ຖ້ຳຂຸນລາງ ຄວາມງາມເຮືອນຫໍຂອງເສດຖີແຫ່ງເມືອງນະຄອນກາຍ

762

ຖໍ້າຂຸນລາງ ເປັນສະຖານທີ່ທ່ອງທ່ຽວທຳມະຊາດທີ່ສວຍສົດງົດງາມ, ເຊິ່ງຕັ້ງຢູ່ເຂດປ່າສະຫງວນ ຂອງເມືອງກາສີ ໄປ​ທາງທິດຕາ​ເວັນ​ຕົກ​ສ່ຽງ​ເໜືອ ຫ່າງຈາກ​ເສັ້ນທາງ​ຕັດ​ໃໝ່ລະຫວ່າງເມືອງ​ກາສີ – ເມືອງ​ນານ ປະມານ 1 ກິໂລແມັດ ໃກ້​ກັບ​ບ້ານ​ຫ້ວຍສານ ຫ່າງ​ຈາກ​ເທດສະ​ບານເມືອງ​ກາສີ ໄປ​ປະມານ 15 ກິ​ໂລແມັດ, ສາມາດເຂົ້າໄປເຖິງດ້ວຍລົດ ຫຼື ຍາງ. ເປັນສະຖານທີ່ທາງທໍາມະຊາດທີ່ສວຍງາມ ແລະ ຄົບບັນຍາກາດທີ່ຫາເບິ່ງໄດ້ຍາກໃນແຫຼ່ງອື່ນ ເພາະໃນສະຖານທີ່ແຫ່ງນີ້ນອກຈາກມີຖໍ້າຫີນຍ້ອຍດ້ວຍລວດ ລາຍຕ່າງໆ ຕະຫລອດເສັ້ນທາງການໄປຫາປາກຖໍ້າຍັງມີນໍ້າຕົກຕາດນ້ອຍໃຫຍ່ຢັງຢາຍກັນຢ່າງສວຍງາມ ແລະ ເປັນສະຖານທີ່ ທີ່ອຸດົມສົມບູນດ້ວຍຊີວະນາໆພັນທີ່ຂຽວກະຈີຊຸ່ມເຢັນຕະຫລອດປີ.

ບໍລິເວນອ້ອມຂ້າງຖ້ຳ​ມີ​ຕົ້ນໄມ້​ນ້ອຍໃຫຍ່​ອາຍຸ​ຫຼາຍ​ຮ້ອຍ​ປີ ກະແຈກກະຈາຍຕາມເນີນພູ, ຮ່ອງຫ້ວຍ ຕ່າງໆ ​ເຮັດ​ໃຫ້​ພື້ນ​ທີ່ມີ​ອາກາດ​ທີ່ນີ້ເຢັນສົດຊື່ນ ພິເສດ ແມ່ນທຳ​ມະ​ຊາດ​ອັນ​ອຸ​ດົມ​ສົມ​ບູນ​ທີ່​ຢູ່​ພາຍນອກ​ຖ້ຳ​ແຫ່ງ​ນີ້ ຈາກ​ທາງ​ເຂົ້າ​ທີ່​ເປັນ​ປະ​ຕູ​ໃຫຍ່ໄປ​ຈົນ​ຮອດ​ທາງ​ເຂົ້າປາກ​ຖ້ຳ ແມ່ນມີປ່າໄມ້ທີ່ຂຽວງາມ ແລະ ຊຸ່ມຊື່ນຢູ່ຕະຫຼອດເວລາ ແຖມຍັງມີນ້ຳໂຕນຕາດສອງສາຍທີ່ມາບັນຈົບກັນຢູ່ທີ່ທາງຈະຂຶ້ນໄປປາກຖ້ຳ ຊື່​ວ່າ “ນ້ຳ​ຫ້ວຍ​ຕາດ” ອ້ອມຮອບ ຖ້ຳແຫ່ງນີ້ ເປັນປ່າໄມ້ທຳມະຊາດທີ່ກວ້າງຂວາງເຊິ່ງມີເນື້ອທີປະມານ 1.080 ເຮັກຕາ ປະກອບໄປດ້ວຍບັນດາພູຫິນປູນທີ່ປົກຄຸມ ດ້ວຍຕົ້ນໄມ້ໃບຫຍ້າ ແລະ ກົກກ້ວຍອັນດົກໜາ ແລະ ຂຽວກະຈີ. ນອກນັ້ນ ຍັງມີ​ນ້ຳຕົກຕາດ 2 ແຫ່ງ ຄື: ນໍ້າຕົກຕາດ​ຫ້ວຍ​ສານ ແລະ ນ້ຳຕົກ​ຕາດ​ຫ້ວຍ​ສະ​ໄພ ທີ່ສູງປະມານ 10 ແມັດ ໄຫຼທອດລົງເປັນຊັ້ນໆຕາມຮ່ອມຜາຊັນ ແລະ ມີ​ນ້ຳ​ທີ່​ໄຫຼບໍ່​ຂາດ​ສາຍ​ຕະຫຼອດ​ປີ.

