ຕາດເຍືອງ ມົນສະເໜແຫຼ່ງທ່ອງທ່ຽວນໍ້າຕົກລາວໃຕ້

808

ຕາດເຍືອງ ສະຖານທີ່ທ່ອງທ່ຽວນໍ້າຕົກສວຍສົດງົດງາມ ແລະ ມີຄວາມໂດດເດັ່ນດ້ານທຳມະຊາດ, ເປັນນ້ຳຕົກທີ່ສວຍງາມແຫ່ງໜຶ່ງຂອງແຂວງຈຳປາສັກ, ສາຍນໍ້າທີ່ໄຫຼລົງມາຈາກໜ້າຜາອັນສູງຊັນ ເຊິ່ງເຮັດໃຫ້ນໍ້າແຕກກະເດັນເປັນລະອອງນ້ຳທີ່ງົດງາມ ແລະ ຍັງມີຈຸດຊົມວິວສຳລັບຖ່າຍຮູບ, ເປັນສະຖານທີ່ທ່ອງທ່ຽວທີ່ເໝາະແກ່ການພັກຜ່ອນຢ່ອນໃຈ.

ນໍ້າຕົກຕາດເຍືອງ ຕັ້ງຢູ່ບ້ານຫຼັກ 40 ເມືອງປາກຊ່ອງ ແຂວງຈໍາປາສັກ ຫ່າງຈາກບ້ານໄປທາງທິດຕາເວັນຕົກສ່ຽງໃຕ້ ປະມານ 1,3 ກິໂລແມັດ, ຫ່າງຈາກຕົວເມືອງປາກຊ່ອງ ມາທາງທິດຕາເວັນຕົກ 10 ກິໂລແມັດ,  ຕາດເຍືອງ ເປັນຕາດສູງຊັນປະມານ 50 ແມັດ, ແບ່ງເປັນ 2 ຖ້ານ ພັກເທິງ 10 ແມັດ ແລະ ພັກລຸ່ມ 4 – 5 ແມັດ, ສອງຝາກຝັ່ງເປັນຜາເຫວຊັນທີ່ມີໄມ້ເຮ້ຍ, ປ່າກ້ວຍ, ປ່າໄມ້ຕົ້ນໃຫຍ່ຈຳນວນໜຶ່ງປະດັບແຕ່ງແຕ້ມໃຫ້ຕາດມີ ຄວາມສວຍງາມ ແລະ ເປັນທຳມະຊາດຍິ່ງຂຶ້ນ.

ອ້ອມຂ້າງບໍລິເວນຕາດເຍືອງ ແມ່ນເຂດປ່າສະຫງວນ ເຊິ່ງມີເນື້ອທີ່ທັງໝົດ 129.000 ເຮັກຕາ, ກ່ອນຈະເອີ້ນວ່າ “ ຕາດເຍືອງ ” ກໍຍ້ອນວ່າຄາວປູ່ເຍີ ຜູ້ມາອາໄສຢູ່ຖິ່ນຖານແຫ່ງນີ້ເປັນບ່ອນດຳລົງຊີວິດ, ຊອກຢູ່ຫາກິນຕາມສາຍຫ້ວຍບັ້ງລຽງ ເຂດນີ້ເຄີຍພົບເຫັນເຍືອງ 2 ໂຕ ໂຕຜູ້ກັບໂຕແມ່ອາໄສຢູ່ໃນຖ້ຳດ້ານລຸ່ມຕາດ ເພື່ອຊອກຫາກິນຕາມພາສາຂອງສັດ ເຊິ່ງບ່ອນເຍືອງອາໄສຢູ່ເປັນຖໍ້າກວ້າງປະມານ 3 ແມັດ, ຍາວປະມານ 3 ແມັດ ແລະ ດ້ານໜຶ່ງສາຍຫ້ວຍຍ່ານນີ້ ມີ 3 – 4 ຕາດ, ລຸ່ມຕາດມີຕາດນ້ອຍແຫ່ງໜຶ່ງ ທີ່ມີຄວາມສູງປະມານ 3 ແມັດ ເປັນພະລານຫີນຍາວຈົນຮອດຫົວຕາດໄຮ ເຊິ່ງຕາດນ້ອຍແຫ່ງນີ້ກວ້າງປະມານ 10 – 12 ແມັດ ແລະ 2 ສາຂາຕາດທີ່ຊາວບ້ານເອີ້ນວ່າ “ ຕາດຜັນ ” ສູງປະມານ 2 – 6 ແມັດ ເພື່ອງ່າຍ ແລະ ສະດວກຕໍ່ການຈື່ຈໍາຂົງເຂດບໍລິເວນນີ້ປະຊາຊົນຈຶ່ງໄດ້ໃສ່ຊື່ຕາດແຫ່ງນີ້ວ່າ: “ ຕາດເຍືອງ ” ມາເທົ່າທຸກວັນນີ້.

