ໄປລະບໍ້ ທ່າຝຣັ່ງວັງສີຄາມໂສມໃໝ່ ກັບຄວາມງາມຄົບທຸກອົງສາ ຊວນໃຫ້ທ່ານໄປສໍາຜັດໃຫ້ໄດ້

1104

ເວົ້າເຖິງແຂວງຄໍາມ່ວນແລ້ວ ໜຶ່ງສະຖານທີ່ທ່ອງທ່ຽວທີ່ໄດ້ຮັບຄວາມນິຍົມ ແລະ ເປັນທີ່ຮູ້ຈັກກັນດີມາຈົນເຖິງທຸກມື້ນີ້ ຄົງໜີບໍ່ພົ້ນໜຶ່ງສະຖານທີ່ນີ້ ທ່າຝຣັ່ງ ທີ່ຕັ້ງຫ່າງຈາກເມືອງທ່າແຂກ ແຂວງຄຳມ່ວນ 10 ກິໂລແມັດຕາມທາງເລກທີ່ 12A ນອນຢູ່ໃນວົງຈອນການທ່ອງທ່ຽວ Thakhaek Loop.

ຕາມການເຫຼົ່າຂານກັນມາ ກ່ອນທີ່ຈະໄດ້ຊື່ວ່າ ທ່າຝຣັ່ງ ແມ່ນມີທີ່ມາຄື ເມື່ອກ່ອນທ່າຝຣັ່ງນີ້ເປັນວັງນໍ້ານິ້ງ ມີສີຟ້າໃສງາມດີແຕ່ຄົນລາວແມ່ນບໍ່ນິຍົມກັນມາຫຼິ້ນ ສ່ວນຫຼາຍມັກມີຊາວຕ່າງຊາດກໍ່ຄືຄົນຝຣັ່ງມາໂຕນນໍ້າແລະ ຫຼິ້ນນໍ້າຢູ່ທີ່ນີ້ ໂດຍສະເພາະແມ່ນມາເປັນຄູ່, ຄົນຮັກກັນມາຫຼິ້ນນໍ້າ ຖືວ່າເປັນບ່ອນທີ່ເຮັດໃຫ້ພວກເຂົາໄດ້ມ່ວນຊື່ນ ແລະ ມີຄວາມສຸກກັນ ຕັ້ງແຕ່ນັ້ນມາຈຶ່ງໄດ້ໃສ່ຊື່ວ່າ “ທ່າຝຣັ່ງ”

“ທ່າຝຣັ່ງ” ມີສາຍນໍ້າທີ່ງົດງາມເປັນເອກກະລັກດັ່ງສາຍນໍ້າໂດນທີ່ເປັນສີຟ້າຍາວ 20 ກວ່າກິໂລແມັດ ເຊີ່ງເປັນນໍ້າທີ່ອອກມາຈາກພູຫີນປູນທີ່ໃຫຍ່ທີ່ສຸດໃນລາວທີ່ເອີ້ນວ່າ ”ຂຸນໂດນ” ອ້ອມຂ້າງສາຍນໍ້າຈະມີສາຍພູຫີນທັງສອງຂ້າງທີ່ຍາວແຕ່ຕົ້ນເຖິງປາຍນໍ້າທີ່ມາຮອດແຄມເສັ້ນທາງ 12A ພ້ອມທຳມະຊາດປ່າໄມ້ແລະພູຜາທີ່ມີຄວາມສວຍງາມ …

ປັດຈຸບັນ ໂດຍສະເພາະ ໄລຍະຕົ້ນໆປີແບບນີ້ຍິ່ງໄດ້ຮັບຄວາມສົນໃຈຫຼາຍຈາກບັນດານັກທ່ອງທ່ຽວທັງພາຍໃນ ແລະ ຕ່າງປະເທດ ເພາະ ທ່າຝຣັ່ງແຫ່ງນີ້ ແມ່ນໄດ້ມີການພັດທະນາຄວາມງົດງາມ, ຄວາມໜ້າປະທັບໃຈ ແລະຄວາມສະດວກສະບາຍໃຫ້ແກ່ນັກທ່ອງທ່ຽວໄດ້ສໍາຜັດກັນ ຕາມພາບທີ່່ຢູ່ຂ້າງລຸ່ມນີ້ເລີຍ…

