ຝົນຕົກກໍ່ບໍ່ຫວັ່ນ ຊົມເຊີຍ ເປີດນໍາໃຊ້ສວນສາທາລະນະມິດຕະພາບລາວ-ຍີ່ປຸ່ນ

680

ໂຄງການກໍ່ສ່າງ ສວນສາທາລະນະມິດຕະພາບລາວ-ຍີ່ປຸ່ນ ໄດ້ເລີ່ມລົງມືກໍ່ສ້າງ ໃນວັນທີ 16 ພຶດສະພາ 2017 ຫາວັນທີ 16 ພຶດສະພາ 2019 (ເປັນເວລາ 24 ເດືອນ) ໃນ​ມູນ​ຄ່າ 27,65 ຕື້ກວ່າກີບ, ໃນນັ້ນທຶນຊ່ວຍເຫຼືອລ້າຈາກລັດຖະບານຍີ່ປຸ່ນ 16 ຕື້ກວ່າກີບ ແລະ ທຶນສົມທົບ​ຂອງ​ແຂວງ​ປະ​ກອບ​ສ່ວນ 42% ເທົ່າ​ກັບ 11,62 ຕື້ກວ່າກີບ, ໂດຍແມ່ນບໍລິສັດ BM ກໍ່ສ້າງຂົວທາງ, ຊົນລະປະທານ ແລະ ເຄຫາ ຈໍາກັດ ເປັນຜູ້ຮັບເໝົາກໍ່ສ້າງ, ເຊິ່ງສະຖານທີກໍ່ສ້າງແມ່ນຕັ້ງຢູ່ບ້ານ ທ່ານາ ເມືອງໄຊຍະບູລີ ແຂວງ ໄຊຍະບູລີ,

ມາຮອດປະຈຸບັນການກໍ່ສ້າງແມ່ນສໍາເລັດ 100%, ໜ້າວຽກທີໄດ້ປະຕິບັດມີ: ກະກຽມພື້ນທີ, ຝາກັ້ນດິນ, ວຽກໂທມແກ້ວ, ວຽກປະຕິມະກໍານໍ້າພຸ, ວຽກປະຕິມະກໍາຊ້າງ, ລານອາເນກປະສົງເບຕົງພີມລາຍ, ອ່າງເກັບນໍ້າ, ເຮືອນ ແລະ ສວນສະຕາຍຍີ່ປຸ່ນ, ເຮືອນ ແລະ ສວນສະຕາຍລາວ, ຫ້ອງນໍ້າສາທາລະນະ 2 ຫຼັງ, ລານຈອດລົດໃນ ແລະ ນອກ, ຂັ້ນໄດຂຶ້ນແຕ່ລະພັກ 7 ຈຸດ, ລະບົບນໍ້າໃນສວນ, ລະບົບໄຟຟ້າໃນສວນ, ວຽກຕັ້ງອຸປະກອນ, ວຽກປູກຫຍ້າ, ຕົ້ນໄມ້ປະດັບ, ຕົ້ນໄມ້ໃຫຍ່, ດອກໄມ້ໃນສວນ, ຮ່ອງລະບາຍນໍ້າ, ທາງຍ່າງໃນສວນ, ຮົ້ວອ້ອມເຂດແດນ, ຕົບແຕ່ງສວນ ແລະ ອື່ນໆ.

