ຕາດສະແນນ ສະຫວັນຂອງທຳມະຊາດ

881

ແຂວງໄຊຍະບູລີກໍເປັນອີກແຂວງໜຶ່ງທີ່ມີສະຖານທີ່ທ່ອງທ່ຽວທຳມະຊາດຫຼາຍແຫ່ງໂດຍສະເພາະແມ່ນຢູ່ເມືອງບໍ່ແຕນ ແຂວງໄຊຍະບູລີ ທີ່ມີສະຖານທີ່ທ່ອງທ່ຽວທຳມະຊາດເປັນຕົ້ນແມ່ນນໍ້າຕົກຕາດທີ່ມີຄວາມງົດງາມຫຼາຍແຫ່ງ ແລະ ມື້ນີ້ພວກເຮົາຈະມາແນະນຳຕາດສະແນນ ເຊິ່ງເປັນຕາດທີ່ນັກທ່ອງທ່ຽວພາຍໃນແຂວງ ແລະ ແຂວງອ້ອມຂ້າງໃຫ້ຄວາມສົນໃຈ.

ນ້ຳຕົກຕາດສະແນນ ກໍເປັນອີກສະຖານທີ່ທ່ອງທ່ຽວທາງທຳມະຊາດ ທີ່ມີ ຄວາມງົດງາມ ແລະ ສະພາບແວດລ້ອມຢູ່ເຂດນັ້ນກໍດີ ເປັນສາຍນໍ້າຮອຍ ( ບ້ານນໍ້າດັ້ນ ) ຫ່າງຈາກບ້ານນໍ້າດັ້ນ ໄປທາງທິດຕາເວັນຕົກ 8 ກິໂລແມັດ. ລັກສະນະຂອງນ້ຳຕົກເປັນນໍ້າຕົກທີ່ກວ້າງໃຫຍ່ ແລະ ຜາສູງປະມານ 70 – 80 ແມັດ ສາຍນ້ຳທີ່ໂຮຍລົງມາສູ່ດ້ານລຸ່ມ ກາຍເປັນວັງນໍ້າເລິກສາມາດລອຍຫຼິ້ນໄດ້, ສາຍນ້ຳມີລັກສະນະເປັນອາຍຟົ້ງກະຈາຍໄປທົ່ວອານາບໍລິເວນນັ້ນ ເຮັດໃຫ້ເຮົາປຽກໄດ້ເມື່ອຢືນເບິ່ງມັນດົນໆ, ສ່ວນອ້ອມຮອບຕາດມີໂງ່ນຫີນ ແລະ ພະລານຫີນທີ່ສະຫຼັບກັນ ຫຼາຍຄົນກໍໄປຢືນຖ່າຍຮູບ ເຊິ່ງຈຸດນີ້ເອງຈຶ່ງເຮັດໃຫ້ເປັນຕາດທີ່ມີສະເໜດຶງດູດເອົາບັນດານັກທ່ອງທ່ຽວຫຼາຍຄົນ ເມື່ອພົບເຫັນແລ້ວຢາກຈະໂດດລົງອາບນ້ຳທັນທີ ແລະ ຢາກໄປຊົມຕະຫຼອດປີ ເຊິ່ງແຕ່ລະປີນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າຊົມ ໄດ້ສ້າງລາຍຮັບໃຫ້ແກ່ເຂດທ່ອງທ່ຽວເມືອງ ກໍຄືແຂວງໄຊຍະບູລີ.

ນອກນັ້ນ, ຍັງມີພະລານຫີນໄວ້ສຳລັບນັ່ງຮັບປະທານອາຫານ ສຳລັບຜູ້ທີ່ເດີນທາງໄປຈະໄດ້ໃກ້ຊິດກັບທຳມະຊາດຫຼາຍຂຶ້ນ ມີສັດປ່ານ້ອຍ – ໃຫຍ່ອາໄສຢູ່ຢ່າງຫຼວງຫຼາຍ ເໝາະສຳລັບນັກທ່ອງທ່ຽວທີ່ມັກການຜະຈົນໄພ ແລະ ຍ່າງປ່າທີ່ສຸດ ຍ້ອນບັນຍາກາດທີ່ສະຫງົບ ແລະ ທຳມະຊາດທີ່ສວຍງາມ ຈຶ່ງເໝາະສຳລັບນັກທ່ອງທ່ຽວອະນຸຮັກທຳມະຊາດ ເຊິ່ງໃນປັດຈຸບັນນີ້ໄດ້ມີສິ່ງອຳນວຍຄວມສະດວກສະບາຍໃຫ້ແກ່ນັກທ່ອງທ່ຽວທີ່ຈະເຂົ້າມາບໍ່ວ່າຈະເປັນທາງດ້ານທີ່ພັກອາໄສ, ຮ້ານອາຫານ, ການເດີນທາງ, ການສື່ສານ. ທຳມະຊາດທີ່ບໍ່ມີການປັ້ນແຕ່ງບັນຍາກາດທີ່ຮົ່ມເຢັນກາຍເປັນສະຖານທີ່ທ່ອງທ່ຽວທີ່ລວບລວມເອົາຜູ້ຄົນທີ່ຮັກທຳມະຊາດມາຍັງສະຖານທີ່ແຫ່ງນີ້ດ້ວຍຈິດໃຈທີ່ບໍລິສຸດ ເຮັດໃຫ້ການທ່ອງທ່ຽວມີ ຄວາມຄຶກຄື້ນເປັນພິເສດ. ສຳລັບທ່ານທີ່ເດີນທາງໄປແຂວງໄຊຍະບູລີ ຢ່າລືມໄປແວ່ທ່ຽວເມືອງບໍ່ແຕນ ໃນປັດຈຸບັນເມືອງມີສິ່ງອຳນວຍຄວາມສະດວກໄວ້ບໍລິການແກ່ນັກທ່ອງທ່ຽວທີ່ຫຼາກຫຼາຍ ບໍ່ວ່າຈະເປັນທີ່ພັກທັງແບບເຮືອນພັກ, ໂຮງແຮມ ໃຫ້ທ່ານເລືອກໃຊ້ບໍລິການໃນຫຼາຍລະດັບ  ແລະ ຮ້ານອາຫານການກິນທີ່ຫຼາກຫຼາຍ.