ລາດຊະສັກ ສືບຕໍ່ຝຶກຊ້ອມມວຍລາວ ຫວັງບັນລຸຄວາມຝັນ ຮັບໃຊ້ຊາດ

471

ທ້າວ ລາດຊະສັກ ສຸລິຍະວົງ ໃຫ້ສຳພາດວ່າ: ເຖິງວ່າປະເທດຊາດຂອງພວກເຮົາຈະໄດ້ຮັບຜົນກະທົບກັບ ໂຄວິດ-19 ໃນປັດຈຸບັນ ກໍຕາມ ເຊິ່ງເປັນບັນຫາຈຳເປັນທີ່ສຸດ ເຮັດໃຫ້ທຸກກິດຈະກຳຕ້ອງໄດ້ຢຸດພັກຊົ່ວຄາວ ແຕ່ນ້ອງນັ້ນ ກໍບໍ່ໄດ້ຢຸດການເຄື່ອນໄຫວໃນການຫຼິ້ນກິລາທີ່ຕົນເອງຖະນັດ ຊ້ອມດ້ວຍຕົນເອງທຸກໆມື້ ສິ່ງສຳຄັນແຕ່ຕ້ອງປະຕິບັດຕາມຄຳສັ່ງ ແລະ ແຈ້ງການທີ່ທາງລັດຖະບານແຈ້ງອອກ ເພື່ອປ້ອງກັນພະຍາດດັ່ງກ່າວ ເຊັ່ນໃຊ້ຜ້າປິດປາກ, ຮັກສາໄລຍະຫ່າງ ຈາກເພື່ອນໆນັກມວຍ ແລະ ທຸກຄົນທີ່ສັງກັດໃນຄ້າຍມວຍ ອິນຟິນິຕີ ໃນປັດຈຸບັນ.

“ ການຝຶກຊ້ອມແຕ່ລະວັນ ນ້ອງຈະເນັ້ນການອອກໄປແລ່ນທຸກໆເຊົ້າ, ເຂົ້າເວດຫຼິ້ນກ້າມແຂນກ້າມຂາ ແລະ ຈັບເປົ້າສອນມວຍໃຫ້ຄົນຕ່າງປະເທດ ທີ່ອາໃສຢູ່ລາວ ແລະ ນັກມວຍນ້ອງໃໝ່ ທີ່ໄຝ່ຝັນຢາກເປັນນັກຊົກທີ່ດີ ສິ່ງທີ່ນ້ອງຕັ້ງໃຈ ແລະ ເອົາໃຈໃສ່ໃນການຝຶກຊ້ອມເປັນປົກກະຕິ ແມ່ນເກີດມາຈາກຄວາມໄຝ່ຝັນໃນມື້ໜຶ່ງຢາກຈະເຂົ້າໄປເປັນທະຫານ ເພື່ອຮັບໃຊ້ຊາດຕາມຄວາມມຸ້ງໝັ້ນຂອງພໍ່-ແມ່ ທີ່ຢາກເຫັນນ້ອງຕາງໜ້າຄອບຄົວຮັບໃຊ້ຊາດຢ່າງສົມກຽດ ສະນັ້ນ ໃນການເຂົ້າຮ່ວມ ງານມະຫະກຳກີລາແຫ່ງຊາດ ຄັ້ງທີ 11 ຫຼື ຊຽງຂວາງ ເກມ ທີ່ແຂວງຊຽງຂວາງ ຮັບກຽດເປັນເຈົ້າພາບ ໃນຄັ້ງນີ້ ນ້ອງຈຶ່ງຕັດສິນໃຈ ຕາງໜ້າໃຫ້ ກອງທັບ ກຽມເຂົ້າຮ່ວມງານດັ່ງກ່າວ ໂດຍເປົ້າໝາຍ ແມ່ນຈະສູ້ຊົນໃຫ້ໄດ້ຫຼຽນຄຳ ເພື່ອຮັບປະກັນໃຫ້ໄດ້ເຂົ້າຮັບໃຊ້ຊາດ ” ລາດຊະສັກ ກ່າວ.

ສຳລັບຜົນງານຂອງ ທ້າວ ລາດຊະສັກ ສຸລິຍະວົງ ໜຸ່ມນັກຊົກຂວັນໃຈພາກໃຕ້ ໃນການເຂົ້າຮ່ວມງານມະຫະກຳກີລາແຫ່ງຊາດ ຜ່ານມາ 2 ຄັ້ງແລ້ວ ກໍຄື ຄັ້ງທຳອິດ ຕາງໜ້າແຂວງສະຫວັນນະເຂດ ເຂົ້າຮ່ວມ ງານມະຫະກຳກິລາແຫ່ງຊາດ ຄັ້ງທີ 9 ຫຼື ຫຼວງພະບາງ ເກມ ປີ 2011 ຂຶ້ນເວທີຕີໃນຮຸ່ນນໍ້າໜັກ 60 ກິໂລກຼາມ ຍາດໄດ້ 1 ຫຼຽນເງິນ ກ່ອນຈະແຈ້ງເກີດ ໃຫ້ແຂວງເຊກອງ ຄວ້າຫຼຽນຄຳ ປະຫວັດສາດໃຫ້ແຂວງດັ່ງກ່າວ ໃນງານມະຫະກຳກີລາແຫ່ງຊາດ ຄັ້ງທີ 10 ຫຼື ອຸດົມໄຊ ເກມ ເມື່ອປີ 2014 ຈາກນັ້ນ ລາດຊະສັກ ກໍໄດ້ຕາງໜ້າທັບນັກກີລາມວຍລາວ ເຂົ້າຮ່ວມງານມະຫະກຳກິລາຊີເກມ ຄັ້ງທີ 29 ທີ່ນະຄອນຫຼວງ ກົວລາລຳເປີ ປະເທດ ມາເລເຊຍ ແລະ ຕາງໜ້າທັບນັກກີລາຄີກບ໋ອກຊີງລາວ ເຂົ້າຮ່ວມງານມະຫະກຳກີລາຊີເກມ ຄັ້ງທີ 30 ທີ່ປະເທດຟິລິບປິນ ແຕ່ໜ້າເສຍດ່າຍ ລາດຊະສັກ ບໍ່ສາມາດແຈ້ງເກີດໃຫ້ກັບຕົນເອງ ແລະ ປະເທດຊາດໄດ້.
(ຂ່າວ: ອ້ວນດໍາ)