ທ່ຽວຊົມ ບ້ານພຽງງາມ ແຂວງຫຼວງນໍ້າທາ ສູນຫັດຖະກຳຕໍ່າຜ້າເຜົ່າໄຕ໋ແດງ-ໄຕ໋ຂາວ

620

ບ້ານພຽງງາມ, ເມືອງຫຼວງນໍ້າທາ ແຂວງຫຼວງນໍ້າທາ ເປັນບ້ານຂອງປະຊາຊົນເຜົ່າໄຕ໋ແດງ ແລະ ໄຕ໋ຂາວ ເຊິ່ງສ່ວນຫຼາຍແມ່ນປະກອບອາຊີບເຮັດນາ ແລະ ຕໍ່າຫູກ. ໃນເມື່ອກ່ອນ, ກຸ່ມຊົນເຜົ່າໄຕ໋ຍວນ ໄດ້ມາຕັ້ງຖິ່ນຖານຢູ່ເຂດນີ້ ຍ້ອນວ່າເປັນທົ່ງພຽງ ເໝາະແກ່ການເຮັດກະສິກຳ ແລະ ໄດ້ຕັ້ງຊື່ບ້ານນີ້ວ່າ: ບ້ານພຽງງາມຊຶ່ງມີຄວາມໝາຍວ່າ ມີເຄື່ອງນຸ່ງທີ່ສວຍງາມ.

ໂດຍມີການເລົ່າຂານກັນມາວ່າ ເມື່ອຫຼາຍປີກ່ອນ ຊຸດເຄື່ອງນຸ່ງທີ່ສວຍງາມໄດ້ຖືກປະຖີ້ມໄວ້ໃນຖໍ້າ ຊ້າງປູ້ມ່ອນ (ຊ້າງເຜືອກ) ເຊິ່ງເປັນສະຖານທີ່ເຄົາລົບບູຊາຂອງຊາວບ້ານ, ແຕ່ວ່າເຄື່ອງດັ່ງກ່າວໄດ້ຫາຍໄປ ຍ້ອນວ່າ ມີຄົນໄປຢືມເຄື່ອງປະດັບມາເອ້ຍ້ອງແລ້ວບໍ່ສົ່ງຄືນ ຈຶ່ງເຮັດໃຫ້ຖໍ້າຖືກປີດຖາວອນ. ດັ່ງນັ້ນ, ຕໍ່ມາ ຈຶ່ງໄດ້ປ່ຽນຊື່ບ້ານມາເປັນ ບ້ານພຽງງາມທີ່ມີຄວາມໝາຍວ່າ ດິນແດນແຫ່ງຮາບພຽງທີ່ສວຍງາມເປັນທົ່ງນາທີ່ອຸດົມສົມບູນ.

ຍ້ອນວ່າແມ່ຍິງເຜົ່າໄຕ໋ແດງ ມີມູນເຊື້ອໃນການຕ່ຳຜ້າແພໄໝມ້ອນ, ທາງພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ໂດຍສະເພາະກໍ່ຄືຂະແໜງການທ່ອງທ່ຽວ ແຂວງຫຼວງນໍ້າທາ ຈຶ່ງໄດ້ຈັດຕັ້ງເປັນກຸ່ມຫັດຖະກຳຂຶ້ນ. ສະເພາະບ້ານພຽງງາມ, ເພື່ອຊ່ວຍໃຫ້ປະຊາຊົນມີລາຍໄດ້ ໂດຍສະເພາະແມ່ນລາຍໄດ້ຈາກການຕໍ່າຫູກທໍໄໝ ເຊັ່ນ: ຕໍ່າສິ້ນ, ແລະ ແຜ່ນແພຕ່າງໆ ເພື່ອນຳໄປວາງສະແດງທີ່ສູນວາງສະແດງເຄື່ອງຫັດຖະກຳຂອງບ້ານພຽງງາມ ແລະ ເພື່ອຂາຍໃຫ້ນັກທ່ອງທ່ຽວ. ປັດຈຸບັນນີ້, ເຄື່ອງຫັດຖະກຳຂອງປະຊາຊົນບ້ານພຽງງາມກຳລັງໄດ້ຮັບຄວາມນິຍົມຊົມຊອບຈາກນັກທ່ອງທ່ຽວ ເປັນຢ່າງດີ.

ບ້ານພຽງງາມ ມີເຮືອນພັກແຮມໄວ້ຕ້ອນຮັບນັກທ່ອງທ່ຽວແບບ Home stay ທີ່ສວຍງາມ, ລາຄາຖືກ ແລະ ນັກທ່ອງທ່ຽວ ຍັງສາມາດຮ່ວມກິດຈະກຳກັບປະຊາຊົນໄດ້ໂດຍກົງ ເຊັ່ນ: ຮ່ວມແຕ່ງອາຫານພື້ນບ້ານຂອງເຜົ່າເຜົ່າໄຕ໋ແດງ ແລະ ໄຕ໋ຂາວ, ຮຽນຮູ້ການຍ້ອມຜ້າ, ຕໍ່າຫູກ ແລະ ອື່ນໆ ແລະ ຍ່າງທ່ຽວຊົມການດຳລົງຊີວິດຂອງປະຊາຊົນແບບດັ່ງເດີມ ແລະ ຊົມທຳມະຊາດອັນສວຍງາມຂອງບ້ານພຽງງາມອີກດ້ວຍ.

ທີ່ມາ: Lao National Radio