ຄຳວ່າຖໍ້າຂຸນລາງ ເຊິ່ງ​ມັນ​ກໍ​ຄື​ຖ້ຳ​ຂອງ​ຂຸນ​ລາງ ຕົວລະຄອນເອກ​ອີກໜື່ງຕົວ​ລະ​ຄອນທີ່ສຳຄັນໃນຕຳນານໂສກ​ຄະ​ນາດ​ຕະ​ກຳ​ແຫ່ງຄວາມຮັກ ສາມເສົ້າທີ່ຂຶ້ນຊື່ຂອງຊາວແຂວງວຽງຈັນ ກໍຄືຊາວເມືອງກາສີ ເລື່ອງ​ນິທານຮັກອໍາມະຕະຂອງ “ຂຸນ​ລູ​ນາງ​ອົ້​ວ” ທີ່ຜູ້​ເຖົ້າຜູ້ແກ່​ໄດ້ເລົ່າຂານໃຫ້ລູກຫຼານຟັງຕໍ່ໆກັນມາ.

ຕາມ​ການ​ເລົ່າ​ຂານ​​ກັນວ່າ ບໍລິ​ເວນ​ຖໍ້າ​ແຫ່ງ​ນີ້ເປັນໄຮ່ນາ, ​ເປັນ​ສະຖານ​ທີ່​ພັກຜ່ອນ, ບ່ອນ​ເກັບ​ມ້ຽນຊັບ​ສົມບັດຂອງຂຸນລາງ (ເສດຖີແຫ່ງນະຄອນກາຍໃນສະໄໝນັ້ນ) ເຊິ່ງຂຸນລາງໄດ້ຕົບແຕ່ງສະຖານທີ່ແຫ່ງນີ້ເພື່ອໃຊ້ເປັນເຮືອນຫໍໃນພິທີແຕ່ງດອງ ແລະ ຈະຄອງຄູ່ກັບນາງອົ້ວຄ່ຽມສາວງາມແຫ່ງເມືອງນະຄອນກາຍ ແລະ ໃນ​ປັດ​ຈຸ​ບັນ​ແມ່ນ​ສະ​ຖານ​ທີ່​ທ່ອງ​ທ່ຽວ​ທາງ​ທຳ​ມະ​ຊາດ​ທີ່​ອຸ​ດົມ​ສົມ​ບູນ ແລະ ງົດ​ງາມ​ສຸດໆ, ຖ້ຳຂຸນລາງແຫ່ງ​ນີ້ ຍັງ​ມີອີກຊື່ໜື່ງທີ່ຊາວເມືອງກາສີຮຽກຂານກັນ​ ກໍແມ່ນ “ຖ້ຳຫິນຂັນໝາກ” ທີ່​ຊາວ​ເມືອງ​ພາ​ກັນ​ເອີ້ນ​ຊື່​ນີ້ ກໍເພາະວ່າພາຍໃນຖ້ຳມີຫິນເປັນຮູບໝາກເບັງໃຫຍ່ ເຊິ່ງໝາກເບັງນີ້ເພິ່ນບອກວ່າເປັນໝາກເບັງຂັນໝາກທີ່ຂຸນລາງຈະນຳໄປສູ່ຂໍນາງອົ້ວ ແຕ່ນາງອົ້ວພັດຂ້າໂຕຕາຍໜີ​ຂັນ​ໝາກ​ຂອງ​ຂຸນ​ລາງສາກ່ອນ ເຮັດ​ໃຫ້​ຂຸນ​ລາງ​ກາຍ​ເປັນ​ໝ້າຍ​ຂັນ​ໝາກ ຂຸນ​ລາງ​ເພິ່ນ​ເລີຍ​ປະ​ໄວ້​ແນວນັ້ນ​ຈົນ​ກາຍ​ເປັນ​ຫິນ ແລະ ພາຍໃນຖ້ຳກໍມີຜົ້ງ​ທັງໝົດເຈັດຜົ້ງ ທີ່ບາງບ່ອນເບິ່ງຄ້າຍຄືເປັນຫ້ອງໂຖງຮັບແຂກ, ຫ້ອງນອນທີ່ມີຕຽງນອນ, ຜ້າກັ້ງ ເປັນຮ່ອງຮອຍໄວ້ຈົນເທົ່າທຸກວັນນີ້.

