ບໍ່ນ້ຳອຸ່ນ ເມືອງກາສີ ແຂວງວຽງຈັນ

806

ບໍ່ນ້ຳອຸ່ນກາ ທີ່ຕັ້ງຢູ່ບ້ານ ນ້ຳແກ່ນ, ເມືອງກາສີ, ແຂວງວຽງຈັນ ເປັນອີກສະຖານທີ່ທ່ອງທ່ຽວໜຶ່ງທີ່ກຳລັງໄດ້ຮັບຄວາມນິຍົມຈາກນັກທ່ອງທ່ຽວທັງພາຍໃນ ແລະ ຕ່າງປະເທດ ໂດຍສະເພາະແມ່ນໃນລະດູໜາວແມ່ນຈະມີນັກທ່ອງທ່ຽວເຂົ້າມາຫຼາຍເປັນພິເສດ; ແຕ່ສຳລັບໃນໄລຍະລະດູຝົນເພິ່ນກໍໄດ້ວາງແຜນຮອງຮັບນັກທ່ອງທ່ຽວ ໂດຍສະເພາະແມ່ນຈະພາທ່ຽວຊົມນ້ຳຕົກຕາດນ້ຳແກ່ນເຊິ່ງຈະມີຢູ່ໃນໄລຍະລະດູຝົນ ແລະ ກໍເປັນອີກອັນໜຶ່ງທີ່ສາມາດດຶງດູດນັກທ່ອງທ່ຽວໄດ້.

ในภาพอาจจะมี สถานที่กลางแจ้ง, น้ำ และธรรมชาติ

ອີງຕາມການສຳພາດທ່ານນາງ ວຽງລາຕີ ວົງປີຊາ ຜູ້ບໍລິຫານສະຖານທີ່ທ່ອງທ່ຽວບໍ່ນ້ຳອຸ່ນ ກາສີ ໃຫ້ຮູ້ວ່າ: ບໍ່ນ້ຳອຸ່ນແຫ່ງນີ້ ເປັນບໍ່ນ້ຳອຸ່ນທຳມະຊາດຂະໜາດໃຫຍ່ ແລະ ກໍເປັນສະຖານທີ່ທ່ອງທ່ຽວທີ່ຂຶ້ນຊື່ຂອງເມືອງກາສີ ເຊິ່ງໄດ້ເປີດໃຫ້ບໍລິການແກ່ນັກທ່ອງທ່ຽວມາຕັ້ງແຕ່ປີ 2005 ເປັນຕົ້ນມາ.

ในภาพอาจจะมี ต้นไม้, ต้นพืช, ท้องฟ้า, สถานที่กลางแจ้ง, น้ำ และธรรมชาติ

ເມື່ອຮອດປີ 2015 ທ່ານນາງ ວຽງລາຕີ ກໍໄດ້ເຂົ້າມາພັດທະນາສະຖານທີ່ດັ່ງກ່າວຕໍ່ ໂດຍສ້າງໃຫ້ມີສິ່ງທີ່ອຳນວຍຄວາມສະດວກສະບາຍຫຼາຍໆຢ່າງໃຫ້ກັບນັກທ່ອງທ່ຽວເຊັ່ນ: ສ້າງສະຖານທີ່ພັກແຮມໄວ້ໃຫ້ນັກທ່ອງທ່ຽວໄດ້ພັກຜ່ອນ, ມີຮ້ານອາຫານໄວ້ຄອຍບໍລິການ, ມີອ່າງນ້ຳອຸ່ນໄວ້ໃຫ້ນັກທ່ອງທ່ຽວໄດ້ລົງອາບ, ມີບ່ອນແຊ່ນ້ຳອຸ່ນທີ່ສະອາດ ແລະ ມີວິວທິວທັດທີ່ເປັນທຳມະຊາດ ເວົ້າໄດ້ວ່າການທີ່ໄດ້ມາທ່ຽວທີ່ສະຖານທີ່ແຫ່ງນີ້ ແມ່ນຈະໄດ້ສຳພັດກິ່ນອາຍແຫ່ງຄວາມເປັນທຳມະຊາດແນ່ນອນ ເພາະມີພູຜາປ່າໄມ້ທີ່ຂຽວສົດງົດງາມອ້ອມຮອບສະຖານທີ່ແຫ່ງນີ້.

