ນະຄອນໄຊປຸຣະ ໄດ້ຮັບຮອງຈາກ ຢູເນສໂກ ເປັນມໍລະດົກໂລກແຫ່ງໃໝ່

392

ນະຄອນໄຊປຸລະ (Jaipur) ຂອງອິນເດຍໄດ້ຮັບການຂຶ້ນທະບຽນເປັນ ມໍລະດົກໂລກ ໂດຍອົງການການສຶກສາວິທະຍາສາດ ແລະ ວັດທະນະທໍາແຫ່ງສະຫະປະຊາຊາດ (UNESCO) ເມື່ອວັນເສົາ ທີ 6 ກໍລະກົດ ຜ່ານມາ.

ກະຊວງວັດທະນະທໍາຂອງອິນເດຍຖະແຫຼງການ ວ່າ ນັບເປັນອີກໜຶ່ງຄວາມສໍາເລັດຄັ້ງສໍາຄັນ ນະຄອນໄຊປຸຣະ ຂອງລັດຣາຊສະຖານ ໄດ້ເປັນສ່ວນໜຶ່ງໃນລາຍການມໍລະດົກໂລກຂອງຢູເນສໂກລະຫວ່າງການປະຊຸມຄະນະກໍາມະການມໍລະດົກໂລກ ຄັ້ງທີ 43  ທີ່ນະຄອນຫຼວງບາກູ ປະເທດອາແຊັກໄບຊານ.

ທັງນີ້ ນະຄອນໄຊປຸຣະເປັນເມືອງຫຼວງຂອງລັດຣາຊສະຖານ ມີຊື່ສຽງຈາກສະຖາປັດຕະຍາກໍາ ວັດທະນະທໍາ ແລະ ການທ່ອງທ່ຽວ.

ໃນຖະແຫຼງການໄດ້ກ່າວເສີມວ່າ ຫຼັງຈາກນະຄອນໄຊປຸຣະ ກາຍເປັນມໍລະດົກໂລກແຫ່ງໃໝ່ ເຮັດໃຫ້ອິນເດຍມີແຫຼ່ງມໍລະດົກໂລກ ທັງໝົດ 38 ແຫ່ງ ໃນປັດຈຸບັນ ໂດຍແບ່ງເປັນພື້ນທີ່ທາງວັດທະນະທໍາ 30 ແຫ່ງ ພື້ນທີ່ທາງທໍາມະຊາດ 7 ແຫ່ງ ແລະ ພື້ນທີ່ລວມທັງສອງຢ່າງ 1 ແຫ່ງ.

ດ້ານນາຍົກລັດຖະມົນຕີ ທ່ານນະເຣນທຣາ ໂມດີ ຂອງອິນເດຍ ຮ່ວມສະແດງຄວາມຍິນດີກັບຄວາມສໍາເລັດດັ່ງກ່າວ ແລະ ກ່າວວ່າ ນະຄອນໄຊປຸຣະ ເປັນເມືອງແຫ່ງວັດທະນະທໍາ ແລະ ຄວາມກ້າຫານ ດຶງດູດນັກທ່ອງທ່ຽວຈາກທົ່ວທຸກມູມໂລກມາສໍາຜັດຄວາມງົດງາມ ແລະ ຄວາມຄຶກຄື້ນ ກັບສະຖານທີ່ແຫ່ງນີ້.