ນອກນັ້ນ ຖໍ້າຂຸນລາງແຫ່ງນີ້ເປັນຖໍ້າທີ່ມີນ້ຳຍ້ອຍອອກມາຈາກຜາ ແຖມພາຍໃນຖ້ຳຍັງມີຫິນນ້ຳຍ້ອຍ ອີກດ້ວຍ ເຮັດໃຫ້ພາຍໃນຖ້ຳເບິ່ງຄືດິນແດນ​ອັດ​ສະ​ຈັນທີ່ສວຍງາມ ຖືກປະດັບເອ້ໄວ້ດ້ວຍ​ເພັດ​ນິນ​ຈິນ​ດາທີ່ເຫຼື້ອມ​ລະ​ຍິບ​ລະ​ຍັບຢ່າງສວຍ​​ງາມ​.

ນັກທ່ອງທ່ຽວສາມາດຍ່າງມາທາງທິດທາງທິດຕາເວັນຕົກ ເຊິ່ງມີຂັ້ນໄດຂຶ້ນປະມານ 400 ຂັ້ນ ຈື່ງຮອດປາກຖໍ້າ ແລະ ມີຂັ້ນໄດລົງອີກດ້ານໜຶ່ງປະມານ 130 ຂັ້ນເພື່ອໄປຫານ້ຳຕົກຕາດ. ພາຍໃນຖໍ້າ​ມີກ້ອນ​ຫິນ​ໃຫຍ່​ຕັ້ງ​ຢູ່ 2 ກ້ອນ ຄື: ກ້ອນ​ໜຶ່ງ​ແມ່ນ​ຄ້າຍຄື​ໝາກເບັງ ສູງ​ປະມານ 3 – 4 ແມັດ ແລະ ກ້ອນທີ່ສອງ ​ຄ້າຍຄື​ກອງ​ເຂົ້າ ສູງ​ປະມານ 2 – 3 ແມັດ ພື້ນ​ຖ້ຳ​ມີ​ຮູບຄ້າຍຄື​ທົ່ງ​ນາ​ກວ້າງຂວາງ ແລະ ມີ​ບ່ອນ​ນອນ​ ໃນຖໍ້າ ມີ​ຫີນ​ງອກ,​ ຫີນ​ຍ້ອຍ ​ເປັນ​ຊວດ​ຊົງ​ຮູບ​ຮ່າງ​ຕ່າງໆ ທີ່​ສວຍ​ງາມ​ແຕກ​ຕ່າງ​ກັນ ເຊິ່ງແຍກອອກເປັນຫລາຍຜົ້ງ ຫລາຍໂພງ ຫລາຍຫ້ອງ ຫລາຍຊັ້ນ ກວ້າງ – ແຄບເຖິງສີ່ລະດັບ, ມີທາງຍ່າງລວງດຽວທີ່ຍາວໄປທາງທິດຕາເວັນອອກປະມານ 250 ແມັດ ສະດວກໃນການທ່ຽວຊົມ.

ປັດຈຸບັນ ຖ້ຳຂຸນລາງແຫ່ງນີ້ໄດ້ກາຍເປັນແຫຼ່ງທ່ອງທ່ຽວ ທີ່ສາມາດດືງດູດນັກທ່ອງທ່ຽວພາຍໃນ ແລະ ຕ່າງປະເທດເຂົ້າຊົມເປັນຈຳນວນຫຼາຍ ມີເສັ້ນທາງ​ເຂົ້າໄປຫາຖໍ້າຢ່າງສະດວກ, ມີໄຟຟ້າ​ເຂົ້າເຖີງ ມີ​ຕູບ​ພັກ​ເຊົາ ເຮືອນ​ພັກ ບັງ​ກາ​ໂລ​ແບບ​ທຳ​ມະ​ຊາດ ສາມາດ​ນອນ​ແຮມ​ຄືນ​ໄດ້ ແລະ ມີ​ຮ້ານ​ອາຫານ ສາມາດບໍລິການນັກທ່ອງທ່ຽວໄດ້ຕະຫຼອດ, ເປັນແຫຼ່ງທ່ອງທ່ຽວທາງທຳມະຊາດ ວັດທະນະທຳ ອັນເປັນເອກະລັກ ສະເພາະຂອງຊາວເມືອງກາສີ ທີ່ສວຍສົດງົດງາມ ແລະ ເໝາະສຳລັບນັກ​ທ່ອງ​ທ່ຽວ​ຜູ້​ທີ່ມັກ​ທ່ຽວ​ຊົມ​ທຳ​ມະ​ຊາດ​ພູຜາ​ປ່າໄມ້, ຫ້ວຍ​ນ້ຳ​ລຳເຊ, ວິຖີ​ການ​ດຳລົງ​ຊີວິດ​ຂອງ​ປະຊາຊົນ​ບ້ານນອກ ແລະ ສຶກ​ສາ​ຕຳນານ​ເລື່ອງ​ລາວຄວາມ​ຮັກ​ຂອງ​ທ້າວ​ຂຸນ​​ລູ – ນາງ​ອົ້ວ ແລະ ທ້າວ​ຂຸນ​ລາງ ທີ່​ເປັນ​ນິທານ​ເລົ່າ​ລື​ກັນ​ມາເທົ່າທຸກວັນນີ້.