ในภาพอาจจะมี ท้องฟ้า, เมฆ, สะพาน, สถานที่กลางแจ้ง, น้ำ และธรรมชาติ

ຈຸດພິເສດຂອງບໍ່ນ້ຳອຸ່ນແຫ່ງນີ້ ແມ່ນມີອຸນຫະພູມ 40 ອົງສາ ເປັນອຸນຫະພູມທີ່ເໝາະສົມໃຫ້ກັບນັກທ່ອງທ່ຽວໃນການລົງແຊ່, ລົງອາບໂດຍບໍ່ຈຳເປັນຕ້ອງໄດ້ຜະສົມນ້ຳເຢັນເລີຍ ເພາະນ້ຳໃນບໍ່ຈະບໍ່ຮ້ອນຫຼາຍ ໂດຍເພິ່ນໄດ້ແບ່ງອອກເປັນສອງອ່າງໄວ້ໃຫ້ນັກທ່ອງທ່ຽວໄດ້ໃຊ້ບໍລິການ.

ທ່ານນາງ ວຽງລາຕີ ກ່າວວ່າ: ພາຍຫຼັງທີ່ໄດ້ມີການປັບປຸງ ແລະ ພັດທະນາສະຖານທີ່ດັ່ງກ່າວ ສັງເກດເຫັນວ່າມີນັກທ່ອງທ່ຽວທີ່ເຂົ້າມາໃຊ້ບໍລິການຢູ່ເລື້ອຍໆ ເຊິ່ງໃນແຕ່ລະປີຈະມີນັກທ່ອງທ່ຽວເຂົ້າມາບໍ່ຕ່ຳກວ່າ 1.000 ຄົນ ສ່ວນໃຫຍ່ຈະເປັນນັກທ່ອງທ່ຽວຈາກເອີຣົບ, ຮອງລົງມາກໍແມ່ນນັກທ່ອງທ່ຽວຈາກເກົາຫຼີ, ໄທ. ນອກຈາກນັ້ນກໍມີນັກທ່ອງທ່ຽວທົ່ວໄປ ແລະ ນັກທ່ອງທ່ຽວລາວ.

ในภาพอาจจะมี ต้นพืช, ต้นไม้, สะพาน, สถานที่กลางแจ้ง, น้ำ และธรรมชาติ

ສຳລັບການຮອງຮັບນັກທ່ອງທ່ຽວໃນປັດຈຸບັນ ທ່ານນາງ ວຽງລາຕີ ບອກວ່າ: ຍັງບໍ່ທັນພຽງພໍເທື່ອເນື່ອງຈາກວ່າທາງຣີສອດມີຫ້ອງພັກພຽງແຕ່ 6 ຫ້ອງເທົ່ານັ້ນ ເຖິງວ່າຈະມີການບໍລິການເຕັ້ນໃຫ້ເຊົ່າເປັນໂຕເສີມກໍຕາມ. ແນວໃດກໍດີ ປີ 2018 ນີ້ເຊິ່ງເປັນປີທ່ອງທ່ຽວລາວ ເພິ່ນກໍໄດ້ຂະຫຍາຍຮ້ານອາຫານອອກຕື່ມອີກເພື່ອຮອງຮອງກັບນັກທ່ອງທ່ຽວທີ່ຈະມາແວ່ກິນເຂົ້າ ເຊິ່ງປັດຈຸບັນແມ່ນກໍ່ສ້າງໄດ້ 40% ແລະ ຈະຄາດວ່າຈະໃຫ້ສຳເລັດໃນຕົ້ນປີ 2019 ນີ້.

ສ່ວນແຜນໃນປີ 2019 ແມ່ນເພິ່ນຈະໄດ້ຂະຫຍາຍຫ້ອງພັກຈາກທີ່ມີຢູ່ 6 ຫ້ອງເປັນ 40 ຫ້ອງ ເຊິ່ງຄາດວ່າຈະໃຊ້ງົບປະມານ 1 ຕື້ກວ່າກີບໃນການກໍ່ສ້າງ, ພາຍຫຼັງທີ່ກໍ່ສ້າງສຳເລັດຄາດວ່າຈະສາ ມາດຮອງຮັບນັກທ່ອງທ່ຽວທີ່ຈະມາພັກໄດ້ປະມານ 300-400 ຄົນຕໍ່ 1 ຄືນ (ລວມທັງນັກທ່ອງທ່ຽວທີ່ໃຊ້ບໍລິການກາງເຕັ້ນ).