ທ່ານໃດຈະມາທ່ຽວຕາດເຍືອງ ສາມາດນຳໃຊ້ພາຫະນະທຸກປະເພດເຂົ້າເຖິງສະຖານທີ່ຢ່າງສະດວກສະບາຍ ບໍ່ວ່າຈະມາທາງເມືອງປາກເຊ ຕາມເສັ້ນທາງ 16E ໂດຍແລ່ນລົດໄປຈົນຮອດກິໂລແມັດທີ 40 ແລ້ວກໍລ້ຽວຂວາ, ມາຈາກເມືອງປາກຊ່ອງຂຶ້ນມາຕາມເສັ້ນທາງເລກ 16E ຮອດບ້ານຫຼັກ 40 ລ້ຽວຊ້າຍເຂົ້າໄປ ຫຼື ມາຈາກແຂວງສາລະວັນ ລົງມາຕາມເສັ້ນທາງເລກ 20 ຈົນມາຮອດເສັ້ນທາງເລກ 16E ລ້ຽວຊ້າຍໄປຕາມເສັ້ນທາງຫາເມືອງປາກຊ່ອງ “ ຕາດເຍືອງ ” ຢູ່ຫ່າງຈາກເສັ້ນທາງເລກ 16E  ປະມານ 3 ກິໂລແມັດ.

ເມື່ອຮອດຕາດທ່ານຈະເຫັນບໍລິເວນອ້ອມຕາດເຕັມໄປດ້ວຍຮ້ານຂາຍເຄື່ອງຫັດຖະກຳຕ່າງໆຂອງປະຊາຊົນບັນດາເຜົ່າທີ່ອາໄສຢູ່ໃນເມືອງປາກຊ່ອງ ເປັນຕົ້ນແມ່ນເຜົ່າລາວເທິງ ແລະ ຮ້ານຂາຍເຄື່ອງທີ່ລະລຶກຕ່າງໆ, ຂາຍຊຸດຊົນເຜົ່າ ແລະ ຮ້ານອາຫານ ເຊິ່ງຈັດສັນຢ່າງເປັນລະບຽບຮຽບຮ້ອຍ. ນອກນັ້ນ, ຍັງມີບັນດາກິດຈະກຳຕ່າງໆ ເປັນຕົ້ນແມ່ນສະແດງສິລະປະວັດທະນະທຳຊົນເຜົ່າ, ວາງສະແດງສິນຄ້າ ແລະ ເຄື່ອງມືໃຊ້ສອຍຕ່າງໆທີ່ໃຊ້ໃນການດຳລົງຊີວິດປະຈຳວັນຂອງເຜົ່າລາວເທິງ, ຖ່າຍຮູບກັບຊົນເຜົ່າ ໂດຍຜູ້ທີ່ບໍລິການຕາມຮ້ານອາຫານ, ຮ້ານຂາຍເຄື່ອງຕ່າງໆແມ່ນຈະໃສ່ຊຸດຊົນເຜົ່າລາວເທິງ ເຊິ່ງເປັນອີກຮູບແບບໜຶ່ງຂອງການທ່ອງທ່ຽວທີ່ໄດ້ຮັບຄວາມນິຍົມ ແລະ ໜ້າສົນໃຈຂອງຜູ້ມາຢາມຕາດແຫ່ງນີ້ສະເໝີ ບໍ່ວ່າຈະເປັນແຂກພາຍໃນ ຫຼື ຕ່າງປະເທດ.