ພິທີມອບຮັບໂຄງການດັ່ງກ່າວໄດ້ຈັດຂຶ້ນໃນຕອນບ່າຍຂອງວັນທີ 13 ຕຸລາ 2019 ນີ້, ທີ່ເດີ່ນສວນສາທາລະນະມິດຕະພາບລາວ-ຍີ່ປຸ່ນ, ເຂົ້າຮ່ວມເປັນກຽດມີ ທ່ານ ປອ ສົມລິດ ເປືອກແກ້ວ ຮອງເລຂາພັກແຂວງ, ປະທານສະພາປະຊາຊົນແຂວງ, ທ່ານ ເພັງນິລັນ ຄຳພັນເພັງ ຮອງເຈົ້າແຂວງໄຊຍະບູລີ, ມີ ທ່ານ ເຄໂຊ ທາເກວາກະ ເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງປະເທດຍີ່ປຸ່ນ ປະຈຳ ສປປ ລາວ, ມີບັນດາທ່ານທີມງານຈາກສະຖານທູດຍີ່ປຸ່ນ, ແຂກສູນກາງ, ທ່ານຫົວໜ້າ, ຮອງຫົວໜ້າພະແນກການ, ອົງການ, ກົມກອງ ອ້ອມຂ້າງແຂວງ, ມີເຈົ້າເມືອງ 11 ເມືອງ, ນາຍບ້ານ ເທດສະບານເມືອງ ໄຊຍະບູລີ, ມີນັກຮຽນ, ຊາວໜຸ່ມ-ເຍົາວະຊົນ ແລະ ບັນດາ ຄະນະຮັບຜິດຊອບ ໂຄງການກໍ່ສ້າງສວນສາທາລະນະມິດຕະພາບ ລາວ-ຍີ່ປຸ່ນ ເຂົ້າຮ່ວມຢ່າງຫຼວງຫຼາຍ, ໃນພິທີພາຍຫຼັງທີ່ໄດ້ຮັບຟັງການລາຍງານສະພາບດ້ານດີ-ດ້ານອ່ອນໃນການຈັດຕັ້ງປະຕິບັດໂຄງການກໍ່ສ້າງສວນ

ສາທາລະນະມິດຕະພາບລາວ-ຍີ່ປຸ່ນ, ເຊິ່ງສະເໜີໂດຍ ທ່ານ ຫງວນວັນບົ້ງ ອໍານວຍການ ບໍລິສັດ BM ກໍ່ສ້າງຂົວທາງ, ຊົນລະປະທານ ແລະ ເຄຫາ ຈໍາກັດ, ຈາກນັ້ນ ທ່ານ ເຄໂຊ ທາເກວາກະ ເອກອັກຄະລັດຖະທູດຍີ່ປຸ່ນ ປະຈຳ ສປປ ລາວ ກໍ່ໄດ້ຂຶ້ນກ່າວມອບໂຄງການດັ່້ງກ່າວໃຫ້ແຂວງ ໄຊຍະບູລີ ຄຸ້ມຄອງ-ນໍາໃຊ້ຢ່າງເປັນທາງການ ແລະ ກ່າວຮັບໂດຍ ທ່ານ ເພັງນິລັນ ຄຳພັນເພັງ ຮອງເຈົ້າແຂວງໄຊຍະບູລີ, ໂອກາດດັ່ງກ່າວ ທ່ານຮອງເຈົ້າແຂວງ ເຊິ່ງຕາງໜ້າໃຫ້ອົງການປົກຄອງແຂວງ ແລະ ປະຊາຊົນບັນດາເຜົ່າພາຍໃນແຂວງ ໄຊຍະບູລີ ກໍ່ໄດ້ສະແດງຄວາມຂອບໃຈຕໍ່ການຊ່ວຍເຫຼືອດັ່ງກ່າວທີ່ໄດ້ປະກອບສ່ວນເຂົ້າໃນການເສີມສ້າງສາຍພົວພັນມິດຕະພາບລາວ-ຍີ່ປຸ່ນ, ກໍຄືແຂວງ ໄຊຍະບູລີ ແລະ ສະຖານທູດຍີ່ປຸ່ນ ປະຈຳ ສປປ ລາວ ໃຫ້ປະກົດຜົນເປັນຈິງ, ທັງເປັນການປະກອບສ່ວນພັດທະນາເສດຖະກິດ-ສັງຄົມຂອງແຂວງ ໄຊຍະບູລີ ໃຫ້ມີການຂະຫຍາຍຕົວຂຶ້ນໄປເລື້ອຍໆ, ຕອນທ້າຍຂອງພິທີຍັງໄດ້ມີການປະດັບ ຫຼຽນໄຊພັດທະນາ ໃຫ້ທ່ານທູດຍີ່ປຸ່ນ, ໃຫ້ກຽດປະດັບໂດຍແມ່ນທ່ານ ປອ ສົມລິດ ເປືອກແກ້ວ ຮອງເລຂາພັກແຂວງ, ປະທານສະພາປະຊາຊົນແຂວງ ແລະ ໄດ້ຮ່ວມກັນລັ່ນຄ້ອງ 9 ບາດ, ຕັດແຖບຜ້າ ແລະ ເປີດປ້າຍສວນສາທາລະນະມິດຕະພາບລາວ-ຍີ່ປຸ່ນຢ່າງເປັນທາງການ.