ในภาพอาจจะมี ต้นไม้, สะพาน, สถานที่กลางแจ้ง, ธรรมชาติ และน้ำ

ປັດຈຸບັນບໍ່ນ້ຳອຸ່ນກາສີຣີສອດກໍໄດ້ມີການປັບປຸງບັນຫາກິດຈະກຳເພື່ອສ້າງຈຸດດຶງດູດໃຫ້ກັບນັກທ່ອງທ່ຽວ ເປັນຕົ້ນແມ່ນສ້າງຕູບນັ່ງຫຼິ້ນໄວ້ບໍລິການ, ຕົບແຕ່ງສວນດອກໄມ້ຢູ່ບໍລິເວນບໍ່ນ້ຳອຸ່ນ ແລະ ຕູບ; ນອກຈາກນີ້, ເພິ່ນຍັງໄດ້ສົ່ງນ້ຳອຸ່ນໄປວິໄຈຢູ່ທີ່ກະຊວງສາທາລະນະສຸກ ເພື່ອສຶກສາເບິ່ງຄຸນນະພາບຂອງນ້ຳອຸ່ນ ແລະ ກໍເພື່ອເປັນບ່ອນອີງທາງດ້ານຂໍ້ມູນໃຫ້ກັບນັກທ່ອງທ່ຽວໃນການສ້າງຈຸດສົນໃຈໃຫ້ເຂົ້າມາທ່ອງທ່ຽວຢູ່ໃນສະຖານທີ່ດັ່ງກ່າວເພີ່ມຂຶ້ນ. ເພາະນັກທ່ອງທ່ຽວຈະໄດ້ຮັບຮູ້ວ່າຢູ່ໃນນ້ຳອຸ່ນທຳມະຊາດມີແຮ່ທາດທີ່ສຳຄັນຫຍັງແດ່, ເມື່ອລົງແຊ່, ລົງອາບແລ້ວຈະໄດ້ຮັບຜົນດີແນວໃດແດ່; ທັງນີ້ກໍເພື່ອເປັນການດຶງດູດນັກທ່ອງທ່ຽວໃຫ້ເຂົ້າມາທ່ຽວໃນທຸກລະດູການ.

ສຳລັບລະດູການທີ່ນັກທ່ອງທ່ຽວມາທ່ຽວຫຼາຍກວ່າໝູ່ນັ້ນແມ່ນຕັ້ງແຕ່ເດືອນຕຸລາ ຫາ ເດືອນມິຖຸນາ ຂອງແຕ່ລະປີ ແລະ ລະດູທີ່ມີນັກທ່ອງທ່ຽວເຂົ້າມາທ່ຽວໜ້ອຍທາງຣີສອດກໍໄດ້ຈັດໂປຼໂມຊັນພິເສດໂດຍການພາແຂກໄປທ່ຽວນ້ຳຕົກນ້ຳແກ່ນແບບບໍ່ເສຍຄ່າ ເພື່ອເປັນການດຶງດູດນັກທ່ອງທ່ຽວ.

ในภาพอาจจะมี สะพาน, ต้นไม้, สถานที่กลางแจ้ง, น้ำ และธรรมชาติ

ນາງ ວຽງລາຕີ ຍັງກ່າວເຊີນຊວນນັກທ່ອງທ່ຽວພາຍໃນ ແລະ ຕ່າງປະເທດໃຫ້ມາທ່ຽວທີ່ເມືອງກາສີໃຫ້ຫຼາຍຂຶ້ນ ເພາະນອກຈາກບໍ່ນ້ຳອຸ່ນແລ້ວ ເມືອງກາສີ ກໍຍັງມີແຫຼ່ງທ່ອງທ່ຽວອີກຫຼາຍໆແຫ່ງໄວ້ໃຫ້ນັກທ່ອງທ່ຽວໄດ້ສຳຜັດ ແລະ ທ່ຽວຊົມກັນ.

“ບໍ່ນ້ຳອຸ່ນ ກາສີ ຣີສອດ” ຫ່າງຈາກນະຄອນຫຼວງວຽງຈັນປະມານ 250 ກິໂລແມັດ ແລະ ຫ່າງຈາກຕົວເມືອງກາສີປະມານ 20 ກິໂລແມັດ ລຽບຕາມເສັ້ນທາງທີ 13 ເໜືອ. ສຳລັບທ່ານໃດທີ່ກາຍໄປທາງບ້ານ ນ້ຳແກ່ນ, ເມືອງກາສີ, ແຂວງວຽງຈັນ ກໍຢ່າລືມໄປແວ່ຊົມ, ແວ່ຫຼິ້ນ, ກິນອາຫານແຊບໆທີ່ແຫຼ່ງທ່ອງທ່ຽວທາງທຳມະຊາດ ບໍ່ນ້ຳອຸ່ນ ກາສີ ຣີສອດ ກັນແດ່ເດີ.