລະດົກຂອງຊາດ ທັງເປັນມິ່ງຂວັນຄູ່ບ້ານຄູ່ເມືອງ. ນອກນີ້ຍັງເປັນການສືບຕໍ່ປົກປັກຮັກສາ ແລະ ເສີມຂະຫຍາຍວັດທະນະທໍາ, ຮີດຄອງປະເພນີ ທີ່ເປັນເອກະລັກ ໃນແບບວິຖີການດໍາລົງຊີວິດ ຂອງປະຊາຊົນບັນດາເຜົ່າ ທີ່ຕິດພັນກັບຊ້າງຖືເອົາຊ້າງເປັນມູນມໍລະດົກທີ່ລໍ້າຄ່າຂອງຊາດມາແຕ່ບູຮານນະການ ແລະ ສ້າງຈິດສໍານຶກໃຫ້ຄົນລາວຮຸ່ນໃໝ່ໄດ້ມີຄວາມຮັບຮູ້ກ່ຽວກັບຊ້າງຫຼາຍຂຶ້ນ. ນອກນີ້ຍັງເປັນການສົ່ງເສີມກິດຈະກໍາອະນຸລັກຊ້າງ, ໃຫ້ຊ້າງໄດ້ພົບກັນ ປະສົມພັນກັນ ແລະ ກໍ່ໃຫ້ເກີດການສືບພັນໃນອະນາຄົດ, ເປັນວິທີສະແດງທັກສະຄວາມສາມາດ ໃນການຄວບຄຸມຊ້າງຕໍ່ສາທາລະນະຊົນ; ອີກດ້ານໜຶ່ງເປັນບ່ອນແລກປ່ຽນບົດຮຽນ ຂອງຄວນຊ້າງ ເພື່ອສືບທອດອາຊີບລ້ຽງຊ້າງໃຫ້ຄົງຢູ່ຄູ່ກັບປວງຊົນລາວກໍ່ຄືຊາວແຂວງໄຊຍະບູລີ.

ພ້ອມນີ້ຍັງເປັນການເອື້ອອໍານວຍໃຫ້ປະຊາຊົນ, ນັກທ່ອງທ່ຽວ ໄດ້ເຫັນການດໍາລົງຊີວິດຂອງຊ້າງ, ຮູ້ບຸນຄຸນ ແລະ ຖືຄວາມສໍາຄັນຂອງຊ້າງທີ່ເຄີຍຢູ່ຄູ່ບ້ານຄູ່ເມືອງຕັ້ງແຕ່ອາດີດຈົນເຖິງປະຈຸບັນ. ສໍາລັບກິດຈະກໍາຫຼັກ ຂອງການຈັດງານໃນປີນີ້ ແມ່ນຈະເນັ້ນໜັກກິດຈະກໍາທີ່ຕິດພັນກັບຊ້າງ ແລະ ການອະນຸລັກຊ້າງ ໂດຍສະເພາະການສະແດງຊ້າງຄໍາຮູ້ ໃນແຕ່ລະວັນແມ່ນຈັດໃຫ້ມີກິດຈະກໍາຂອງຊ້າງ ທີ່ພິເສດສໍາລັບປີນີ້ແມ່ນມີການແຫ່ຂະບວນຊ້າງເຜືອກເຂົ້າເມືອງໄຊຍະບູລີ ພ້ອມທັງຈັດພິທີກໍາທາງສາສະໜາ ຕາມຮີດຄອງປະເພນີ, ຕັກບາດຖວາຍສັງຄະທານ. ສໍາລັບວັນທີ 22 ກຸມພາ ເປັນມື້ເປີດງານເປັນທາງການ ແມ່ນມີຂະບວນແຫ່ຂອງຊ້າງຈໍານວນ 72 ໂຕ, ປະສານສຽງເປົ່າສະໄນ, ຂະບວນແຫ່ກ້ອນກໍາລັງຂອງ 11 ເມືອງ ທີ່ມີເອກະລັກຂອງຊົນເຜົ່າ ແລະ ຮີດຄອງປະເພນີລາວ, ຂະບວນສະແດງສີລະປະຂອງ 8 ເຜົ່າ ຈໍານວນພົນ 800 ຄົນ, ສະແດງກິດຈະກໍາຂອງຊ້າງຄໍາຮູ້ 30 ກວ່າລາຍການ, ມີການຈັດບາສີສູ່ຂັວນຊ້າງ, ຂີ່ຊ້າງຊົມເທດສະບານເມືອງໄຊຍະບູລີ, ຍ່າງເພື່ອອະນຸລັກຊ້າງ ແລະ ຊົມພິພິດຕະພັນຊ້າງ ຫຼັງຈາກພິທີເປີດເປັນທາງການແລ້ວ ໃນແຕ່ລະມື້ມີການເປີດໃຫ້ແຂກເຂົ້າຊົມການສະແດງຊ້າງຄໍາຮູ້, ບໍລິການຂີ່ຊ້າງທ່ຽວຊົມຕະຫຼາດນັດສະແດງສິນຄ້າຜົນລະລິດທາງດ້ານກະສິກໍາ, ຫັດຖະກໍາ ແລະ ອຸດສາຫະກໍາປຸງແຕ່ງ ທີ່ເປັນທ່າແຮງ ແລະ ຜົນງານຂອງບັນດາ 11 ເມືອງພາຍໃນແຂວງໄຊຍະບູລີ, ມີສິນຄ້ານະວັດຕະກໍາທີ່ຕິດພັນທາງດ້ານວິຊາການ ຂອງບາງພະແນກການ ຂອງແຂວງໄຊຍະບູລີ, ຫົວໜ່ວຍທຸລະກິດຂອງພາກລັດ: ເອກະຊົນທັງພາຍໃນ ຈາກປະເທດໃກ້ຄຽງ ແລະ ຕົວແທນຂອງຊາວບ້ານເຂົ້າຮ່ວມຈໍານວນ 132 ຮ້ານ ເຊິ່ງມີມູນຄ່າສິນຄ້າປະມານ 4 ຕື້ກວ່າກີບ.

ຈາກນັ້ນທ່ານພົງສະຫວັນ ສິດທະວົງ ເຈົ້າແຂວງໄຊຍະບູລີ ກໍໄດ້ກ່າວເປີດງານມະຫະກໍາບຸນຊ້າງປີ 2020 ແຂວງໄຊຍະບູລີຢ່າງເປັນທາງການ. ໃນໂອກາດສະຫງ່າລາສີນີ້ ທ່ານ ພັນຄໍາ ວິພາວັນ ຮອງປະທານປະເທດແຫ່ງ ສປປ ລາວ ພ້ອມການການນໍາຂອງແຂວງ ໄດ້ໃຫ້ກຽດລັ່ນຄ້ອງ 9 ບາດ, ຕັດແຖບຜ້າ ເປີດງານມະຫະກໍາບຸນຊ້າງຄັ້ງທີ 14 ທີ່ແຂວງໄຊຍະບູລີຢ່າງເປັນທາງການ. ງານມະຫະກໍາບຸນຊ້າງ 2020 ແຂວງໄຊຍະບູລີ ຈະໄດ້ດໍາເນີນໄປຈົນເຖິງວັນທີ 28 ກຸມພາ ຈຶ່ງສໍາເລັດ.

ຂ່າວ: ບຸນທີ.