ນັກທ່ອງທ່ຽວສາມາດເຂົ້າໄປທ່ຽວຊົມໃນຕາດ ເຊິ່ງຕາດແບ່ງອອກເປັນ 2 ຈຸດ ຄື: ຈຸດດ້ານເທິງຕາດ ແລະ ດ້ານລຸ່ມ ເຊິ່ງຈຸດເທິງຕາດຈະມີບໍລິເວນກວ້າງ, ມີຕູບທີ່ໃຊ້ສຳລັບພັກຜ່ອນຊົມວິວ, ສູບອາກາດທີ່ເຢັນສະບາຍສົດຊື່ນຕາມຈຸດຕ່າງໆ, ມີສາຍນໍ້າທີ່ໄຫຼມາກ່ອນຈະໄຫຼມາຕົກລົງທີ່ຕາດປະມານ 500 ແມັດ, ເປັນຈຸດທີ່ສາມາດຫຼິ້ນນໍ້າໄດ້ຢ່າງສະບາຍ, ສາຍນໍ້າໃສສະອາດ ແລະ ເຢັນດີ ທີ່ມີນັກທ່ອງທ່ຽວມັກມາຫຼິ້ນສະເໝີ ແຕ່ກໍມີບາງບ່ອນທີ່ເປັນຈຸດເພິ່ນຫ້າມລົງຫຼິ້ນ ເນື່ອງຈາກເປັນຈຸດທີ່ອັນຕະລາຍ ແລະ ຈະມີປ້າຍຂຽນບອກຕາມຈຸດດັ່ງກ່າວ.

ຫຼັງຈາກນັ້ນ, ນັກທ່ອງທ່ຽວກໍສາມາດຍ່າງລົງໄປດ້ານລຸ່ມ ເພື່ອໄປສຳຜັດກັບນໍ້າຕົກຢ່າງໃກ້ຊິດ ເຊິ່ງແຕ່ປາກຕາດລົງດ້ານລຸ່ມຕາດຕາມຂັ້ນໄດລີງ ຫາກເປັນລະດູຝົນທີ່ນໍ້າມີຈຳນວນມະຫາສານທ່ານຈະຕ້ອງລະມັດລະວັງ ແລະ ຮັກສາອຸປະກອນຖ່າຍພາບພໍສົມຄວນ ເພາະລະອອງນໍ້າຕົກທີ່ພຸ່ງກະເດັນແຮງເມື່ອທ່ານຢືນຖ່າຍພາບ ແລະ ຊົມວິວບຶດດຽວກໍອາດເຮັດໃຫ້ທ່ານປຽກໄປໝົດຕົວໄດ້, ແຕ່ຖ້າມາໃນລະດູແລ້ງຈຳນວນນໍ້າໜ້ອຍແຕ່ກໍເຫັນມີສາຍຮຸ້ງບາງໆທີ່ພາດຜ່ານອອກມາຈາກນໍ້າຕົກ ເຊິ່ງເປັນພາບທີ່ສວຍງາມ ແລະ ປະທັບໃຈທີ່ສຸດ. ນອກນັ້ນ, ທ່ານກໍສາມາດລົງຫຼິ້ນນໍ້າໃນດ້ານລຸ່ມໄດ້ອີກດ້ວຍ.

ຈຸດເດັ່ນທີ່ນັກທ່ອງທ່ຽວສ່ວນຫຼາຍປະທັບໃຈທີ່ສຸດໃນການມາທ່ຽວຕາດເຍືອງ ແມ່ນການມາຜ່ອນຄາຍສຳຜັດອາກາດທີ່ບໍລິສຸດ ເພີດເພີນກັບການຊົມວິວທຳມະຊາດອັນສວຍງາມ ເຊິ່ງສາຍນໍ້າຕາດສີຂາວໄຫຼລຽງຕາມຜາທີ່ກະທົບໃສ່ຫີນແລ້ວແຕກກະເດັນເປັນລະອອງສີຂາວສວຍງາມ, ກົງກັນຂ້າມກັບຫີນສີດຳທີ່ນໍ້າຕົກໃສ່ທ່າມກາງບັນຍາກາດທີ່ສົດຊື່ນ ແລະ ມີ ຄວາມຮູ້ສຶກເໝືອນເປັນອິດສະຫຼະ. ນອກນັ້ນ, ຕາດເຍືອງ ຍັງມີຈຸດຊົມວິວຖ່າຍພາບອັນສວຍງາມ ແລະ ດຶງດູດນັກທ່ອງທ່ຽວເປັນຢ່າງດີ ນັ້ນຄືການທີ່ໄດ້ໄປຢືນທີ່ຈຸດຊົມວິວຂອງຕາດດ້ານລຸ່ມ ຈະສາມາດສຳຜັດກັບລົມເຢັນທີ່ພັດເບົາໆ ບວກກັບລະອອງນໍ້າທີ່ກະເດັນມາຈາກຫີນຜາ ເຊິ່ງນີ້ເປັນຈຸດທີ່ມາທ່ຽວຕາດເຍືອງແລ້ວທຸກຄົນຕ້ອງຢາກໄປຢືນສຳຜັດ.