ຫົວໜ້າຫ້ອງການ ຖວທ ເມືອງນອງພ້ອມຄະນະ ລົງສຳຫຼວດແຫຼ່ງທ່ອງທ່ຽວນ້ຳຕົກຕາດຫ້ວຍລະລາບ

610

ນ້ຳຕົກຕາດຫ້ວຍລະລາບ ຕັ້ງຢູ່ ບ້ານໂອ໋ຍ-ຕານຕີບ ເມືອງນອງ ແຂວງສະຫວັນນະເຂດ ເປັນສະຖານທີ່ທ່ອງທ່ຽວໜຶ່ງທີ່ພວມໄດ້ຮັບຄວາມສົນໃຈ ແລະ ຄາດວ່າມີທ່າແຮງສູງທີ່ຈະພັດທະນາໃຫ້ເປັນສະຖານທີ່ທ່ອງທ່ຽວທາງທໍາມະຊາດ ໃຫ້ນັກທ່ອງທ່ຽວ ທັງພາຍໃນ ແລະ ຕ່າງແຂວງມາທ່ອງທ່ຽວຢ້ຽມຍາມກັນຢ່າງຫຼວງຫຼາຍ ໃນອານະຄົດ.

ເພື່ອເປັນການຫ້າງຫາກະກຽມ ຕ້ອນຮັບນັກທ່ອງທ່ຽວຈະໄປທ່ຽວຊົນໃນໄລຍະປີໃໝ່ລາວນີ້ ຫົວໜ້າຫ້ອງການຖະແຫຼງຂ່າວ ວັດທະນະທໍາ ແລະ ທ່ອງທ່ຽວເມືອງນອງ ພ້ອມດ້ວຍຄະນະ ສົມທົບກັບຫົວໜ້າຈຸດສຸມແດນວິໄລ ແລະ ອໍານາດການປົກຄອງບ້ານໂອ໋ຍຕານຕີບ ໄດ້ລົງສໍາຫຼວດນໍ້າຕົກຕາດຫ້ວຍລະລາບ,ເພື່ອກຳນົດເຂດແດນ ບໍ່ໃຫ້ບຸກຄົນ, ນິຕິບຸກຄົນ, ບໍລິສັດ ສວຍໂອກາດຈັບຈອງເປັນພື້ນທີ່ສ່ວນຕົວສ່ວນຕົວ.

ໃນການປຶກສາຫາລືໃນຄັ້ງນີ້ ໄດ້ເຫັນດີໃຫ້ສະງວດເຂດແດນແຄມຫວຍລະລາບເບື້ອງລະ 100 m,ໄລຍະທາງແຕ່ເທິງຕາດ ແລະ ລຸ່ມຕາດເບື້ອງລະ 2000 m ທັງນີ້ກໍ່ເພື່ອຮັກສາຄວາມຊຸ່ມຊື່ນ ໃຫ້ມີນໍ້າໄຫຼຕະປີ ຄາດວ່າໃນຂ້າງໜ້າ ນໍ້າຕົກຕາດຫ້ວຍລະລາບ ແຫ່ງນີ້ ຈະມີນັກທ່ອງທ່ຽວເຂົ້າມາທ່ຽວຊົມເປັນຈຳນວນຫຼາຍຢ່າງແນ່ນອນ ເພາະເປັນນໍ້າຕົກທີ່ສວຍສົດງົດງາມ ເພາະມີຄວາມສູງປະມານ ສີ່ສີບກວ່າແມັດ, ມີ 7 ຊັ້ນ, ມີນ້ຳໄຫຼຕະຫຼອດປີ ເໝາະສໍາລັບການໄປພັກຜ່ອນ ຍ່ອນກາຍ ອາບນໍ້າໃສເຢັນ, ທ່ຽວຊົມທໍາມະຊາດ ທີ່ສວຍສົດງົດງາມ, ຕາດນີ້ ຫ່າງຈາກເສັ້ນທາງ ບ້ານດົງ ເມືອງນອງນັບແຕ່ ບ້ານນາລົງເກົ່າ ໄປທາງຈຸດສຸມແດນວິໄລເຖິງຕາດຫ້ວຍລະລາບດ້ວຍໄລຍະທາງ 32 ກິໂລແມັດ ດ້ວຍເສັ້ນທາງດິນແດງ.

ອີກບໍ່ດົນຄົງມີສະຖານທີ່ທ່ອງທ່ຽວທາງທໍາມະຊາດທີ່ໜ້າສົນໃຈ ແລະ ຄວນໄປທ່ຽວຊົມ ເວລາໄປຢ້ຽມຢາມ ແຂວງສະຫວັນນະເຂດ ໂດຍສະເພາະແມ່ນບ້ານໂອ໋ຍ-ຕານຕີບ ເມືອງນອງຢ່າງແນ່ນອນ.

ຈາກ: ຫ້ອງການ ຖວທ ເມືອງນອງ