ເລີ່ມແລ້ວ!! ບຸນຊ່ວງເຮືອປະຈຳປີທີ່ ເມືອງປາກອູ

391

ບຸນຊ່ວງເຮືອຢູ່ວັງຄົກລິ່ນ ເມືອງປາກອູ ແຂວງຫຼວງພະບາງ ໄດ້ຈັດຂຶ້ນໃນມື້ຂຶ້ນ 15 ຄໍ່າ ເດືອນ10ລາວ ເຊິ່ງກົງກັບມື້ບຸນຫໍ່ເຂົ້າສະຫຼາກຂອງຊາວພຸດ ປີນີ້, ກົງກັບວັນ 13 ກັນຍາ 2019 ເຂົ້າຮ່ວມຮັບຊົມມີການນຳຂອງເມືອງປາກອູ, ເມືອງອ້ອມຂ້າງ, ແຂກຮັບເຊີນ ແລະມວນຊົນເຂົ້າຮ່ວມ.

ພິທີ ທ່ານ ແກ່ນຄຳ ຄຳພັນ ຮອງເຈົ້າເມືອງປາກອູ ກ່າວວ່າ: ບຸນຊ່ວງເຮືອ ເມືອງ ປາກອູ ແຂວງຫຼວງພະບາງ ໄດ້ຈັດຂຶ້ນເປັນປະຈຳທຸກປີມື້ບຸນຫໍ່ເຂົ້າສະຫຼາກ, ເປັນປະເພນີສືບທອດກັນມາແຕ່ຊຸມປີ 1990 ປະຊາຊົນຊາວເມືອງປາກອູ ສະເພາະປີນີ້ ອົງການປົກຄອງເມືອງປາກອູ ໄດ້ກະກຽມຄວາມພ້ອມຫຼາຍດ້ານ ທັງໄດ້ປຸກລະດົມເຮືອຊ່ວງຈາກບັນດາບ້ານພາຍໃນເມືອງ, ຕ່າງເມືອງ ແລະຫົວໜ່ວຍທຸລະກິດຢູ່ໃນແຂວງຫຼວງພະບາງ ເຂົ້າຮ່ວມແຂ່ງຂັນ ເພື່ອໃຫ້ບຸນປີນີ້ມີຄວາມເບີກບານມ່ວນຊື່ນ.

ສຳລັບປີນີ້ ມີເຮືອເຂົ້າແຂ່ງຂັນທັງໝົດ 17 ລໍາ ແບ່ງອອກເປັນ 2 ປະເພດຄື: ປະເພດເຮືອກາບ ຫຼື ເຮືອປະເພນີ ມີ 12 ລຳ ບັນຈຸສີພາຍບໍ່ເກີນ 25 ຄົນ, ສໍາຮອງ 7 ຄົນ ແລະ ປະເພດເຮືອສູດ ຫຼື ເຮືອກິລາ ມີ 5 ລໍາ ບັນຈຸສີພາຍບໍ່ເກີນ 30 ຄົນ, ສໍາຮອງ 7 ຄົນ.