ຜູ້ສຳປະທານທ່າຝຣັງຢູ່ເມືອງ ທ່າແຂກ ແຂວງຄຳມ່ວນໄດ້ບອກວ່າ: ກຳລັງເລັ່ງໃສ່ສ້າງບັງກະໂລເພື່ອຕອນຮັບກຸ່ມນັກທ່ອງທ່ຽວຈີນ ທ່າຝຣັງ (Tha Falang) ເປັນໜຶ່ງໃນຫຼາຍແຫຼ່ງທ່ອງທ່ຽວດ້ານທຳມະຊາດຢູ່ ບ້ານ ທອກ, ເມືອງທ່າແຂກ ແຂວງ ຄຳມ່ວນ ກຳລັງພັດທະນາເປັນແຫຼ່ງທ່ອງທ່ຽວຄົບວົງຈອນ.

ທ່າຝຣັງເປັນທ່າທີ່ສວຍງາມດ້ານທຳມະຊາດ ເປັນສາຍນ້ຳໂດນທີ່ໄຫຼອອກມາຈາກຮ່ອມພູ, ປັດຈຸບັນມີຕູບອ້ອມທ່າ ເປັນການບໍລິການໃນຂັ້ນ ທີ່ໃຫ້ນັກທ່ອງທ່ຽວໄດ້ນັ່ງຢູ່ຕູບອ້ອມທ່າເພື່ອກີນອາຫານ, ເຄື່ອງດື່ມ ແລະ ອື່ນໆ, ມີການຂີ່ເຮືອກາຍັກ ຊື່ງຄ່າບໍລິການແມ່ນ 69 000 ກີບ/ຄົນ, ຂີ່ກົງເບັງ ຄ່າບໍລິການ 20 000 ກີບ/ຄົນ, ການຍ່າງປ່າເພື່ອຊົມທໍາມະຊາດ ແລະ ກີນເຂົ້າປ່າອີກດ້ວຍ.

ນອກຈາກນັ້ນທາງຜູ້ສໍາປະທານກໍາລັງ ເລັ່ງໃສ່ການສ້າງທາງປູຢາງແຕ່ເສັ້ນທາງ ເລກທີ 12 ຫາທ່າຝຣັງ, ການສ້າງບັງກາໂລ, ການສ້າງສາຍສະລິງ ແລະ ອື່ນໆ, ສະເພາະການສ້າງ ບັງກາໂລນີ້ແມ່ນເລັ່ງໃສ່ກຸ່ມນັກທ່ອງທ່ຽວຈີນ ທີ່ຄາດວ່າຈະມາທ່ຽວລາວເນື່ອງໃນໂອກາດ ເປີດປີທ່ອງທ່ຽວ ລາວ-ຈີນ 2019 ຄາດວ່າຈະສຳເຫຼັດໃນເດືອນເມສາທີ່ຈະມາເຖີງນີ້.

ວ້າວ … ຫາກສໍາລັດແລ້ວຮັບຮອງເລີນວ່າຈະເປັນອີກແຫຼ່ງທ່ອງທ່ຽວໜຶ່ງທີ່ຄົບວົງຈອນ ທັງຄວາມງາມທາງທໍາມະຊາດ ແລະ ການໄດ້ສໍາພັດກັບຄວາມທ້າທາຍໃນຫຼາກຫຼາຍກິດຈະກໍາຢູ່ທີ່ນີ້ຢ່າງແນ່ນອນ ທ່າຝຣັ່ງ.