ພະທາດຈອມຈວງ ໜຶ່ງສະຖານທີ່ທ່ອງທ່ຽວທາງວັດທະນະທໍາ ຂອງເມືອງລອງ ແຂວງຫຼວງນໍ້າທາ

674

ພະທາດຈອມຈວງເປັນພະທາດໜຶ່ງທີ່ໃຊ້ເປັນທີ່ກະລັກບູຊາຂອງຊາວພຸດທະສາສະໜາກຸ່ມບ້ານທາດນັ້ນກໍ່ຄືຊາວເມືອງລອງ ຕາມການເລົ່າຂານກັນມາວ່າພະທາດດັ່ງກ່າວສ້າງຂຶ້ນພ້ອມກັນກັບພະທາດຫຼວງຊຽງຕຶງ(ເມືອງສິງ) ແລະ ພະທາດດວງອື່ນໆພາຍໃນເມືອງລອງເຊັ່ນ: ພະທາດແມວສີ, ພະທາດຈອມແຈ້ງ, ພະ ທາດຈອມໝອກ ແລະ ພະທາດຫີນຟູ(ເມືອງສິງ)ພະທາດຈອມຈວງປະກອບມີ 2 ທາດ ພະທາດດວງເກົ່າ ແລະ ພະທາດດວງໃໝ່ຕັ້ງຢູ່ໃກ້ຄຽງກັນ ພະທາດດວງເກົ່່າກໍ່ສ້າງ ແລະ ປະຕິສັງຂອນຂຶ້ນມາໃໝ່ໃນປີ 1953 ພາຍຫຼັງທີ່ເກີດສົງຄາມຊາວບ້ານທາດນັ້ນກໍ່ຄືປະຊາຊົນກຸ່ມບ້ານ ທາດໃນປະຈຸບັນ ໄດ້ອົບພະຍົບໜີສົງຄາມໄປອາໃສ່ຢູ່ເມືອງເມິງ ແລະ ພາຍຫຼັງສົງຄາມສິ້ນສຸດໃນປີ 1975 ປະຊາຊົນໄດ້ພາກັນມາບູລະນະພະທາດ ແລະ ໄດ້ກໍ່ສ້າງພະທາດອີກດວງໜຶ່ງທີ່ຕັ້ງຕິດກັນ ໃນປີ 1994 ງານສະເຫຼີມສະຫຼອງທາດຈັດຂຶ້ນໃນທຸກໆປີ ໃນມື້ຂຶ້ນໃໝ່ 15 ຄໍ່າເດືອນ 5 ລື້ ເຊີ່ງກັບມື້ຂຶ້ນໃໝ່ 15 ຄໍ່າເດືອນ 4 ລາວ.

ປີນີ້ກໍກົງກັບ ວັນອັງຄານ 20 ມີນາ ເຊິ່ງວ່າກົງກັບມື້ ຂຶ້ນໃໝ່ 15 ຄໍ່າເດືອນ 4 ລາວ, ເດືອນ 5 ລື້ ພສ 2562 ເປັນມື້ຈັດງານສະເຫຼີມສະຫຼອງພະທາດຈອມຈວງຂຶ້ນ.

ພະທາດຈອມຈວງເປັນແຫຼ່ງທ່ອງທ່ຽວ ທາງວັດທະນະທຳ – ປະຫວັດສາດ ຕັ້ງຢູ່ກຸ່ມບ້ານທາດ ເມືອງລອງ ແຂວງຫຼວງນໍ້າທາ ສາມາດທ່ຽວໄດ້ 2 ລະດູຄື ລະດູ ແລ້ງ ແລະ ລະດູຮ້ອນ. ຫ່າງຈາກເທດສະບານເມືອງ 21,45 ກິໂລແມັດ ສາມາດເດີນທາງດ້ວຍລົດໃຫຍ່, ລົດຈັກ, ລົດຖີບ ຫຼື ດ້ວຍຍ່າງ.

ຜູ້ເກັບກຳຂໍ້ມູນ: ທ້າວ: ອຸທາ ພົນທາວີ ຮອງຫົວໜ້າໜ່ວຍງານທ່ອງທ່ຽວ ຫ້ອງການ ຖວທ ຮັບຜິດຊອບວຽກງານພັດທະນາ, ໂຄສະນາສົ່ງເສີ່ມການທ່ອງທ່ຽວ ແລະ ທ່ານ ປິ່ນແກ້ວ ລໍວັນຄຳ ພະນັກງານອາສາສະໝັກ.

ຜູ້ໃຫ້ຂໍ້ມູນ: ທ່ານ ໄມ່ມູນ ເລຂາຄະນະພັກຮາກຖານ ອຳນາດການປົກຄອງກຸ່ມບ້ານທາດ

ຈາກ: Muanglong Tourism